Li baʼyel ajvalil ta Israele

Akʼo mi la svaʼan jchapanvanejetik Jeova sventa sbeiltasatik li j-israeletike, li stukike tskʼanik jun ajvalil, jaʼ yuʼun xi laj yalbeik li Samuele: «Skotol li yan lumetike oy ajvalil yuʼunik, ta jkʼankutik junuk ajvalil ek». Li Samuele snaʼoj ti muʼyuk lek ti jech tskʼanike, jaʼ yuʼun la skʼopon li Jeovae, vaʼun xi takʼbate: «Maʼuk voʼot ti tspʼajikote, jaʼ voʼon tspʼajikun. Albo li jteklum ti xuʼ svaʼanik junuk ajvalil yuʼunike, pe jaʼ noʼoxe ep kʼusi chkʼanbatik». Kʼalal laj yaʼiike, xi la stakʼike: «Xuʼ jech, li kʼusi ta jkʼankutike jaʼ ti akʼo oyuk junuk ajvalil kuʼunkutike».

Jaʼ yuʼun, li Jeovae laj yalbe Samuel buchʼu chkʼot ta baʼyel ajvalil li ta Israele ti jaʼ li Saule. Kʼalal ay svulaʼan Samuel te ta Rama li Saule, te la smalbe aseite ta sjol ti jaʼ svinajeb ti tʼujbil sventa xkʼot ta ajvalile.

Vaʼun, li Samuele la stsob li j-israeletik sventa xakʼbe yojtikin li ajvalil yuʼunike. Pe mu toʼox staik ta saʼel li Saule, ¿mi xanaʼ kʼu yuʼun? Yuʼun te snakʼoj sba ta epal ikatsiletik. Kʼalal la staike, te laj yikʼik batel ti bu stsoboj sbaik li j-israeletike. Jaʼ noʼox stuk toj nat xchiʼuk toj lek kʼupil sba. Vaʼun, xi laj yal li Samuele: «Kʼelo avilik ti buchʼu la stʼujboxuk ta ajvalil li Jeovae». Vaʼun, xi tsots avan skotolike: «¡Jaluk xkuxi li ajvalile!».

Kʼalal mu toʼox jaluk yochel ta ajvalil li Saule, la xchikintabe li Samuele xchiʼuk laj toʼox xchʼunbe smantal li Jeovae. Pe ta tsʼakale, jel li stalelale. Yuʼun jun veltae albat yuʼun Samuel ti akʼo smala sventa koʼoluk xakʼbeik smoton li Jeovae. Yuʼun mu stakʼ xakʼ stuk li matanale. Pe ta skoj ti muʼyuk bu xkʼot ta anil li Samuele, li Saule stuk laj yakʼbe li smoton Jeovae. ¿Kʼusi van tspas xanaʼ li Samuele? Xi laj yalbe li Saule: «La achʼun jechuk li kʼusi laj yal Jeovae, pe muʼyuk laj apas». Pe ¿mi laj van xchan Saul ti skʼan xchʼunbe smantal li Jeovae?

Kʼalal ay stsak ta kʼop j-amaleketik li Saule, albat yuʼun Samuel ti akʼo slajes komel skotole. Pe li Saule muʼyuk la smil li ajvalil Agage, jaʼ yuʼun li Jeovae xi laj yalbe li Samuele: «Li Saule muʼyuk la xchʼunbun li kʼusitik laj kalbee». Kʼalal laj yaʼi Samuel taje, laj yat tajek yoʼonton, jaʼ yuʼun xi laj yalbe li Saule: «Li Jeovae ta stʼuj yan ajvalil ta skoj ti muʼyuk xachʼunbe smantale». Kʼalal joyij li Samuele, nitbat skʼuʼ yuʼun li Saule, vaʼun jat yuʼun. Li Samuele xi to laj yalbe li Saule: «Jaʼ jech ta xtuchʼbot avabtel ta ajvalil li Jeova eke».