Li kʼusi kʼot ta pasel ta vits Karmeloe

Oy ep ajvaliletik ti chopol la sventainik li lajunchop nitilulal ta Israele, pe oy jun ajvalil ti mas toj chopol echʼe, jaʼ li Akabe. Nupun xchiʼuk jun chopol ants ti chichʼ ta mukʼ li jecheʼ dios Baale. Li ants taje Jesabel sbi, vaʼun li Akab xchiʼuk yajnile la sloʼlaik li krixchanoetik sventa xichʼik ta mukʼ li Baale. Jech xtok, la smilbeik ep yaj-alkʼoptak li Jeovae. ¿Kʼusi van tspas li Jeovae? La stak batel Elias ti jaʼ yaj-alkʼop sventa oyuk kʼusi xbat yalbe li Akabe.

Li Eliase laj yalbe Akab ti muʼyuk chakʼ voʼ ta Israel ta skoj ti jaʼ jun chopol ajvalile. Vaʼun, muʼyuk xakʼ voʼ mas ta oxib jabil xchiʼuk muʼyuk kʼusi xchʼi li ta balumile, solel chchamik ta viʼnal li krixchanoetike. Ta tsʼakale, li Jeovae la stak batel yan velta Elias sventa xbat skʼopon li Akabe. Pe li ajvalil Akabe xi laj yalbe li Eliase: «¡Voʼot ta amul ti jech ta xkil jvokolkutike!». Xi la stakʼ li Eliase: «Maʼuk ta jmul ti muʼyuk chakʼ voʼe. Jaʼ ta skoj ti jaʼ chavichʼ ta mukʼ li Baale. Jaʼ lek alo mantal ti akʼo stsob sbaik skotol li j-israeletik te ta vits Karmeloe xchiʼuk li j-alkʼopetik yuʼun Baale. Vaʼun, jkʼeltik buchʼu ta smul».

Kʼalal te xa ox stsoboj sbaik ta vits Karmelo li j-israeletike, xi laj yal li Eliase: «Jaʼ yorail chatʼujik buchʼu ta stojolal chatunik, mi jaʼ ta stojolal li Jeovae o mi jaʼ ta stojolal li Baale». Jaʼ yuʼun, li 450 yaj-alkʼop Baale xi albatike: «Meltsanik junuk milbil matanal, vaʼun skʼan xlik akʼoponik li adiosike. Jech li voʼon eke ta jmeltsan jkotuk milbil matanal xchiʼuk jaʼ ta jkʼopon li Jeova Dios kuʼune. Li buchʼu ta x-aʼibat skʼope xchiʼuk ti chtakbat tal kʼokʼ yuʼun li sdiose, jaʼ kuxul Dios ta melel un bi». Skotolik li j-israeletike la spasik li kʼusi laj yal li Eliase.

Vaʼun, li j-alkʼopetik yuʼun Baale lik xchapanik li matanale xchiʼuk lik skʼoponik sjunul kʼakʼal li sdiosike, xi chalbeike: «¡Baal, takʼbun li jkʼopkutike!». Pe muʼyuk buchʼu xtakʼav, jaʼ yuʼun li Eliase xi lik yale: «Tsots xavaptaik, yuʼun yikʼaluk yakal chvay, jech oxal skʼan xatijik». Jech-o la spasik li j-alkʼopetik yuʼun Baale jaʼ to ti kʼuxi och li akʼobale. Pe muʼyuk takʼav li sdiosike.

Ta tsʼakale, li Eliase laj yakʼbe smoton Jeova ta skajleb li matanale xchiʼuk laj yatʼes ta voʼ, vaʼun xi laj yalbe li Jeovae: «Kajval Jeova, akʼo ta ilel ti voʼot li melel Diosote». Kʼalal jech laj yale, ta ora noʼox yal tal kʼokʼ ta vinajel xchiʼuk la xchikʼ li matanale, vaʼun xi lik avanikuk skotolike: «¡Li Jeovae, jaʼ Dios ta melel!». Vaʼun, li Eliase xi laj yale: «¡Mu me xavakʼik jatavuk junuk li yaj-alkʼoptak Baale!». Li vaʼ kʼakʼale, laj yichʼik milel li 450 yaj-alkʼoptak Baale.

Ta tsʼakale, te lik vinajuk uni jvol tok li ta nabe, vaʼun xi laj yalbe Akab li Eliase: «Chapano akareta xchiʼuk batan ta ana, yuʼun chtal tsatsal chaukilvoʼ». Vaʼun, mak ta tok li vinajele, tal tsatsal ikʼ xchiʼuk tsots tajek laj yakʼ voʼ. Li Akabe muy ta skareta xchiʼuk bat ta anil, pe li Jeovae laj yakʼbe yipal Elias sventa mas anil xbat ti jaʼ mu sta li skareta Akabe. Pe ¿mi te van laj-o svokol li Eliase? Jkʼeltik batel.