XCHANOBIL 15
¿Buchʼu jaʼ li Jesuse?
Jutuk mu skotol li krixchanoetik ta spʼejel balumile yaʼiojbeik skʼoplal li Jesuse. Pe mu xojtikinik lek xchiʼuk jelel tajek kʼusi xchʼunojik ta stojolal. ¿Kʼusi chal Vivlia ta stojolal li Jesuse?
1. ¿Buchʼu jaʼ li Jesuse?
Li Jesuse jaʼ jun tsatsal anjel ti te nakal ta vinajele, «jaʼ baʼyel laj yichʼ pasel [yuʼun Jeova] ta skotol li kʼusitike» (Kolosenses 1:15). Li Vivliae xi chalbe skʼoplal li Jesuse: «Li jun noʼox Xnichʼon» Diose. Ti jech chkaltike jaʼ ta skoj ti jaʼ pasat yuʼun stuk li Jeovae (Juan 3:16). Li Jesuse koʼol abtej xchiʼuk Stot sventa spas skotol li kʼusitike (kʼelo Proverbios 8:30). Lek-o tajek xil sbaik xchiʼuk li Stote. Li Jesuse jaʼ «li Kʼope», jaʼ xkaltik, li yajkʼopojel Diose. Kʼalal chal mantal o mi chal junuk aʼyej li Stote, jaʼ xa chalbe li yantike (Juan 1:14).
2. ¿Kʼu yuʼun tal ta balumil li Jesuse?
Leʼ xa van ta chaʼmil jabile, oy kʼusi toj labal sba la spas li Jeovae. La stunes xchʼul espiritu sventa sjelubtasbe xkuxlejal Jesus ta yalajeb jun tojol tseb ti Maria sbie. Ta skoj taje, vokʼ kʼuchaʼal jun krixchano (kʼelo Lukas 1:34, 35). Tal ta balumil sventa xkʼot ta Kristo o Mesias xchiʼuk sventa spoj ta mulil li krixchanoetike.a Kʼot ta pasel skotol li kʼusi yaloj xa onoʼox Vivlia ta sventa li Mesiase. Taje jaʼ koltaatik-o krixchanoetik yoʼ snaʼik buchʼu jaʼ li Kristoe, «li Xnichʼon kuxul Diose» (Mateo 16:16).
3. ¿Bu oy avi li Jesuse?
Kʼalal laj yichʼ milel li Jesuse, laj yichʼ chaʼkuxesel kʼuchaʼal jun anjel, vaʼun sut batel ta vinajel. Te une, «li Diose laj yakʼbe tsots yabtel» (Filipenses 2:9). Avie, yichʼoj xa tsots yabtel li Jesuse, pe jaʼ mas tsots yip li Jeovae.
JCHANTIK TO BATEL MAS
Jkʼeltik batel buchʼu jaʼ ta melel li Jesuse xchiʼuk ti kʼu yuʼun tsots skʼoplal ti xkojtikintik leke.
4. Li Jesuse maʼuk li Dios ti skotol xuʼ yuʼune
Akʼo mi jaʼ jun tsatsal anjel ti te oy ta vinajel li Jesuse, li Vivliae chal ti chchʼunbe smantal li Jeovae, ti jaʼ Stot xchiʼuk Sdiose. ¿Kʼu yuʼun ti jech chkaltike? Li Vivliae chal kʼusi jelel-o Jesus xchiʼuk li Dios ti skotol xuʼ yuʼune. Sventa xavaʼibe smelolale, kʼelik li VIDEOE. Li tekstoetik chtale chakʼ kiltik kʼusi jelelik-o li Jeova xchiʼuk Jesuse.
Kʼelik ta jujun li tekstoe xchiʼuk albeik skʼoplal li sjakʼobiltak liʼe:
Kʼelik Lukas 1:30-32.
Jech kʼuchaʼal laj yal li anjele, ¿kʼusi jelelik-o Jesus xchiʼuk Jeova ti jaʼ «li Buchʼu toj toyol oye»?
Kʼelik Mateo 3:16, 17.
Kʼalal laj yichʼ voʼ li Jesuse, ¿kʼusi laj yal li yechʼomal eil ti lik tal ta vinajele?
¿Buchʼu van yechʼomal ye xanaʼ?
Kʼelik Juan 14:28.
¿Buchʼu ti mas mukʼ skʼoplale: mi jaʼ li Totile o jaʼ li Nichʼonile?
Li Jesuse laj yal ti jaʼ Stot li Jeovae, ¿kʼusi chakʼ jchantik taje?
Kʼelik Juan 12:49.
¿Mi la snop Jesus ti koʼolik xchiʼuk li Stote? Voʼote, ¿kʼusi chanop?
5. Vinaj ti jaʼ Mesias li Jesuse
Ep xa onoʼox kʼusitik albil ta Vivlia ti jaʼ tskolta krixchanoetik sventa snaʼik buchʼu jaʼ li Mesiase, jaʼ xkaltik, li buchʼu tʼujbil yuʼun Dios sventa skolta li krixchanoetike. Kʼelik li VIDEOE, vaʼun te chavakʼik venta ti kʼalal ay ta balumil li Jesuse, kʼot ta stojolal li kʼusitik yaloj xa onoʼox li Vivliae.
Kʼelik li kʼusi yaloj xa onoʼox Vivliae xchiʼuk albeik skʼoplal li sjakʼobiltak liʼe:
Kʼelik Mikeas 5:2 sventa xanaʼik bu xa onoʼox albil chvokʼ li Mesiase.b
¿Mi te onoʼox vokʼ Jesus ti bu albil xa onoʼoxe? (Mateo 2:1).
Kʼelik Salmo 34:20 xchiʼuk Sakarias 12:10 sventa xavilik li kʼusi yaloj xa onoʼox Vivlia ti kʼu yelan chcham li Mesiase.
¿Mi kʼot van ta pasel taje? (Juan 19:33-37).
¿Mi oy van kʼusi la spas Jesus sventa xkʼot ta pasel li kʼusi yaloj xa onoʼox Vivlia ta stojolale?
Ta skoj ti muʼyuk kʼusi la spas li Jesuse, ¿kʼusi chakʼ achan ta stojolal?
6. Ta jtabetik sbalil mi chkojtikintik li Jesuse
Li Vivliae chal ti toj tsots skʼoplal ti xkojtikintik lek li Jesuse xchiʼuk ti kʼusi akʼbat sbain yuʼun li Diose. Kʼelik Juan 14:6 xchiʼuk 17:3 xchiʼuk albeik skʼoplal li sjakʼobil liʼe:
¿Kʼu yuʼun toj tsots skʼoplal ti xkojtikintik lek li Jesuse?
Li Jesuse la sjam jbetik sventa xuʼ xkamigointik li Diose xchiʼuk laj yakʼ ta chanel li kʼusi melel ta stojolal Jeovae. Li kʼusi la spas ta jtojolaltik xtoke xuʼ jtatik-o kuxlejal sbatel osil.
JUNANTIKE XI CHALIKE: «Li stestigotak Jeovae muʼyuk xchʼunojik li Jesuse».
¿Mi jech chanop ek?
¿KʼUSI LA ACHAN?
Li Jesuse jaʼ jun tsatsal anjel ti jaʼ li Xnichʼon Diose xchiʼuk jaʼ li Mesiase.
Svulesobil ta joltik
¿Kʼu yuʼun chkaltik ti jaʼ baʼyel pasat yuʼun Dios li Jesuse?
¿Kʼusi toʼox tspas Jesus kʼalal skʼan toʼox xtal ta balumile?
¿Kʼuxi jnaʼojtik ti jaʼ Mesias li Jesuse?
XUʼ TO XAKʼEL LIʼE
Kʼelbo sprevailtak ti chakʼ ta ilel ti jaʼ Mesias li Jesuse.
«Li albil kʼopetik ta Vivliae, ¿mi chakʼ ta ilel ti jaʼ Mesias li Jesuse?» (Xuʼ te xata ta jw.org)
Li Vivliae chal ti jaʼ Xnichʼon Dios li Jesuse. Pe ¿mi jaʼ van jech chnichʼnaj Dios kʼuchaʼal li krixchanoetike? Kʼelavil.
«¿Kʼu yuʼun Xnichʼon Dios chichʼ albel li Jesuse?» (Xuʼ te xata ta jw.org)
Kʼelavil kʼu yuʼun muʼyuk chchanubtasvan Vivlia ta sventa li trinidade.
«¿Mi jaʼ Dios li Jesuse?» (Li Jkʼel-osil ta toyole, xchanobil)
Kʼelavil kʼuxi jelbat-o xkuxlejal jun ants kʼalal laj yakʼ venta li kʼusi chal Vivlia ta sventa li Jesuse.
a Li ta xchanobil 26 xchiʼuk 27, te chalbutik kʼu yuʼun skʼan spojutik li Jesuse xchiʼuk ti kʼuxi la spase.