Li ‹takin baketik› xchiʼuk li chaʼvoʼ testigoe ¿Kʼuxi te snitojbe sba skʼoplal?

LI TA sjabilal 1919, kʼot ta pasel li chib albil kʼop ti te snitojbe sba skʼoplale: li takin baketik xchiʼuk li chaʼvoʼ testigoe. Li kʼusi akʼbat yil Esekiel ta sventa li takin baketike jaʼ skʼoplal epal sigloetik ti jaʼ to kʼot ta tsutsel kʼalal chaʼkuxi epal yajtuneltak Diose (Esek. 37:2-4; Apok. 11:1-3, 7-13). Li albil kʼop ta sventa li chaʼvoʼ testigoe jaʼ chalbe skʼoplal li kʼusitik kʼot ta pasel li ta slajebaltik 1914 kʼalal to ta slikebaltik 1919 ti jaʼo chaʼkuxi li uni jtsop yajtuneltak Diose. Li chib albil kʼopetik ti kʼotemik ta pasel avi eke maʼuk skʼan xal batsʼi chaʼkuxesel. Li albil kʼop taje kʼot ta pasel ta sjabilal 1919, yuʼun li Jeovae la spoj lokʼel ta skʼob Mukʼta Babilonia li yajtuneltak ti tʼujbil chbatik ta vinajele ti xkoʼolaj lik vaʼiikuke, vaʼun laj yichʼik tsobel li ta tsobobbail ti lekubtasbil xae (Esek. 37:10).

Jelajtik tajek kʼu yelan kʼot ta pasel li chib albil kʼopetik taje. Li takin baketike jaʼ skʼoplal skotol li buchʼutik tʼujbil chbatik ta vinajel ti kuxiik li vaʼ kʼakʼale. Li chaʼvoʼ testigoe jaʼ skʼoplal junantik li buchʼutik tʼujbil chbatik ta vinajel li vaʼ kʼakʼale ti jaʼ li buchʼutik la sbeiltasik li organisasione xchiʼuk ti kʼotik ta «tukʼil xchiʼuk pʼijil mosoil» (Mat. 24:45; Apok. 11:6).a

«Stenlejaltik ti bu busul baketike» (Esek. 37:1)

1. ECHʼEM XA OX LI SJABILAL 100 t.J.

   Kʼalal echʼem xa ox li sjabilal siene: Kʼalal jaʼo chamem xkaltik li stsobobbail yajtsʼaklomtak Kristoe, jaʼo te busul baketik li ta stenlejaltike

2. SLIKEBALTIK 1919

   1919: Li takin baketike xkoʼolaj ti lik kuxiikuk. Taje jaʼo kʼalal la spoj lokʼel ta skʼob Mukʼta Babilonia skotol li yajtuneltak Jeova ti tʼujbil chbatik ta vinajele, vaʼun laj yichʼik tsobel li ta tsobobbail ti lekubtasbil xae

Chaʼvoʼ testigo (Apok. 11:3)

1. SLAJEBALTIK 1914

   Slapojik «chʼixal kʼuʼil» chcholik mantal

   1914: Li chaʼvoʼ testigoe oxib jabil xchiʼuk oʼlol la slapik «chʼixal kʼuʼil» kʼalal la xcholik mantale. Kʼalal laj li vaʼ sjalile, xkoʼolaj kʼuchaʼal laj yichʼik milel

2. Xkoʼolaj kʼuchaʼal chamik

3. SLIKEBALTIK 1919

   1919: Chchaʼkuxi li chaʼvoʼ testigoe. Taje jaʼo kʼalal laj yichʼik biiltasel ta «tukʼil xchiʼuk pʼijil mosoil» li uni jtsop ermanoetik ti tʼujbil chbatik ta vinajel ti la sbeiltasik li organisasione