Chchanubtas ta spasel orasion yajchankʼoptak li Jesuse

Skotol li kʼusi tspasik li jfariseoetike jaʼ sventa lekuk x-ilatik xchiʼuk lekuk skʼoplalik ta stojolal li krixchanoetike. Sventa x-ilatike, jaʼ te tspasik orasion ti bu oy epal krixchanoetike, tskomtsan ta sjolik orasionetik ti jalik tajeke, vaʼun chchaʼalilanik ta snail tsobobbailetik o ta kayeetik sventa xaʼiik li krixchanoetike. Jaʼ yuʼun, toj labal sba laj yaʼi li krixchanoetik kʼalal xi laj yal li Jesuse: «Kʼalal chapasik orasione, mu me jechuk xapasik kʼuchaʼal tspasik li jfariseoetike. Yuʼun tsnopik ti jaʼ to ch-aʼibatik yuʼun Dios mi jal tajek tspasik orasione, pe taje mu meleluk. Jaʼ yuʼun, kʼalal chapas orasione, mu persauk xaʼi li yantike, yuʼun jaʼ noʼox voʼot xanaʼ xchiʼuk li Jeovae. Jech xtok, mu jaʼuk xachaʼalilan li kʼusi avaloj xae. Yuʼun li Jeovae tskʼan ti jaʼuk xavalbe ti kʼu yelan chavaʼi aba ta melele».

Li Jesuse xi to laj yalbe skʼoplal ti kʼu yelan skʼan pasel li orasione: «Jtotik ta vinajel, akʼo yichʼ chʼultajesel li abie. Akʼo taluk li Ajvalilal avuʼune, akʼo kʼotuk ta pasel avuʼun li kʼusi tskʼan avoʼonton ta sba balumil jech kʼuchaʼal ta vinajele». Li Jesuse laj to yal ti xuʼ jkʼanbetik Jeova ti akʼo yakʼ jveʼeltik jujun kʼakʼale, ti akʼo spasbutik pertone xchiʼuk yan kʼusitik ti chtun kuʼuntike.

Xi laj yal xtoke: «Mu xavikta aba ta spasel orasion, oyuk kʼusitik lek xakʼanbe Jeova ti jaʼ Atote. Yuʼun skotol li totiletike oy ta yoʼonton chakʼbe xnichʼnabik li kʼusitik lekike. Mi chkʼanbat jpʼejuk pan yuʼun li xnichʼone, ¿mi ton van chakʼbe? Mi chkʼanbat jkotuk choye, ¿mi chon van chakʼbe?».

Li Jesuse laj to yalbe skʼoplal li kʼusitik chakʼ jchantik taje, yuʼun xi laj yale: «Mi lek li matanaletik xanaʼ xavakʼbeik li anichʼnabike, ¡buuk xa jech tspas li Jtotik te oy ta vinajele, yuʼun chakʼbutik li xchʼul espiritue! Li kʼusi skʼan xapase jaʼ ti xakʼanbee». ¿Mi chapas li kʼusi laj yal Jesuse? ¿Kʼusi chakʼanbe ta orasion li Jeovae?