La stsal jmadianetik li Jedeone

Ta mas jelavele, li j-israeletike muʼyuk xa bu laj yichʼik ta mukʼ li Jeovae, yuʼun lik yichʼik ta mukʼ li jecheʼ diosetike. Li jmadianetike toj chopol kʼusitik lik spasik, yuʼun laj yelkʼanbeik xchonbolomik li j-israeletike xchiʼuk la sokesbeik li kʼusitik stsʼunoj ta yosilike, jaʼ jech la spasik vukub jabil. Jaʼ yuʼun, li j-israeletike la snakʼ sbaik ta chʼentikaltik xchiʼuk ta vitstikaltik sventa mu kʼusi spasbatike. Jech xtok, lik skʼanbeik vokol Jeova sventa xkoltaatik. Jaʼ yuʼun, li Jeovae la stak tal jun yaj-anjel sventa xi xalbe jun kerem ti Jedeon sbie: «Li Jeovae la stʼujot sventa xakʼot ta jun tsatsal soltaro». Pe xi la stakʼ li Jedeone: «¿Kʼuxi xa noʼox ti voʼon ta jkolta li jchiʼiltak ti mu kʼusi xuʼ kuʼune?».

Li Jedeone tskʼan tsnaʼ mi ta melel laj yichʼ tʼujel yuʼun li Jeovae. ¿Kʼusi van la spas? La skʼi jlik nukulil chij ta lumtik xchiʼuk xi laj yalbe li Jeovae: «Mi jaʼ noʼox tʼuxul tsakub ta job osil okʼom li tsotse, pe mi jaʼ takin li lumtik ta spat xokone, jech ta jnaʼ ti voʼon chitun avuʼun sventa jpoj li jchiʼiltak ta Israele». Li kʼusi la skʼanbe Jeovae kʼot ta pasel. Li ta yokʼomale, li tsotse tʼuxul sakub, yan li lumtike takin sakub. Vaʼun, la skʼanbe yan velta Jeova ti jaʼuk xa tʼuxuluk sakub ta job osil li lumtike, yan li tsotse jaʼ takin akʼo komuk li ta sob yokʼomale. Kʼot ta pasel yan velta li kʼusi la skʼan li Jedeone. Vaʼun, jaʼ to te la xchʼun ti yichʼoj tʼujel yuʼun li Jeovae, jaʼ yuʼun lik xchapan skotol li yajsoltarotak sventa xbat stsakik ta kʼop li jmadianetike.

Li Jeovae xi laj yalbe li Jedeone: «Ta jkolta li j-israeletik sventa spasik kanal li ta paskʼope. Pe ta skoj ti ep soltaroetik achiʼuke, xuʼ snopik ti jaʼ ta yipal stukik ti tspasik kanale. Jaʼ yuʼun, albo ti akʼo sutikuk batel ta snaik li buchʼutik ta xiʼike». Vaʼun, ta yokʼomale sut batel ta snaik 22 mil soltaroetik, jaʼ xa noʼox te komik lajunmil. Pe xi to laj yal li Jeovae: «Toj epoxuk to, jaʼ lek ikʼo batel ta ukʼum li soltaroetike xchiʼuk albo ti akʼo yuchʼik voʼe. Jaʼ noʼox akʼo komikuk li buchʼutik ta slup ta skʼobik li voʼe xchiʼuk ti te noʼox satik ti mu xtal li yajkontraike». Ta slajebe, jaʼ noʼox oxib sien soltaroetik la slup ta skʼobik li voʼe xchiʼuk ti te noʼox satik mi oy kʼusi chkʼot ta pasele. Vaʼun, li Jeovae laj yalbe Jedeon ti tstsalik li 135 mil soltaroetik ta Madiane.

Li ta akʼobaltik taje, li Jeovae xi laj yalbe li Jedeone: «Kʼot xa yorail sventa chatsakik ta kʼop li jmadianetike». Li Jedeone lik spukbe xkachuik li yajsoltarotake xchiʼuk laj yakʼanbe jtel teʼ ti tsanal skʼakʼal ti te tikʼil batel ta kʼibe, vaʼun xi laj yalanbee: «Kʼelik ti k’u yelan ta jpase, vaʼun jaʼ jech xapasik ek». Vaʼun, li Jedeone lik sjupan li xkachue, la svokʼ li skʼibe xchiʼuk la sjimulan li kʼokʼ stomoj batele xchiʼuk xi avane: «¡S-espada Jeova xchiʼuk Jedeon!». Li oxib sien yajsoltarotak Jedeone jech la spasik ek. Vaʼun, li jmadianetike lik jatavikuk batel. Ta skoj ti tanpuk oyike xchiʼuk ti xiʼemik tajeke, jech te lik smil sba stukik. Jaʼ jech la spoj yan velta j-israeletik li Jeovae.