David xchiʼuk Goliat

Xi albat yuʼun Jeova li Samuele: «Batan ta sna Jese, yuʼun jaʼ la jtʼujbe jun xnichʼon sventa x-och ta ajvalil li ta Israele». Jaʼ yuʼun, li Samuele bat ta sna Jese, kʼalal laj yilbe li sbankilal kereme, xi la snope: «Ta melel jaʼ stʼujoj Jeova maʼ leʼe». Pe li Jeovae laj yalbe Samuel ti maʼuk stʼujoj li sbankilal kerem Jesee. Xi to laj yalbee: «Li voʼone jaʼ ta jkʼelbe li yut yoʼontone, maʼuk li spat xokone».

Li Jesee laj yikʼ tal li yan vakib skeremtak sventa xakʼbe yil li Samuele. Pe xi laj yal li Samuele: «Muʼyuk tʼujbilik yuʼun Jeova li akeremtak liʼe, ¿mi muʼyuk xa yan akerem?». Xi takʼav li Jesee: «Jaʼ xa noʼox jun kuni kʼox kerem ti David sbie, pe muʼyuk liʼ oye, yuʼun yakal chchabi jchijkutik». Vaʼun, kʼalal kʼot li Davide, xi albat yuʼun Jeova li Samuele: «¡Leʼe jaʼ jtʼujoj!». Jaʼ yuʼun, li Samuele la smalbe aseite ta sjol li Davide. Jaʼ jech la stʼuj sventa jaʼuk xkʼot ta ajvalil li ta Israele.

Ta mas tsʼakale, li j-israeletike la spasik kʼop xchiʼuk li jfilisteaetike. Li jfilisteaetike oy jun bankilal soltaro yuʼunik ti toj mukʼ xchiʼuk nate, jaʼ sbi Goliat. Skotol velta tsnaʼle li j-israeletike xchiʼuk xi tsots ch-avane: «Tʼujik junuk achiʼilik sventa jpaskʼop xchiʼuke. Mi jaʼ la spas kanale, chikʼotkutik ta amosoik. Yan mi voʼon la jpas kanale, voʼoxuk chakʼotik ta jmosokutik».

Jun veltae, li Davide bat yakʼbe sveʼel sbankiltak ti bu spasoj skarpanaike, yuʼun jaʼik soltaroetik. Kʼalal kʼote, laj yaʼi ti tsots ch-avan li Goliate, vaʼun xi laj yal li Davide: «Voʼon chbat jtsak ta kʼop li Goliate». Pe xi la stakʼ li ajvalil Saule: «Uni keremot to». Vaʼun, xi la stakʼ li Davide: «Jaʼ tskoltaun li Jeovae».

Vaʼun, li Saule laj yakʼbe David li yabtejebtak sventa paskʼope. Pe xi laj yal li Davide: «Mu stakʼ xixanav xchiʼuk li kabtejeb sventa paskʼope». Jaʼ yuʼun, li Davide la stsak li xjimichʼ ti xkoʼolaj kʼuchaʼal jun uliʼ ti chichʼ tunesel sventa xichʼ jipel batel jpʼejuk tone. Vaʼun, li Davide bat ta jun ukʼum, ay saʼ tal voʼpʼej ton ti lek xchʼulete, te la stikʼ tal ta snutiʼ. Vaʼun, bat snup ta be li Goliat sventa stsak ta kʼope. Kʼalal ilat yuʼun li Goliate, xi albate: «¡Laʼ li’e uni kʼox kerem, ta xkakʼbe stiʼik abekʼtal li mutetik ta vinajel xchiʼuk li jtiʼval chonbolometike!». Ta skoj ti mu snaʼ xiʼ li Davide, xi la stakʼbe li Goliate: «Li voʼote avichʼoj tal a-espada, alansa, pe li voʼone tal jkontrainot ta sbi Jeova. Yuʼun maʼuk yakal chatsakunkutik ta kʼop, jaʼ yakal chatsak ta kʼop li Jeovae. Skotol li buchʼutik liʼ oyike ta xilik tana ti jaʼ mas tsots yipal li Jeovae, ti jaʼ mu jechuk li a-espada xchiʼuk li alansae. Avie, chakʼoxuk ta jkʼobkutik li Jeovae».

Jaʼ yuʼun, li Davide la stikʼ jpʼej ton li ta xjimichʼe, vaʼun la sjipbe batel li Goliate. Ta skoj ti koltavan li Jeovae, li tone tukʼ kʼot ta stiba li Goliate. Vaʼun, toj chamel kʼot. Kʼalal laj yilik li jfilisteaetike, jatavik batel ta anil sventa mu xmilatik eke. ¿Mi chapat avoʼonton ta stojolal Jeova jech kʼuchaʼal la spas li Davide?