Chanav ta sba nab li Jesuse

Li Jesuse la xpoxta li buchʼutik ipike xchiʼuk la xchaʼkuxes li animaetike. Pe maʼuk noʼox, yuʼun spas yuʼun ta mantal xtok li voʼ xchiʼuk li ikʼe. Kʼalal laj xa ox yoʼonton ta spasel orasion ta vits li Jesuse, la skʼel batel li Nab Galileae, vaʼun laj yil ti likem tsatsal ikʼaloʼ li ta nabe. Li yajtakboltake yakal chlechuik li svarkoike, pe mu xanav batel ta skoj ti ta yelovalik chtal li tsatsal ikʼe. Jaʼ yuʼun, li Jesuse yal tal li ta vitse xchiʼuk lik xanavuk batel ta sba nab sventa xkʼot li ta varkoe. Kʼalal laj yilik li jtakboletik ti oy buchʼu yakal chanav talele, xiʼik tajek. Pe xi laj yal li Jesuse: «Voʼonun, mu xaxiʼik».

Xi laj yal li Pedroe: «Kajval, mi voʼot ta melele, albun ti akʼo xixanav talel ti bu oyote». Vaʼun, li Jesuse xi laj yale: «¡La’!». Jech oxal, li Pedroe yal li ta varkoe xchiʼuk lik xanavuk batel ta sba nab ti bu oy li Jesuse. Pe kʼalal chnopaj xa batel ta stojolal li Jesuse, laj yil ti xjumumet tajek li tsatsal ikʼaloʼe, vaʼun xiʼ tajek. Kʼalal laj yaʼi ti yakal xa ox ch-och yalel ta voʼe, xi lik avanuke: «¡Koltaun, Kajval!». Li Jesuse la stsakbe li skʼobe xchiʼuk xi laj yalbee: «¿Kʼu yuʼun chibaj avoʼonton? ¿Mi yuʼun muʼyuk xchʼunel avoʼonton?».

Kʼalal muyik xa ox ta varko li Jesus xchiʼuk Pedroe, paj li tsatsal ikʼe. ¿Mi xnop avuʼun yaʼel ti kʼu yelan laj yaʼi sbaik li jtakboletike? Xi laj yalike: «¡Ta batsʼi melel, voʼot Xnichʼonot li Diose!».

Taje maʼuk noʼox sba velta jech la spas li Jesuse. Jun velta kʼalal jaʼo te tikʼilik batel ta varko sventa xjelavik ta jot nab xchiʼuk li yajtakboltake, li Jesuse och svayel, vaʼun jaʼo lik jun tsatsal ikʼ. Li nabe tsots lik syukʼilan li varkoe xchiʼuk lik nojuk ta voʼ. Jaʼ yuʼun, li jtakboletike bat stijik xchiʼuk xi laj yalbeike: «¡Jchanubtasvanej, chichamkutik xa! ¡Koltaunkutik!». Vaʼun, lik li Jesuse xchiʼuk xi laj yalbe li nabe: «¡Pajan! ¡Tsʼijlan!». Vaʼun, paj li ikʼ xchiʼuk li nabe, ta tsʼakale xi la sjakʼbe yajtakboltak li Jesuse: «¿Mi yuʼun chʼabal xchʼunel avoʼontonik?». Jaʼ yuʼun, xi lik yalbe sbaik li jtakboletike: «Spas yuʼun ta mantal li ikʼ xchiʼuk li nabe xchiʼuk chchʼunbat». Li jtakboletike laj yakʼik venta ti skʼan spat yoʼontonik ta stojolal li Jesuse, yuʼun mi jech tspasike, muʼyuk kʼusi chiʼtaik-o.