KʼUXI XUʼ XAPAS AREVISITA
XCHANOBIL 7
Mu xavikta aba
Beiltasel ta Vivlia: «Muʼyuk bu laj yikta sbaik ta chanubtasvanej xchiʼuk ta yalbel skʼoplal li lekil [aʼyejetike]» (Ech. 5:42).
¿Kʼuxi laj yakʼ ta ilel li Pabloe?
1. Kʼelo li VIDEOE o kʼelo Echos 19:8 kʼalal ta 10. Laje, nopbo skʼoplal liʼe:
Akʼo mi oy buchʼutik ti mu skʼan xchikintaik mantale, ¿kʼuxi jnaʼojtik ti muʼyuk xlubtsaj li Pabloe?
Li Pabloe, ¿kʼu sjalikil la xchiʼin ta loʼil li buchʼutik lek laj yaʼiik mantale xchiʼuk kʼu sjalil jech la spas?
¿Kʼusi chakʼ jchantik li kʼusi la spas Pabloe?
2. Sventa lekuk ti kʼu yelan ta jpas jrevisitatik xchiʼuk ti xlik kakʼtik-o chanubtasel ta Vivliae, skʼan jchʼak jkʼakʼaltik xchiʼuk xkakʼ kipaltik.
Paso li kʼusi la spas Pabloe
3. Jaʼo xbat avulaʼan ti kʼusi ora laj yalbote. Nopbo skʼoplal liʼe: «¿Kʼusi van ora mas xokol li stuke? ¿Bu van jotukal mas lek chaʼi ti jchiʼin ta loʼile?». Sut kʼelo li arevisita akʼo mi jaʼo muʼyuk mas xokolot li voʼote.
4. Jakʼbo kʼusi ora xuʼ xbat avulaʼan yan velta. Kʼalal mu to xatsutses aloʼile, jakʼbo kʼusi ora xokol li buchʼu la achiʼin ta loʼil sventa xbat avulaʼan yan veltae. Persa me xakʼot un.
5. Mu xalubtsaj. Mu xanop ti muʼyuk ta yoʼonton mantal li buchʼu la achiʼin ta loʼil ta skoj ti muʼyuk mas te chata ta sna o ta skoj ti muʼyuk mas xokole (1 Kor. 13:4, 7). Akʼbo yipal ti xasaʼ yan velta li buchʼu lek laj yaʼi mantale. Mi jaʼo la ata ta chiʼinel ta loʼile, oyuk kʼusi xavalbe komel ti jtuneluk yuʼune (1 Kor. 9:26).