Sut ta vinajel li Jesuse

Li Jesus xchiʼuk yajchankʼoptake te la stsob sbaik ta Galilea, vaʼun li Jesuse xi laj yalanbe mantal ti toj tsots skʼoplale: «Batanik, bat pasik ta jchankʼop li krixchanoetik ta skotol jteklumetike, chanubtasik ta xchʼunel skotol li kʼusitik laj kalboxuke xchiʼuk akʼbeik yichʼ voʼ». Xchiʼuk xi to albatike: «Vuleso me ta ajolik ti te jchiʼinoxuk-o skotol kʼakʼale».

Kʼalal chaʼkuxiem xa ox li Jesuse, laj yakʼ sba ta ilel ta sienal yajchankʼoptak ta Galilea xchiʼuk ta Jerusalen. Oy to ep kʼusitik laj yakʼ ta chanel xchiʼuk ep to skʼelobil juʼelal la spas, yuʼun 40 kʼakʼal liʼ to kom ta balumile. Ta slajebe, li Jesuse la stsob sba xchiʼuk yajtakboltak ta slajeb velta li ta Vits Olivatike. Jech xtok, xi onoʼox yalojbe yajtakboltak li Jesuse: «Liʼ me oyanik li ta Jerusalene jaʼ to mi laj avichʼik akʼbel li kʼusi yaloj chakʼboxuk li Jtote».

Li jtakboletike muʼyuk bu xaʼibeik smelolal li kʼusi laj yal Jesuse, jaʼ yuʼun xi la sjakʼike: «¿Mi yuʼun cha-och xa ta ajvalil ta Israel avie?». Xi la stakʼ li Jesuse: «Li Jeovae maʼuk to yorail chil ti chi-och ta ajvalil avie, pe jutuk xa skʼan xavichʼ atsatsalik kʼalal mi vul ta atojolalik li chʼul espiritue xchiʼuk chakʼotik ta jtestigotak, jaʼ yuʼun bat cholik mantal ta Jerusalen, ta Judea, ta Samaria xchiʼuk kʼalal to ta namal balumil».

Vaʼun, li Jesuse lik muyuk batel ta vinajel xchiʼuk mak batel ta tok. Li jchankʼopetike te skʼelojik-o batel ta vinajel li Jesuse, vaʼun sakchʼay batel.

Ta tsʼakale, sutik batel ta Jerusalen li jchankʼopetike, yuʼun te toʼox oyik ta Vits Olivatik. Ti batik ta Jerusalene jaʼ ta skoj ti nopem onoʼox xaʼiik ti te tstsob sbaik xchiʼuk tspasik orasion ta xchaʼkojal jpʼej nae. Jech xtok, li jchankʼopetike smalaojik ti x-akʼbatik yan beiltaseletik yuʼun li Jesuse.