Jun achʼ jbeiltasvanej xchiʼuk chaʼvoʼ antsetik ti tsots yoʼontonike

Epal jabil la sbeiltas steklumal Jeova li Josuee. Kʼalal yichʼoj xa ox 110 sjabilale, cham. Li j-israeletike laj toʼox yichʼik ta mukʼ Jeova kʼalal kuxul toʼox li Josuee. Pe kʼalal chame, lik yichʼik ta mukʼ jecheʼ diosetik jech kʼuchaʼal tspasik li krixchanoetik ta Kanaane. Ta skoj ti muʼyuk xa bu la xchʼunbeik smantal Jeova li j-israeletike, li Jeovae laj yakʼ ti akʼo xlik pasbatikuk kʼusi chopol yuʼun li ajvalil ta Kanaan ti Jabin sbie. Vaʼun, li j-israeletike lik skʼanbeik vokol Jeova yoʼ xkoltaatike. Jaʼ yuʼun, li Jeovae la stʼuj yan jbeiltasvanej, Barak sbi, yuʼun jaʼ tskolta li krixchanoetik yoʼ xlik yichʼik ta mukʼ yan velta li Jeovae.

Li meʼ j-alkʼop Deborae la stak ta ikʼel Barak yoʼ xalbe jun aʼyej ti laj yal Jeovae, xi laj yale: «Batan li ta yukʼumal Sisone, ikʼo batel lajunmil viniketik sventa xapasik kʼop xchiʼuk li yajsoltarotak Jabine, jaʼ te chatsal li Sisarae ti jaʼ li bankilal soltaroe». Pe xi la stakʼbe Debora li Barake: «Jaʼ to chibat mi chabat eke». Vaʼun, xi la stakʼ li Deborae: «Lek, chbat jchiʼinot, pe maʼuk voʼot chamil li Sisarae. Yuʼun li Jeovae yaloj ti jaʼ ta stojolal jun ants ta xmilate».

Li Debora, Barak xchiʼuk li yajsoltarotake jmoj batik li ta vits Tabor yoʼ xbat xchapan sbaik sventa li paskʼope. Kʼalal laj yaʼi li Sisarae, la xchapan li skaretatak sventa paskʼop xchiʼuk li yajsoltarotake. Vaʼun, li Deborae xi laj yalbe li Barake: «Voʼot chakʼ apas kanal tana li Jeovae». Jaʼ yuʼun, li Barak xchiʼuk li lajunmil sviniktake, bat stsakik ta kʼop li yajsoltarotak Sisarae.

Li Jeovae laj yakʼ ti akʼo xmal lokʼel yok li ukʼum Sisone. Ta skoj taje, jech te matsʼal kom ta achʼel skaretaik sventa paskʼop li Sisarae. Vaʼun, li Sisarae, yal li ta skaretae xchiʼuk jatav batel. Li Barak xchiʼuk li yajsoltarotake la stsalik li yajsoltarotak Sisarae. Li Sisarae, jatav batel xchiʼuk te bat snakʼ sba ta skarpana jun ants ti Jael sbie. Li Jaele laj yakʼbe yuchʼ leche li Sisarae, vaʼun la xpix ta manta jech te och svayel, yuʼun lubem tajek, bat tajek xchʼulel ta vayel. Vaʼun, li Jaele nopaj batel ta kʼunkʼun, te la stsak jun teʼ ti lek tsʼubtsʼub sniʼe xchiʼuk la spajbe ta sjol, vaʼun cham li Sisarae.

Ta tsʼakale, li Barake bat li ta skarpana Jaele, yuʼun bat skʼel li Sisarae. Li Jaele lokʼ li ta skarpanae, vaʼun xi laj yalbe li Barake: «La’, chkakʼbot avil li vinik ti yakal chasaʼe». Kʼalal och batel li ta karpanae, laj yil ti chamem xa li Sisarae. Vaʼun, li Barak xchiʼuk Deborae la skʼejintaik Jeova yoʼ xichʼik ta mukʼ. Yuʼun koltaatik ta stsalel li yajkontraike, vaʼun 40 jabil laj yilik jun oʼontonal li j-israeletike.