REKUADRO 19B
¡Lik mukʼibuk yok li ukʼume!
Li Esekiele te skʼeloj batel ti bu chbein batel li voʼ ti te chlokʼ talel ta sna Jeovae. Ta kʼunkʼun chmuy yok li ukʼume. ¡Yuʼun li bikʼit ukʼume pas ta mukʼta ukʼum! Laj yil ti lik chʼiuk jeltos teʼetik ta stiʼiltak ukʼume, ti chakʼ sate xchiʼuk ti chpoxtavan li yanale. ¿Kʼusi smelolal skotol taje?
Li ukʼum ti chakʼ bendisione
TA VOʼNE Li judaetik ti sut ta slumalik xchiʼuk ti la skolta sbaik sventa xchaʼta yav li melel yichʼel ta mukʼ Diose akʼbatik bendision yuʼun li Jeovae
LI AVIE Li ta 1919, la xchaʼta yav li melel yichʼel ta mukʼ Diose, ta skoj taje li tukʼil yajtuneltak Jeovae lik yichʼik akʼbel bendision ta mantal ti muʼyuk jech ilbil-oe
TA TSʼAKAL Kʼalal mi echʼ xa ox li Armajedone, li Jeovae chakʼ talel bendisionetik ta mantal xchiʼuk yan bendisionetik
Voʼ ti chakʼ kuxlejale
TA VOʼNE Li Jeovae ta sjunul yoʼonton chakʼbe bendision li steklumal ti tukʼ chakʼ sbae, jaʼ yuʼun oy yuʼunik li kʼusitik chtun yuʼunik ta mantal akʼo mi epajik
LI AVIE Yantik x-epaj batel li kʼusi yakal ta jkʼupintik avi ti xkoʼolaj ta paraisoe xchiʼuk ti likem tal ta stojolal Jeovae, yuʼun sjelojbe xkuxlejal xchiʼuk yakʼojbe bendision ta mantal epal krixchanoetik ti yantik x-epaj batele
TA TSʼAKAL Li Jeovae chakʼbe bendision li buchʼutik chchaʼkuxiik tale xchiʼuk li buchʼutik kuxul chjelavik ta Armajedone
Teʼetik ti stakʼ lobel sate xchiʼuk ti chpoxtavane
TA VOʼNE Li Jeovae la smakʼlin ta mantal li yajtuneltak ti tukʼ laj yakʼ sbaike, taje koltaatik sventa chʼambiluk xil Jeova ti kʼu yelan chichʼik ta mukʼe. Jech xtok, tskolta sventa mu xa stikʼ sbaik ta yichʼel ta mukʼ santoetik xchiʼuk skotol li kʼusi te smakojbe skʼoplal li jecheʼ relijione
LI AVIE Epal krixchanoetik yakal tstabeik sbalil li epal veʼlil ta mantal chkichʼtike, yuʼun jaʼ chkoltaatik sventa mu xchanbeik stalelal li chopol krixchanoetike
TA TSʼAKAL Li Kristo xchiʼuk li 144 mil ti jmoj ch-ajvalilajike tskoltaik li krixchanoetik sventa xtukʼibik batel xchiʼuk ti skʼupinik li kuxlejal ti muʼyuk xa ch-ipajik ta sbatel osile