Li kerem Jesuse

Te toʼox nakalik ta Nasaret li Jose, Maria, Jesus, xchiʼuk li yan yalab xnichʼnabike. Li Josee ch-abtej toʼox ta karpintero sventa smakʼlin li yutsʼ yalale. Pe maʼuk noʼox, yuʼun chchanubtas ta Smantaltak Jeova li yutsʼ yalale. Skotolik nopem xaʼi chbatik li ta snail tsobobbail sventa xichʼik ta mukʼ li Diose xchiʼuk chbatik jujun jabil ta Jerusalen sventa spasik li Kʼin Koltaele.

Kʼalal 12 xa ox sjabilal li Jesuse, nat xanavik batel xchiʼuk yutsʼ yalal sventa xbatik ta Jerusalen jech kʼuchaʼal nopem onoʼox xaʼiike. Epal krixchanoetik kʼotik li ta Jerusalen sventa spasik li Kʼin Koltaele. Kʼalal laj xa ox li kʼine, sutik batel ta snaik li Jose xchiʼuk Mariae. La snopik mi te xchiʼuk batel yutsʼ yalalik li Jesuse. Pe kʼalal la saʼike, muʼyuk la staik.

Jaʼ yuʼun, chaʼsutik yan velta ta Jerusalen li Maria xchiʼuk Josee, oxib kʼakʼal la saʼik li Jesuse, vaʼun te la staik ta yut li temploe. Te chotol la staik ta oʼlol ti bu oy li jchanubtasvanejetike, yakal chchikinta li kʼusi chalike xchiʼuk oy kʼusitik tsjakʼ. Li jchanubtasvanejetike solel toj labal sba chaʼiik li kʼusi chal li Jesuse, vaʼun oy kʼusitik lik sjakʼbeik. Chʼayal to kʼot yoʼontonik ti kʼu yelan la stakʼ li Jesuse. Vaʼun, laj yakʼik venta ti xaʼibe lek smelolal li Smantaltak Jeovae.

Li Jose xchiʼuk Mariae chat tajek yoʼontonik, jaʼ yuʼun li Mariae xi laj yalbe li Jesuse: «Kuni kerem, ¿kʼu yuʼun ti jech la apasbunkutike? Solel laj xa jsaʼotkutik tajek xchiʼuk li atote». Vaʼun, xi la stakʼ li Jesuse: «¿Mi mu xanaʼik ti skʼan liʼ oyun ta sna Jtote?».

Vaʼun, li Jesuse sut batel xchiʼuk stot smeʼ li ta Nasarete. Vaʼun, chanubtasat yuʼun Jose ta karpinteroal. Ta tsʼakale, chʼi xchiʼuk pʼijub batel li Jesuse. Jaʼ yuʼun, lek kʼanbil yuʼun Jeova xchiʼuk li krixchanoetike. Pe ¿kʼu toʼox van yelan xanaʼ kʼalal bikʼit toʼoxe?