Pas ta yajtsʼaklom Kristo jun jchabichukinab

Li ta Filipose oy jun kiara ti ochem pukuj ta yoʼontone. Li pukuj taje chakʼbe snaʼ kʼusi chkʼot ta pasel ta tsʼakal. Jaʼ yuʼun, ep tajek tspas kanal takʼin sventa xakʼbe li yajvale. Kʼalal kʼotik ta Filipos li Pablo xchiʼuk Silase, li tsebe te xtijet batel ta spatik, oy jayibuk kʼakʼal jech la spas. Li pukuje tspas ta mantal li kiara sventa xiuk tsots x-avane: «¡Jaʼ smosotak Mukʼul Dios li viniketik liʼe!». Jech oxal, li Pabloe xi laj yalbe li pukuje: «¡Ta sbi Jesukristo chkalbot mantal ti akʼo xalokʼ ta stojolal li tsebe!». Vaʼun, lokʼ li pukuje.

Kʼalal laj yil li yajvaltak kiara ti chʼabal xa tspasik kanal takʼine, ilinik ta jyalel. Jaʼ yuʼun, la stsakik li Pablo xchiʼuk Silase, vaʼun jochatik batel ta stojolal ajvaliletik li ta jteklume, xi kʼot yalik li yajvaltak kiarae: «Li viniketik liʼe mu xchʼunik li mantale xchiʼuk yakal tajek tsokbeik yoʼonton li krixchanoetike». Vaʼun, li ajvaliletike laj yalik mantal ti akʼo smajik xchiʼuk stikʼik ta chukel li Pablo xchiʼuk Silase. Jaʼ yuʼun, li jchabichukinabe la stikʼan ochel ta yutil to chukinab ti bu ikʼ tajeke xchiʼuk la slatsʼanbe yokik ta jun latsʼob teʼ.

Pe li Pablo xchiʼuk Silase lik skʼejintaik Jeova, te yakal chaʼiik li yantik jchukeletike. Li ta oʼlol akʼobale, ta anil noʼox tal tsatsal nikel, jech oxal nik li chukinabe xchiʼuk jam skotol li stiʼtake. Jech xtok, sol yalel skadenail li jchukeletike xchiʼuk jam li latsʼob teʼ ti latsʼal-o yokike. Vaʼun, li jchabichukinabe och batel ta anil kʼalal to ta yutil, kʼalal laj yil ti jamajtik li stiʼtak chukinabe, la snop ti jatavemik xa batel li jchukeletike, jaʼ yuʼun la stsak jun espada sventa smil-o sba.

Kʼalal laj yil Pablo ti tsmil xa ox sba li jchabichukinabe, xi avane: «¡Mu xamil aba, yuʼun liʼ oyunkutik jkotolkutike!». Vaʼun, li jchabichukinabe bat ta anil ti bu oyik li Pablo xchiʼuk Silase, la skejan sba ta stojolalik xchiʼuk xi la sjakʼe: «¿Kʼusi skʼan jpas sventa xikole?». Xi takʼbate: «Chʼunik li Kajvaltik Jesuse, vaʼun chakol xchiʼuk li buchʼutik te ta anae». Jaʼ yuʼun, li Pablo xchiʼuk Silase la xchanubtasik ta Skʼop Dios li jchabichukinabe xchiʼuk skotol li buchʼutik te ta snae, vaʼun laj yichʼik voʼ.