La xchʼuba templo li Jesuse

Li ta yuilaltik avril ta sjabilal 30, li Jesuse bat ta Jerusalen. Ep buchʼutik te batemik sventa spasik li Kʼin Koltaele. Li ta kʼin taje chichʼik batel xchonbolomik sventa xakʼbeik ta smoton Dios li ta temploe, pe li yantike jaʼ to te chkʼot tsmanik li ta Jerusalene.

Kʼalal kʼot ta templo li Jesuse, laj yil ti te chchonik chonbolometik junantik krixchanoetike. Yakal xa tspasik ta chʼivit li sna Jeova ti jaʼ sventa yichʼobil ta mukʼe, ¿kʼusi van ta spas li Jesuse? La stsʼot jlik chʼojon, vaʼun la snuts lokʼel ta templo li chijetik xchiʼuk li vakaxetike, jech xtok la stanibe stakʼin li jeltakʼinetike xchiʼuk la svalkʼunbe li xmexaike. Xi laj yalbe li jchonpalomaetike: «¡Lokʼesik batel skotol li kʼusitik liʼe! ¡Mu xapasik ta chʼivit li sna Jtote!».

Li buchʼutik te oyik ta temploe toj labal sba laj yilik li kʼusi la spas li Jesuse. Vaʼun, li yajchankʼoptake te vul ta sjolik li kʼusi xi onoʼox albil skʼoplal ta sventa li Mesiase: «Solel oy tajek ta koʼonton li sna Jeovae».

Ta mas jelavele, li ta sjabilal 33, li Jesuse la xchʼuba ta xchibal velta li temploe, yuʼun tskʼan ti akʼo xichʼik ta mukʼ li sna Stote.