Ay vulaʼanatuk yuʼun anjel Gabriel li Mariae

Li Mariae jaʼ jun tojol tseb ti te nakal ta Nasaret ti te xkom ta Galileae xchiʼuk ti jaʼ yutsʼ yalal sbaik xchiʼuk li Elisabete. Li Mariae poʼot xa ox xnupun xchiʼuk jun karpintero ti Jose sbie. Kʼalal oy xa ox ta vakib u xchiʼinoj yol li Elisabete, li anjel Gabriele jaʼo laj yakʼ sba ta ilel ta stojolal li Mariae, xi laj yalbee: «Liʼote, Maria, lek ilbilot yuʼun li Jeovae». Pe li Mariae muʼyuk laj yaʼibe smelolal li kʼusi albate. Jaʼ yuʼun, xi laj yal li anjel Gabriele: «Ta xachiʼin avol, yuʼun chavokʼes jun kerem, Jesus chavakʼbe sbi, ta xkʼot ta ajvalil xchiʼuk muʼyuk bu chlaj skʼoplal li Ajvalilal yuʼune».

Xi la stakʼ li Mariae: «Pe chʼabal to jmalal, ¿kʼuxi xa noʼox ti ta xkil kole?». Xi laj yal li anjel Gabriele: «Li Jeovae xuʼ yuʼun spasel skotol, chtal ta atojolal li xchʼul espiritue, vaʼun chachiʼin avol . Yuʼun li avutsʼ avalal Elisabete xchiʼinoj xa yol ek». Jaʼ yuʼun, xi la stakʼ li Mariae: «Jaʼ smosoun li Jeovae akʼo kʼotuk ta pasel li kʼusi yaloj tspas ta jtojole».

Li Mariae bat svulaʼan li Elisabet ti te nakal ta jun vitse. Kʼalal kʼot kʼoponatuk yuʼun Maria li Elisabete, laj yaʼi bakʼ li yole, vaʼun ventainat yuʼun li xchʼul espiritu Jeovae, jaʼ yuʼun xi laj yalbe li Mariae: «Maria, laj xa yakʼbot bendision li Jeovae. Jaʼ jun mukʼta matanal chkaʼi ti chtal avulaʼanune». Xi la stakʼ li Mariae: «Ta xkichʼ ta mukʼ ta sjunul koʼonton li Jeovae». Vaʼun, li Mariae te kom xchiʼin Elisabet oxibuk u, ta tsʼakale sut batel ta Nasaret ti jaʼ te nakale.

Kʼalal laj yaʼi Jose ti xchiʼinoj xa yol li Mariae, mu xa ox skʼan xnupun xchiʼuk. Ta skoj taje, laj yakʼ sba ta ilel jun anjel ta xvayich li Josee xchiʼuk xi albate: «Mu xaxiʼ ta yikʼel li Mariae. Yuʼun muʼyuk kʼusi chopol spasoj». Jaʼ yuʼun, li Josee nupun xchiʼuk li Mariae, vaʼun laj yikʼ batel ta sna.