Laj yakʼ sba ta ilel Jesus ta stojolal jtsakchoyetik

Kʼalal echʼ xa ox kʼuuk sjalil ti laj yakʼ sba ta ilel ta stojolal yajtakboltak li Jesuse, li Pedroe bat stsak choy ta nab Galilea, vaʼun bat chiʼinatuk yuʼun Tomas, Santiago, Juan xchiʼuk li yan jchankʼopetike. Pe li vaʼ akʼobale, mi jkotuk choy la staik ta tsakel.

Kʼalal sakub xa ox osile, te vaʼal laj yilik jun vinik ta tiʼ nab, vaʼun xi jakʼbatike: «¿Mi oy xa la atsakik jkotuk choy?». Xi la stakʼike: «Muʼyuk». Vaʼun, li vinike xi laj yale: «Jipik yalel li anutiʼik sventa tsakob choy ta jot xokon varko li ta abatsʼikʼobike». Jaʼ yuʼun, la sjipik yalel li snutiʼike, vaʼun mu xa xnit lokʼel yuʼunik, yuʼun noj ta epal choy. Vaʼun, li Juane jaʼ to laj yil ti jaʼ li Jesuse xchiʼuk xi laj yale: «¡Jaʼ li Kajvaltike!». Jaʼ yuʼun, li Pedroe la sjip sba yalel ta anil li ta varkoe xchiʼuk nuxinaj batel sventa xbat skʼel li Jesuse. Jaʼuk li yan jchankʼopetike ta varko batik ti bu oy li Jesuse.

Kʼalal kʼotik ta tiʼ nabe, laj yilik ti te tsanbil kʼokʼe. Li ta sba kʼokʼe te kajal choy xchiʼuk pan. Jaʼ yuʼun, li Jesuse laj yalanbe ti akʼo yichʼik tal yan choyetik sventa smeltsane. Vaʼun, li Jesuse xi laj yalbe li yajchankʼoptake: «Laʼ veʼanik».

Kʼalal laj yoʼontonik ta veʼele, xi la sjakʼbe Pedro li Jesuse: «¿Mi akʼanojun tajek ti jaʼ mu sta li choyetik liʼe?». Xi la stakʼ li Pedroe: «Jkʼanojot, Kajval, anaʼoj ti jkʼanojote». Xi albat yuʼun li Jesuse: «Makʼlino li jchʼiom chijtake». Xi laj yal yan velta li Jesuse: «Pedro, ¿mi akʼanojun?». Xi la stakʼ li Pedroe: «Jkʼanojot, Kajval, anaʼoj ti jkʼanojote». Pe xi albate: «Chabio li kuni chijtake». Kʼalal la sjakʼ ta yoxibal velta li Jesuse, li Pedroe lik yat tajek yoʼonton xchiʼuk xi la stakʼe: «Kajval, anaʼoj skotol li kʼusitike, anaʼoj lek ti jkʼanojote». Xi albat yuʼun li Jesuse: «Makʼlino li kuni chijtake». Xi to albate: «Tsʼakliun-o batel».