Laj yichʼ chʼul espiritu li Kornelioe

Li ta Sesareae oy jun bankilal soltaro yuʼun jromaetik ti jaʼ sbi Kornelioe. Akʼo mi maʼuk juda vinik li stuke, pe ichʼbil ta mukʼ yuʼun li judaetike. Jaʼ jun vinik ti toj lek yoʼontone, yuʼun lek tajek chaʼi skoltael li buchʼutik abol sbaike, skotol ora tspas orasion, yuʼun xchʼunoj ti kuxul li Jeovae. Jun veltae, oy jun anjel laj yakʼ sba ta ilel ta stojolal li Kornelioe, vaʼun xi albate: «Li Diose laj xa yaʼibot li a-orasione. Tako batel aviniktak li ta lum Jope ti bu oy li Pedroe xchiʼuk akʼo yalbeik ti akʼo xtal skʼelote». Jaʼ yuʼun, li Kornelioe ta ora noʼox la stak batel oxib sviniktak ta Jope ti te van 50 kilometrouk snamale.

Kʼalal te toʼox oy ta Jope li Pedroe, oy kʼusi akʼbat yil, yuʼun laj yil chonbolometik ti mu xuʼ stiʼik li judaetike. Ta tsʼakale, laj yaʼi jun yechʼomal eil ti albat ti akʼo stiʼ li chonbolometik laj yile. Pe xi laj yal li Pedroe: «Muʼyuk ta jtiʼ li kʼusi ibal sbae». Xi laj yal li yechʼomal eile: «Mu xaval ti muʼyuk lek li kʼusitik slekubtasoj xa Diose». Xchiʼuk xi to laj yal li yechʼomal eile: «Te oy oxvoʼ viniketik ta stiʼ ana ti yakal tsaʼikote, bat kʼelo». Vaʼun, li Pedroe bat skʼel xchiʼuk la sjakʼbe ti kʼu yuʼun te kʼotike, xi la stakʼik li viniketike: «La stakunkutik tal Kornelio ti jaʼ jun bankilal soltaro yuʼun jromaetike, yuʼun tskʼan ti xabat ta sna ti te oy ta Sesareae». Vaʼun, li Pedroe laj yalbe ti akʼo te xkomik ta sna li vaʼ akʼobale. Ta yokʼomale, li Pedroe bat xchiʼuk li oxvoʼ viniketik li ta Sesareae. Jech xtok, bat chiʼinatuk yuʼun jlom ermanoetik ti te nakalik ta Jopee.

Kʼalal kʼot li Pedroe, li Kornelioe la skejan sba ta anil ta stojolal, pe xi laj yal li Pedroe: «Likan, yuʼun krixchanoun ek jech kʼuchaʼal voʼote. Li voʼone judaun, pe jaʼ la stakun tal Dios sventa xtal jkʼelot akʼo mi mu stakʼ jchiʼinkutik junuk krixchano ti yan-o slumale. Jaʼ yuʼun, avokoluk, albun ti kʼu yuʼun la atakun ta ikʼele».

Vaʼun, xi albat yuʼun Kornelio li Pedroe: «Leʼ xa ta xchanibal kʼakʼale, kʼalal yakal ta jpas orasione, laj yalbun jun anjel ti akʼo jtakot ta ikʼele. Jaʼ yuʼun, chanubtasunkutik ta sventa li kʼusi tskʼan Jeovae». Pe xi la stakʼ li Pedroe: «Ta melel, xkaʼibe xa smelolal ti mu snaʼ xtʼujvan li Diose, yuʼun lek chil skotol krixchanoetik jaʼ noʼox mi ch-ichʼat ta mukʼe». Jaʼ yuʼun, li Pedroe lik yalbe skʼoplal li kʼusi la spas Jesuse. Vaʼun, li Kornelio xchiʼuk li buchʼutik te xchiʼuke laj yichʼik chʼul espiritu, vaʼun laj yichʼik voʼ.