Laj yichʼik chʼul espiritu li jchankʼopetike

Lokʼ xa ox lajuneb kʼakʼal smuyel batel ta vinajel li Jesuse. Vaʼun, li yajchankʼoptake laj yichʼik li chʼul espiritue. Taje jaʼo kʼot ta pasel ta Skʼinal Pentekostes ta sjabilal 33, epal krixchanoetik ti likemik tal ta yantik lumetike kʼotik ta Jerusalen sventa spasik li Kʼin taje. Xchiʼuk te van 120 yajchankʼoptak Jesus te oyik ta xchaʼkojal jpʼej na. Vaʼun, ta anil noʼox oy kʼusi labal sba kʼot ta pasel. Yuʼun oy kʼusi yal tal ta sjolik li jchankʼopetik ti xkoʼolaj kʼuchaʼal ta leb kʼokʼe, vaʼun te lik kʼopojikuk ta jeltos kʼopetik. Jech xtok, laj yaʼiik ti tsots tajek xjumumet ikʼ li ta spʼejel nae.

Kʼalal laj yaʼiik li buchʼutik likemik tal ta yan lum ti oy kʼusi tsots yakal chnike, bat skʼelik ta anil li kʼusi kʼot ta pasel li ta nae. Vaʼun, chʼayal to kʼot yoʼontonik kʼalal laj yaʼiik ti yakal chkʼopojik ta jeltos kʼop li jchankʼopetike. Jaʼ yuʼun, xi laj yalike: «Li krixchanoetik liʼe jaʼik jgalileaetik. ¿Kʼuxi xa noʼox ti yakal chkʼopojik ta jkʼoptike?».

Jaʼ yuʼun, li Pedro xchiʼuk li yan jtakboletike la svaʼan sbaik ta yeloval skotol li krixchanoetike. Vaʼun, xi laj yal li Pedroe: «Voʼoxuk laj avakʼik ta milel li Jesuse, pe li Jeovae laj xa xchaʼkuxes xchiʼuk laj yakʼ chotluk ta sbatsʼikʼob. Jech xtok, laj yakʼbunkutik li xchʼul espiritu jech kʼuchaʼal yaloj onoʼoxe, jaʼ yuʼun laj avaʼiik xchiʼuk laj avilik li skʼelobil juʼelal ta jpaskutike».

Vaʼun, kʼalal laj yaʼiik li kʼusitik taje, solel kʼot ta yoʼontonik, jaʼ yuʼun xi la sjakʼbeik li Pedroe: «¿Kʼusi skʼan jpaskutik?». Vaʼun, xi takʼbatike: «Suteso avoʼontonik xchiʼuk ichʼik voʼ ta sbi li Jesukristoe, vaʼun chavichʼik ta moton li chʼul espiritue». Jaʼ yuʼun, te van oxmil krixchanoetik laj yichʼik voʼ li jun kʼakʼal taje. Ta skoj taje, lik epajuk tajek li jchankʼopetik ta Jerusalene, jech xtok li jtakboletike la slikesik achʼ tsobobbailetik, jaʼ koliyal ti koltaatik yuʼun li chʼul espiritue. Jaʼ jech laj yakʼik ta chanel li kʼusi chanubtasvan komel li Jesuse.