XCHANOBIL 51
¿Kʼuxi xuʼ xmuyubaj yuʼun Jeova li jkʼopojeltike?
Kʼalal la spasutik li Jeovae, laj yakʼbutik jun kʼupil sba matanal: jaʼ ti xuʼ xijkʼopoje. ¿Mi tsots van skʼoplal chil ti kʼu yelan ta jtunestik li jmotontik taje? ¡Tsots skʼoplal chil! (Kʼelo Santiago 1:26). Vaʼun chaʼa, ¿kʼu yelan tskʼan Jeova ti akʼo jtunestike?
1. ¿Kʼuxi xuʼ jtunestik lek li jmotontike?
Xi chalbutik li Vivliae: «Jech-o xapatbe aba avoʼontonik xchiʼuk xatsatsubtasbe aba avoʼontonik ta jujuntal» (1 Tesalonisenses 5:11). ¿Mi oy buchʼu xavojtikin ti skʼan patbel yoʼontone? ¿Mi oy van kʼusi xuʼ xapas sventa junuk yoʼonton xaʼie? Xuʼ jamal xavalbe ti akʼanoje xchiʼuk albo ti oy slekil talelaltake. ¿Mi xvul ta ajol junuk teksto ti xuʼ xpatbat-o yoʼontone? Ep me tekstoetik ti xuʼ xakʼelbee. Pe teuk me ta ajol xtok ti xuʼ xpatbat-o yoʼonton o chopol-o xaʼi sba ti kʼu yelan chakʼopoje xchiʼuk li kʼusi chavalbee. Jaʼ yuʼun, ta slekiluk avoʼonton xakʼopoj xchiʼuk xlametuk noʼox (Proverbios 15:1).
2. ¿Kʼusitik mu stakʼ xkaltik?
Xi chal li Vivliae: «Mu me xlokʼ ta aveik jpʼeluk kʼop ti tsokesvane» (kʼelo Efesios 4:29). Taje jaʼ skʼan xal ti mu stakʼ xkaltik bol kʼopetik, kʼusitik kʼuxik ta aʼiel xchiʼuk ti chkakʼtik ta kʼexlal yantik sventa chopol xaʼi sba kuʼuntike. Jech xtok, muʼyuk chijloʼiltavan mi jaʼuk ta jutik mulil (kʼelo Proverbios 16:28).
3. ¿Kʼusi xuʼ skoltautik yoʼ spatuk oʼontonal li kʼusi chkaltike?
Jutuk mu skotoluk veltae, jaʼ chlokʼ ta alel kuʼuntik li kʼusi ta jnoptike xchiʼuk ti kʼu yelan chkaʼi jbatike (Lukas 6:45). Jech oxal, skʼan jnopes jbatik yoʼ jaʼuk noʼox jnoptik li kʼusitik lekike, jaʼ xkaltik, li kʼusitik tukʼe, li kʼusitik sakik skʼoplale, li kʼusitik tstij oʼontonal sventa xijkʼanvane xchiʼuk li kʼusitik sta-o kʼupil kʼoptaele (Filipenses 4:8). ¿Kʼuxi xuʼ spas kuʼuntik taje? Jaʼ ti jtʼuj lek li kʼusi ta jchʼay-o koʼontontike xchiʼuk ti jaʼ noʼox xkamigointik li buchʼutik lek stalelalike (Proverbios 13:20). Jech xtok, skʼan me jnoptik baʼyel li kʼusitik chkaltike. Jnoptik kʼu van yelan chaʼi sba kuʼuntik yantik li kʼusi chkaltike. Xi chal li Vivliae: «Kʼalal muʼyuk nopbil lek li kʼusi chichʼ alele, xkoʼolaj kʼuchaʼal sniʼ espada ti chyayijesvane, pe li yokʼ buchʼutik pʼijike chpoxtavan» (Proverbios 12:18).
JCHANTIK TO BATEL MAS
Jkʼeltik batel kʼu yelan tskʼan Jeova ti xijkʼopoje xchiʼuk ti spatbeuk yoʼonton li yantike.
4. Ichʼo apʼijil ta sventa li kʼusi chavale
Jkotoltik oy kʼusi chlokʼ ta alel kuʼuntik ti chopol-o chkaʼi jbatik yuʼun ta tsʼakale (Santiago 3:2). Kʼelik Galatas 5:22, 23 xchiʼuk albeik skʼoplal li sjakʼobiltak liʼe:
Sventa mu kʼusiuk noʼox xabusan ta alele, ¿kʼusi van talelalil skʼan xakʼanbe Jeova sventa jaʼuk skoltaote? ¿Kʼuxi xuʼ skoltaot li talelal taje?
Kʼelik 1 Korintios 15:33 xchiʼuk albeik skʼoplal li sjakʼobiltak liʼe:
¿Mi xuʼ van sokes akʼopojel li buchʼutik chachiʼine xchiʼuk li kʼusi chachʼay-o avoʼontone? ¿Kʼuxi van xuʼ sokes?
Li kʼusitik ta jpastik o ta jkʼeltike xuʼ xlekub o sok yuʼun li jkʼopojeltike
Kʼelik Eklesiastes 3:1, 7 xchiʼuk albeik skʼoplal li sjakʼobil liʼe:
¿Kʼusi van ora skʼan tsʼijil xijkom o ti jsabetik yorail ta tsʼakal sventa oyuk kʼusi xkaltike?
5. Lekuk xakʼopoj ta stojolal li yantike
¿Kʼusi xuʼ jpastik sventa mu jaʼuk xkaltik li kʼusitik kʼuxik ta aʼiele? Kʼelik li VIDEOE xchiʼuk albeik skʼoplal li sjakʼobiltak liʼe:
Li ermano ta videoe, ¿kʼu yuʼun tskʼan tsjel ti kʼu yelan chkʼopoj ta stojolal li yantike?
¿Kʼusi la spas sventa xlekub li skʼopojele?
Kʼelik Eklesiastes 7:16 xchiʼuk albeik skʼoplal li sjakʼobil liʼe:
Kʼalal chlik xa chopol kʼopojkutik ta stojolal yantike, ¿kʼusi skʼan jvules ta joltik ta anil?
Kʼelik Eklesiastes 7:21, 22 xchiʼuk albeik skʼoplal li sjakʼobiltak liʼe:
Li teksto liʼe, ¿kʼuxi xuʼ skoltaot sventa mu xakap ta anil mi oy buchʼu chopol kʼopoj ta atojolale? ¿Kʼu yuʼun ti jech chavale?
6. Ta slekiluk avoʼonton xakʼopon li avutsʼ avalale
Li Jeovae tskʼan ti ta slekil xchiʼuk ta xkʼuxul koʼontontik jkʼopontik li kutsʼ kalaltike. Kʼelik li VIDEOE xchiʼuk albeik skʼoplal li sjakʼobil liʼe:
¿Kʼusi xuʼ skoltaot sventa ta slekiluk avoʼonton xakʼopon li avutsʼ avalale?
Kʼelik Efesios 4:31, 32 xchiʼuk albeik skʼoplal li sjakʼobil liʼe:
¿Kʼu yelan skʼan xakʼopon abaik yoʼ junuk noʼox avoʼonton xchiʼuk li avutsʼ avalale?
Li Jeovae laj yalbe ta jamal Xnichʼon ti skʼanoje. Kʼelik Mateo 17:5 xchiʼuk albeik skʼoplal li sjakʼobil liʼe:
¿Kʼuxi xuʼ xachanbe stalelal Jeova kʼalal chakʼopon li avutsʼ avalale?
Kʼelo kʼusitik lekik tspas yantik yoʼ xakʼupil kʼopta.
JUNANTIKE XI CHALIKE: «Voʼone jamal chkal li kʼusi oy ta koʼontone, yuʼun xa stukik mi chopol chaʼiike».
¿Mi lek xanaʼ li kʼusi chalike? ¿Kʼu yuʼun ti jech chavale?
¿KʼUSI LA ACHAN?
Li kʼusi chkaltike xuʼ spatbe yoʼonton yantik o xuʼ xchibajes. Skʼan me jnoptik baʼyel li kʼusi chkaltike, ti kʼusi ora xchiʼuk ti kʼu yelan chkaltike.
Svulesobil ta joltik
¿Kʼu yelan xuʼ xakʼopoj yoʼ xakolta-o li yantike?
¿Kʼusitik ti mu xakʼan xlokʼ ta avee?
¿Kʼusi tskoltautik yoʼ ta slekiluk koʼontontik xijkʼopoj xchiʼuk ti lekuk noʼox li kʼusi chkaltike?
XUʼ TO XAKʼEL LIʼE
¿Kʼusi xuʼ skoltautik yoʼ lekuk noʼox li jkʼopojeltike?
Kʼelavil kʼusi xuʼ skoltaot sventa mu xaval bol kʼopetik.
«¿Kʼu yuʼun ti mu stakʼ xkaltik bol kʼopetike?» (Xuʼ te xata ta jw.org)
Kʼelo kʼusi xuʼ xapas sventa mu xaloʼiltavan.
Kʼelavil kʼuxi koltaat yuʼun Jeova jun vinik yoʼ xikta li bol kʼope.
«Lik jnop lek kʼusi yakal ta jpas ta jkuxlejal» (Li Jkʼel-osil ta toyole, 1 yuʼun agosto ta 2013)