Muʼyuk kʼusi pajtsanatik-o

Oy jun vinik ti mu xanave te chchoti skotol kʼakʼal ta stiʼ templo sventa skʼan limoxna. Jun mal kʼakʼale, laj yil ti te kʼotik ta templo li Pedro xchiʼuk Juane, vaʼun xi laj yalanbee: «Avokolikuk, akʼbeikun takʼin». Xi la stakʼ li Pedroe: «Oy kʼusi ta xkakʼbot ti mas to ep sbalil ti jaʼ mu jechuk li takʼine. Ta sbi Jesus chkalbot, ¡likan xchiʼuk xanavan!». Vaʼun, li Pedroe la snit likel li vinike xchiʼuk lik xanavuk. Epal krixchanoetik pasik ta yajtsʼaklom Kristo kʼalal laj yilik li skʼelobil juʼelal taje.

Pe li paleetik xchiʼuk jsaduseoetike ilinik tajek. Jech oxal, la stsakik li jtakboletike xchiʼuk laj yikʼik batel ta stojolal Sanedrin, vaʼun xi jakʼbatike: «¿Buchʼu laj yakʼboxuk li juʼelal sventa xa poxtaik li vinik taje?». Vaʼun, xi la stakʼ li Pedroe: «Jaʼ laj yakʼ juʼelkutik li Jesukristo ti voʼoxuk la amilike». Pe xi tsots laj yalik li jnitvanej ta relijione: «¡Mu xa xavalbeik skʼoplal li Jesuse!». Vaʼun, xi takʼavik li jtakboletike: «Muʼyuk bu chipajkutik, yuʼun skʼan xkalbekutik-o batel skʼoplal».

Kʼalal laj yichʼik koltael batel li Pedro xchiʼuk Juane, batik ta stojolal li yantik jchankʼopetike xchiʼuk laj yalbeik li kʼusi kʼot ta stojolalike. Vaʼun, koʼol la spasik orasion, xi laj yalbeik li Jeovae: «Avokoluk, koltaunkutik sventa oyuk stsatsal koʼontonkutik ta yalel batel akʼoplal». Jaʼ yuʼun, li Jeovae laj yakʼanbe chʼul espiritu li jtakboletik sventa xcholik batel mantal xchiʼuk xpoxtavanike. Vaʼun, epal krixchano pasik ta yajtsʼaklom Kristo. Pe li jsaduseoetike ilinik tajek, vaʼun la stikʼik ta chukel li jtakboletike. Pe li ta akʼobaltik taje, li Jeovae la stak talel yaj-anjel sventa tsjambe stiʼ li chukinabe, vaʼun xi laj yal li anjele: «Batanik, bat vaʼano abaik ta templo xchiʼuk cholbeik mantal li krixchanoetik teye».

Ta sob yokʼomale, oy buchʼu xi kʼot yal li ta Sanedrine: «Bajal lek la jtakutik li chukinabe, pe muʼyuk te la jtakutik li viniketik ti la atikʼik ta chukele, yuʼun te xa yakal chchanubtasik krixchanoetik li ta temploe». Jaʼ yuʼun, ay yichʼik tsakel tal yan velta li jtakboletike xchiʼuk ikʼatik batel ta stojolal li Sanedrine. Vaʼun, xi albatik yuʼun li bankilal palee: «¡Jamal laj avichʼik albel ti mu xa xachanubtasvanik-o ta sventa li Jesuse!». Pe xi la stakʼ li Pedroe: «Jaʼ skʼan ta jchʼunbekutik smantal kʼuchaʼal ajvalil li Diose, maʼuk li krixchanoetike».

Li jchanubtasvanejetik ta relijione solel ilinik tajek ta stojolalik li jtakboletike, jaʼ yuʼun tskʼan tsmilik. Vaʼun, vaʼi jun jfariseo ti Gamaliel sbie xchiʼuk xi laj yale: «¡Kʼelo me abaik, yuʼun xuʼ van chiʼinbilik yuʼun Dios li viniketik liʼe! ¿Mi yuʼun chakʼan chatsakik ta kʼop li Diose?». Vaʼun, li jchanubtasvanejetik ta relijione la xchʼunik. Jaʼ yuʼun, la skoltaik batel li jtakboletike akʼo mi baʼyel xa onoʼox laj yichʼik majel xchiʼuk albatik ti mu xa xcholik mantale. Akʼo mi jech, muʼyuk bu pajik li jtakboletike. Yuʼun ta sjunul yoʼontonik la xcholik-o batel mantal ta templo xchiʼuk ta jujupʼej naetik.