Li Jeovae la xchabi li Jesuse

Li ta slokʼeb kʼakʼal ta Israele oy jtsop krixchanoetik ti xchʼunojik ti xuʼ xbeiltasatik yuʼun li kʼanaletike. Oy jun akʼobale, oy jayvoʼ viniketik ti likemik ta Slokʼeb Kʼakʼale laj yilik ta vinajel ti oy kʼusi stsʼayayet xchiʼuk ti yakal chanav batel ti xkoʼolaj yilel ta kʼanale, vaʼun la stsʼakliik batel kʼalal to ta Jerusalen. Pe li viniketik taje, xi la sjakʼilanik batele: «¿Bu oy li uni olol ti chkʼot ta ajvalil yuʼun li judaetike? Yuʼun tal kichʼkutik ta mukʼ».

Li ajvalil ta Jerusalen ti jaʼ li Erodese laj yaʼibe skʼoplal li achʼ ajvalile. Vaʼun, solel la svul tajek yoʼonton, jaʼ yuʼun xi la sjakʼbe li bankilal paleetike: «¿Bu onoʼox albil skʼoplal ti chvokʼ li ajvalil taje?». Xi la stakʼik li bankilal paleetike: «Li j-alkʼopetike laj yalik ti te chvokʼ ta Belene». Jaʼ yuʼun, li Erodese la stak ta ikʼel li viniketik ti likemik ta Slokʼeb Kʼakʼale, vaʼun xi laj yalbee: «Bat saʼik ta Belen li olole. Vaʼun, te xtal avalbeikun ti bu oye, yuʼun ta jkʼan chkichʼ ta mukʼ ek». Pe taje mu meleluk.

Li kʼanale lik xanavuk yan velta, vaʼun li viniketike la stsʼakliik batel jaʼ to ti kʼuxi kʼotik ta Belene. Li kʼanale te kʼot pajuk ta jpʼej na ti bu oy li Jesuse. Vaʼun, li viniketike ochik li ta yut nae xchiʼuk te la staik li Jesus xchiʼuk li smeʼ ti Maria sbie. Vaʼun, lik yichʼik ta mukʼ xchiʼuk laj yakʼbeik smoton li olole: laj yakʼbeik oro, sakil pom xchiʼuk muil poxil ti mirra sbie. Pe ¿mi jaʼ van la stak batel Jeova li viniketik yoʼ bu oy li neneʼ Jesuse? Maʼuk.

Li ta akʼobaltik taje, li Jeovae xi laj yalbe ta xvayich li Josee: «Likan, ikʼo batel li uni olol xchiʼuk smeʼe, jatavanik batel ta Ejipto, te koman-o jaʼ to mi laj kalbot ti chasut talele, yuʼun li Erodese yakal tsaʼ sventa smil li uni olole». Jaʼ yuʼun, li Jose, li Maria xchiʼuk li uni Jesuse batik li ta Ejiptoe.

Jech noxtok, li Jeovae laj yalbe li viniketik ti likemik ta Slokʼeb Kʼakʼal ti mu sutik batel ta stojolal li Erodese. Vaʼun, kʼalal laj yakʼ venta Erodes ti muʼyuk xa sutik talel li viniketike, solel ilin tajek. Ta skoj ti muʼyuk la sta li Jesuse, laj yal mantal ti akʼo smilik skotol li ololetik ta Belen ti koʼol sjabilalik xchiʼuk li Jesuse. Pe li Jesuse muʼyuk kʼusi la snuptan, yuʼun te xa ox oyik ta Ejipto.

Ta mas tsʼakale, cham li Erodese. Vaʼun, li Jeovae xi laj yalbe li Josee: «Xuʼ xa xasutik batel li ta Israele, yuʼun muʼyuk xa xibal sba». Jaʼ yuʼun, li Jose, li Maria xchiʼuk li Jesuse sutik batel li ta Israele, vaʼun te kʼot nakiikuk li ta jteklum Nasarete.