Li bankilal soltaro xchiʼuk li kʼox tsebe

Oy jun j-israelal tseb ti nom tajek xil ti bu nakal li stot smeʼe. Taje jaʼ ta skoj ti ikʼat batel yuʼun soltaroetik li ta lum Siriae. Vaʼun, te mosoinat yuʼun yajnil jun bankilal soltaro ti Naaman sbie. Pe li ta na bu kʼote, muʼyuk chichʼik ta mukʼ li Jeovae. Yan li stuke chichʼ ta mukʼ li Jeovae.

Li Naamane tsakbil ta kʼaʼemal chamel li ta sjunul sbekʼtale. Jech oxal, li kʼox tsebe tskʼan tskolta li Naamane, jaʼ yuʼun xi laj yalbe li smeʼ ajvale: «Oy buchʼu xkojtikin ti xuʼ xpoxtaj yuʼun li amalale. Li ta Israele oy jun yaj-alkʼop Jeova ti Eliseo sbie, mi chbat skʼele, xuʼ xpoxtaj».

Ta tsʼakale, li Naamane albat yuʼun yajnil li kʼusi albat yuʼun li uni tsebe. Ta skoj ti tskʼan chkol li Naamane, la xchʼun li kʼusi albate. Jaʼ yuʼun, bat ta sna li Eliseo ti te nakal ta Israele. Kʼalal kʼot li Naamane, la snop mi lek xa chichʼ chʼamel ta skoj ti jaʼ bankilal soltaroe. Pe mu jechuk kʼot ta pasel, yuʼun li Eliseoe jaʼ noʼox la stak batel yajtunel sventa xi xalbe li Naamane: «Bat atinan vukubuk velta li ta Ukʼum Jordane, vaʼun ta xa poxtaj».

Kʼalal laj yaʼi li Naamane, ilin tajek, vaʼun xi laj yale: «La jnop ti liʼ vaʼal ta jtsʼel ta skʼanbe vokol li Dios yuʼune xchiʼuk la jnop ti chakʼ skʼob ti bu ip chkaʼie, vaʼun xuʼ chipoxtaj. Pe li kʼusi noʼox laj yalbune jaʼ ti akʼo la xbat atinkun li ta ukʼum ta Israele. Jaʼ lek ti teuk noʼox li atin ta ukʼumetik ta Siriae, yuʼun mas to lekik. ¿Kʼu yuʼun ti maʼuk te la stakun batele?». Vaʼun, li Naamane ilin tajek xchiʼuk lokʼ batel li ta sna Eliseoe.

Pe li Naamane koltaat yuʼun yajtuneltak sventa snopbe lek skʼoplal li kʼusi albate, xi laj yalike: «¿Mi mu tauk xapas kʼusiuk noʼox sventa xakole? Li kʼusi tskʼanbot li j-alkʼope muʼyuk tsots. ¿Kʼu yuʼun ti mu xapase?». Li Naamane la xchʼun li kʼusi albate, jaʼ yuʼun bat atinuk vukub velta li ta ukʼume. Vaʼun, li ta svukubal velta kʼalal lokʼ ta voʼ li Naamane, poxtaj. Solel xmuyubaj tajek, jaʼ yuʼun sut stojbe ta vokol li Eliseoe xchiʼuk xi laj yalbee: «¡Liʼ ta orae, laj xa jnaʼ ti jaʼ melel Dios li Jeovae!». Ta tsʼakale, sut batel ta sna li Naamane. Kʼalal laj yil li kʼox tseb ti poxtaj xa li Naamane, ¿mi xanaʼ kʼu yelan laj yaʼi sba?