Li Jesuse la stʼuj li 12 jtakboletike

Kʼalal te van jun jabil xchiʼuk oʼlol slikesoj cholmantal li Jesuse, oy kʼusi tsots skʼoplal la spas. Yuʼun la stʼuj li buchʼutik xuʼ ta xkoltaat li ta abtele xchiʼuk ti xkoltaat ta sbeiltasel li tsobobbaile. Pe ¿buchʼutik la stʼuj li Jesuse? Kʼalal skʼan toʼox stʼuj li yajtakboltake, baʼyuk la skʼanbe koltael li Jeovae, vaʼun muy ta jpʼej vits sventa stukuk oye xchiʼuk sjunul akʼobal la skʼopon Jeova. Ta sob yokʼomale, la stsob li jlom yajchankʼoptake, vaʼun la stʼuj li 12 yajtakboltake. ¿Mi xanabe sbi ta jujuntal? Li sbiike jaʼ Pedro, Andres, Santiago, Juan, Felipe, Bartolome, Tomas, Mateo, Santiago xnichʼon Alfeo, Tadeo, Simon xchiʼuk Judas Iskariote.

Buyuk noʼox xbat li Jesuse te chiʼinat batel yuʼun li 12 yajtakboltake. Vaʼun, la xchanubtasan ta xcholel li mantale, ta tsʼakale la stak batel stukik ta cholmantal. Pe maʼuk noʼox, yuʼun akʼbat sjuʼelik yuʼun Jeova sventa slokʼesik pukujetik xchiʼuk ti xpoxtavanike.

Li Jesuse la spat yoʼonton ta stojolal li 12 yajtakboltake, yuʼun laj yil kʼuchaʼal yamigotak. Yan li jfariseoetike la snopik ti muʼyuk tsotsik skʼoplal li jtakboletike xchiʼuk ti mu kʼusi snaʼike. Pe li Jesuse mu jechuk laj yil, yuʼun la xchanubtasan lek sventa spas yuʼunik li yabtelike. Jech xtok, te la xchiʼinik Jesus kʼalal oy kʼusi tsotsik skʼoplal kʼot ta stojolale. Jech kʼuchaʼal liʼe, te la xchiʼinik-o kʼalal skʼan toʼox xchame xchiʼuk kʼalal chaʼkuxie. Jutuk mu skotoluk li jtakboletike likemik ta Galilea ti jaʼ te likem ek li Jesuse xchiʼuk junantike oy xa yajnilik.

Jaʼik jmulavil krixchanoetik ek li jtakboletike. Jaʼ yuʼun, bakʼintike oy kʼusitik chalik ti muʼyuk bu tsnopik baʼyuke, bakʼintik xtoke chopol kʼusi chkʼot ta nopel yuʼunik, chʼabal smalael yuʼunik xchiʼuk chut sbaik ta skoj ti tskʼanik ti oyuk buchʼu mukʼ skʼoplal yuʼunike. Akʼo mi jech, skʼanojik li Jeovae. Jech xtok, kʼalal te xa ox oy ta vinajel li Jesuse, jaʼ xa la skʼelik tsobobbail li jtakboletike.