La stoy sbaik ta stojolal Jeova

Ta tsʼakale, kʼalal te toʼox oyik ta takixokol balumil li j-israeletike, li Kore, Datan, Abiram xchiʼuk li 250 ta voʼ viniketike la stoy sbaik ta stojolal li Moisese. Xi laj yalbeike: «¡Lilubkutik xa avuʼunik, mu xa jkʼankutik ti voʼot xabeiltasunkutike! Jech xtok, ¿kʼu yuʼun ti jaʼ och ta mero bankilal pale li Aarone? Maʼuk noʼox atuk xchiʼuk Aaron ti te xchiʼinojoxuk li Jeovae, yuʼun liʼ xchiʼinojunkutik eke». Li Jeovae chopol laj yaʼi li kʼusi laj yalike, yuʼun jaʼ yakal chkontrainat.

Li Moisese xi laj yalbe li Kore xchiʼuk xchiʼiltake: «Xatalik okʼom li ta axibalnae, xavichʼ tal yav avakʼalik xchiʼuk akʼbeik tal spomal. Te chakʼ ta ilel Jeova buchʼu junukal ta stʼuj».

Li ta yokʼomale, li Kore xchiʼuk li 250 ta voʼ viniketike te bat stsob sbaik xchiʼuk Moises li ta axibalnae. Te lik xchikʼik pom manchuk mi maʼuk paleetik. Vaʼun, li Jeovae xi laj yalbe li Moises xchiʼuk Aarone: «Chʼako abaik lokʼel ta stojolal li Kore xchiʼuk xchiʼiltake».

Li Koree te bat li ta axibalna ti bu oy li Moisese, pe li Datan, Abiram xchiʼuk yutsʼ yalalike muʼyuk skʼan xbatik. Vaʼun, li Jeovae xi laj yalbe li j-israeletike: «¡Chʼako abaik lokʼel li ta skarpana Kore, Datan xchiʼuk Abirame!» Ta anil noʼox la xchʼak sbaik lokʼel li j-israeletike. Pe li Datan, Abiram xchiʼuk yutsʼ yalalike te noʼox vaʼal komik ta stiʼ skarpanaik. Vaʼun, ta anil noʼox jav li balumil ti bu vaʼalike xchiʼuk la sbikʼ yalel li jtoybaetike. Jech xtok, li ta axibalnae te yal talel kʼokʼ, vaʼun te kʼakʼik li Kore xchiʼuk li 250 ta voʼ viniketike.

Ta tsʼakale, li Jeovae xi laj yalbe li Moisese: «Albo li jnitvanejetik ta jujuchop snitilulal Israel ti akʼo yichʼ tal li snamteʼike. Te xatsʼibabe ta snamteʼik li sbiik ta jujuntale. Pe li namteʼ ti jaʼ yuʼun snitilulal Levie jaʼ te xatsʼibabe li sbi Aarone. Te xavakʼ ta yut axibalna skotol li namteʼetike. Li buchʼu ta jtʼuje chlokʼ xnich li snamteʼe».

Ta yokʼomale, li Moisese la slokʼes skotol li namteʼetike xchiʼuk laj yakʼbe yil li jnitvanejetike. Pe, ¡kʼelavil!, li snamteʼ Aarone lokʼem xa xnich xchiʼuk yakal xa chakʼ sat almendra ti yijik xae. Taje jaʼ jech laj yakʼ ta ilel Jeova ti jaʼ la stʼuj li Aaron sventa x-och ta mero bankilal palee.