Mu me xi jpʼaj ta spetsʼ «li jyacvaneje»
«[Jeova] chascoltaot loqʼuel ta xchʼojon li jyacvaneje.» (SALMO 91:3.)
1. ¿Buchʼu jaʼ «li jyacvaneje», xchiʼuk kʼu yuʼun xibal sba?
LI MELEL yajtsʼaklomutik Cristoe oy jun kajkontratik ti toj pʼij xchiʼuk toj manya ti mu sta jech li krixchanoe. Ta Salmo 91:3 ta xichʼ biiltasel kʼuchaʼal jyakvanej, jaʼ xkaltik, jyak mut. ¿Buchʼu taje? Li revista liʼe, ta 1 yuʼun junio ta 1883, laj yakʼ ta ojtikinel buchʼu jaʼ. Muʼyuk buchʼu yan maʼ li kajkontratik taje, jaʼ li Satanase. Jech kʼuchaʼal jun pʼijil jyak mut, li Diabloe tskʼan tsloʼla xchiʼuk tskʼan tsyak li yajtuneltak Jeovae.
2. ¿Kʼu yuʼun chichʼ koʼoltasel ta jun jyak mut li Satanase?
2 Ep srasonal ti kʼu yuʼun tsyakik mut ta voʼnee. Bakʼintike yuʼun tskʼan tskʼupinbeik li skʼejimole o ti kʼupil sba skʼukʼumale, bakʼintik xtoke jaʼ sventa tstiʼik o sventa chakʼik ta milbil matanal. Ta skoj ti stalel onoʼox toj pʼijik xchiʼuk ti chjatavike, mu kʼunuk ta tsakel, jaʼ yuʼun li jyak mut ta skʼakʼalil Vivliae skʼan skʼelbe lek kʼuyelan stalelalik xchiʼuk kʼusi nopem xaʼiik spasel li jujukot mut sventa xyak lek yuʼune. Veno, kʼalal tskoʼoltas ta jun jyak mut li Satanase, li Vivliae tskoltautik ta yaʼibel lek smelolal li kʼusitik tstunese. Ta jujuntal chchan lek jkʼoplaltik li Diabloe. Baʼyel tskʼel kʼu kelantik xchiʼuk kʼusitik nopem xkaʼitik spasel, vaʼun lek pʼij tsyakutik sventa kuxul xi stsakutik (2 Timoteo 2:26). Mi li jpʼajutik ta spetsʼtake xuʼ tsokesutik ta mantal, vaʼun tslajesutik. Jaʼ yuʼun mi ta jkʼan chi jatavutik ta stojolal «li jyacvaneje», skʼan xkojtikinbetik lek li spetsʼtake.
3, 4. ¿Bakʼin ti xkoʼolaj kʼuchaʼal jkot leon chkontrainvan li Satanase, xchiʼuk bakʼin ti xkoʼolaj kʼuchaʼal jkot jtiʼvanej kiletel chone?
3 Jech xtok, li Vivliae tskoʼoltas ta jkot jchʼiel leon xchiʼuk ta jkot jtiʼvanej kiletel chon li Satanase, taje tskoltautik ta yaʼibel lek smelolal kʼuyelan ch-abtej (Salmo 91:13). Jech kʼuchaʼal jkot leone, bakʼintike li Satanase ta jsatik chilbajinutik o tstunesbe smantal ajvaliletik sventa tskontrain li yajtuneltak Diose (Salmo 94:20). Manchuk mi chakʼ akʼo skomtsanik steklumal Jeova jlom yajtsʼaklom Cristo li kontrainel taje, pe toj jutuk ti jech chkʼot ta pasele: yuʼun mas onoʼox tspasik ta jun li yajtuneltak Diose. Pe ¿kʼusi xuʼ xkaltik ta sventa li pʼijil kontrainel jech kʼuchaʼal tspas jkot jtiʼvanej kiletel chone?
4 Li Satanase tstunes li spʼijil ti mu jechuk kʼuchaʼal kuʼuntike sventa mukul tskontrainutik ti chmilvane, jech kʼuchaʼal tspas jkot jtiʼvanej kiletel chon ti bu snakʼoj sbae. Jaʼ jech yakʼojbe veneno ta snopben jlom yajtuneltak Jeova, vaʼun jech juʼem yuʼun ti jaʼ akʼo spasik li kʼusi tskʼane maʼuk li kʼusi tskʼan Diose. Kʼux ta alel ti kʼusitik kʼotem ta pasel yuʼune. Pe xi jmuyubaj chkaltik ti xkojtikinbetik li spetsʼtak Satanase (2 Corintios 2:11). Jech oxal chaʼa, jkʼeltikik chantos jmilvanej spetsʼtak «li jyacvaneje».
Li xiʼtael krixchanoe
5. ¿Kʼu yuʼun toj ep sbalil staojbe Satanás li petsʼ ti «chijxiʼutic yuʼun li cristianoetique»?
5 Li «jyacvaneje» snaʼoj ti stalel onoʼox ti oy ta yoʼonton tskʼan lek ch-ilatik yuʼun xchiʼiltakik li krixchanoetike. Jaʼ jech chaʼi sbaik ek li yajtsʼaklomtak Cristoe, yuʼun chichʼik ta venta ek li kʼusi tsnop yantik ta stojolalike. Li Diabloe snaʼoj maʼ taje xchiʼuk tskʼan tstunes sventa mu xa lekuk snopbeik skʼoplal li kʼusitike xchiʼuk ti jaʼ jech xpʼajik ta spetsʼe. Jtos ti kʼuyelan tspase jaʼ ti kʼalal chakʼ akʼo «chijxiʼutic yuʼun li cristianoetique» (Proverbios 29:25). Li yajtunel Dios ti tspas kʼusi mu skʼan Diose o ti chikta sba ta xchʼunbel smantal ta skoj ti chiʼta li krixchanoe, pʼajem xa ta spetsʼ «li jyacvaneje» (Ezequiel 33:8; Santiago 4:17).
6. ¿Kʼusi chakʼ kiltik ti xuʼ xpʼaj ta spetsʼ jyakvanej li jun kereme?
6 Jnopbetik skʼoplal jun chex kerem ti tsbutsʼ junuk sikʼolal ta skoj ti tsujat yuʼun li xchiʼiltak ta chanune. Ta melel, muʼyuk van bu snopoj jsetʼuk jech tspas kʼalal ilokʼ batel ta sna sventa chbat ta chanune. Pe kʼelavil, te yakal spas li kʼusi tsokesbat sbekʼtale xchiʼuk ti kʼusi chopol chil Diose (2 Corintios 7:1). ¿Kʼuxi pʼaj li ta petsʼe? Oyikʼal van la xchiʼin li buchʼu muʼyuk lek ta chiʼinele xchiʼuk ti chiʼ mi xpʼajate. Jech oxal chaʼa kerem-tsebetik, mu xavakʼ abaik ta loʼlael yuʼun «li jyacvaneje». Mi mu xa kʼan xa pʼajik li ta spetsʼtake xchiʼuk ti kuxul xa sbikʼoxuke, mi jsetʼuk xavakʼ abaik ta tsalel. Mu xa chʼay ta ajolik li tojobtasel chal Vivlia ti mu xa chiʼinik li buchʼutik chopolike (1 Corintios 15:33).
7. ¿Kʼusi spasoj sventa tsokesbe snopben ta mantal jlom totil-meʼiletik li Satanase?
7 Li totil-meʼil yajtsʼaklomtak Cristoe toj tsots skʼoplal chaʼiik ti kʼusi sbainojik chal Vivlia ta sventa li xkʼuxubinel yutsʼ yalalike (1 Timoteo 5:8). Pe li Satanase tskʼan tsokesbe snopbenik ta sventa taje, yuʼun jaʼ jech kʼotem ta pasel yuʼun bakʼintik. Jlom yajtsʼaklomtak Cristoe xchʼunojbeik smantal yajvalik ti akʼo xkomik to ta abtel kʼalal maʼuk xa yoraile, vaʼun jaʼ jech mu xa xkʼotilanik ta tsobajeletik. O chiʼik ta skʼanel permiso sventa chaʼiik sjunul li mukʼta tsobajel ta oxib kʼakʼal sventa chichʼik ta mukʼ Dios xchiʼuk li yermanotakike. Sventa mu xi jpʼaj li ta petsʼ taje, li kʼusi mas tsots skʼoplal skʼan jpastike jaʼ ti jpat koʼontontik ta stojolal Jeovae (Proverbios 3:5, 6). Ti kʼusi tskoltautik xtok sventa mu sok li jnopbentike jaʼ ti jvules ta joltik ti oyutik ta sna li Jeovae xchiʼuk ti yaloj ta melel chchabiutike. Totil-meʼiletik, ¿mi achʼunojik lek ta melel ti tskoltaoxuk ta kʼusiuk yelan li Jeova xchiʼuk avutsʼ avalalik mi cha pasik li kʼusi tskʼan yoʼontone? ¿O mi cha pʼajik van li ta spetsʼ Diabloe xchiʼuk ti cha pasik li kʼusi tskʼan yoʼonton ta skoj ti cha xiʼtaik li krixchanoe? Chkalkutik avaʼiik ti xa pasik orasion xchiʼuk xa nopbeik lek skʼoplal li sjakʼobiltak taje.
Li yakel ta saʼel kʼulejale
8. ¿Kʼu yelan tstunes li petsʼ ta saʼel kʼulejal li Satanase?
8 Li yan spetsʼ Satanase jaʼ li saʼel kʼulejale. Li manolajel xchiʼuk chonolajel ta balumil liʼe jaʼtik onoʼox tstij oʼontonal ta spasel li kʼusitik ta ora noʼox tspasvan ta jkʼuleje. Bakʼintike, ti jech van loʼlabil snopben jlomuk yajtsʼaklom Cristoe, xuʼ van xi chalbutike: «Tsots xa abtej li avie. Kʼalal oy xaʼox jutuk atakʼine, mu xa masuk xavat avoʼonton xchiʼuk xuʼ xa xa kʼupin li kuxlejale. Mi jech tskʼan avoʼonton xtoke, xuʼ xa pas aba ta prekursor», xuʼ van xiik. Li chopol nopbenal taje xuʼ jaʼ jech tsnopik jlomuk ti buchʼutik tskʼan tsbalinbeik stakʼin li yermanotakike. Pe kakʼtik lek venta li xchopol nopbenike. ¿Mi mu jaʼuk jech xkoʼolaj kʼuchaʼal li snopben jkʼulej «bol vinic» li ta slokʼolkʼop Jesuse? (Lucas 12:16-21.)
9. ¿Kʼu yuʼun chlajik-o ta yakel jlom yajtsʼaklomtak Cristo li skʼanel kʼusitike?
9 Li xchopol balumil Satanase tstijbe yoʼonton krixchanoetik sventa tskʼanik li kʼulejale. Taje xuʼ jech xlik skʼan ek li yajtsʼaklom Cristoe, vaʼun ta kʼunkʼun chlik sjikʼaves li mantale xchiʼuk «mu [xa] satin o» (Marcos 4:19). Li Vivliae chalbutik ti akʼo junuk noʼox koʼontontik mi oy jveʼeltik xchiʼuk jkʼuʼ jpokʼtike (1 Timoteo 6:8). Pe ta skoj ti mu xchʼunik li tojobtasel taje, ep chpʼajik ta spetsʼ «li jyacvaneje». ¿Mi jaʼ van ta skoj stoybailik ti xchʼunojik ti tskʼan lekuk xkuxlejalik ta takʼine? ¿Kʼusi xuʼ xkaltik li ta jtojolaltike? ¿Mi jaʼ van baʼyel chkakʼ ta jkuxlejaltik skʼanel li kʼusitik ta jkʼantike, ti jaʼ ta patil to chkakʼtik li yichʼel ta mukʼ Diose? (Ageo 1:2-8.) Kʼux ta alel, pe kʼalal jaʼo chʼabal lek takʼine, oy buchʼutik yakʼojik ta vokol li slekilalik ta mantal ta skoj ti jech to tskʼan xkuxlejalik kʼuchaʼal nopemik toʼoxe. ¡Taje jaʼ xmuyubaj-o tajmek «li jyacvaneje»!
Li petsʼ sventa chopol chʼayob oʼontonale
10. ¿Kʼusi skʼan sjakʼbe sbaik li yajtsʼaklomtak Cristoe?
10 Yan ti kʼusi tstunes sventa tsyak krixchanoetik «li jyacvaneje» jaʼ ti kʼalal tsokesbe li stalelal ta sventa li kʼusi lek xchiʼuk li kʼusi chopole. Li talelalil ti oy toʼox ta Sodoma xchiʼuk ta Gomorra ta voʼnee, jaʼ jech jutuk mu skotoluk li chʼayob oʼontonal avie. Jlom j-al notisiaetik ta television xchiʼuk ta revistaetike jaʼ mas chalbeik skʼoplal li majbaile xchiʼuk chakʼik ta oʼontonal li chopol lutsʼbaile. Jech ta melel, ep chʼayob oʼontonale tsmakbe snopben krixchanoetik sventa mu xa kʼunuk «ta tʼujel chaʼyic li cʼusi leque xchiʼuc li cʼusi chopole» (Hebreos 5:14). Pe mu me xchʼay ta joltik li kʼusi xi laj yal Jeova ta stojolal li j-alkʼop Isaiase: «Toj abul abaic, voʼoxuc ti chacuyic ta lec li cʼusi chopole, ti chavalic jaʼ chopol li cʼusi leque», xi (Isaías 5:20). Pe ¿mi sokem jnopbentik yuʼun ta chopol chʼayob oʼontonal «li jyacvaneje»? Li yajtsʼaklomutik Cristoe skʼan ta jakʼbe jbatik kʼuyelan oyutik ta sventa taje (2 Corintios 13:5).
11. ¿Kʼusi pʼijubtasel laj yichʼ alel ta La Atalaya ta sventa li novelaetike?
11 Oy xa van ta 25 jabil, li revista La Atalaya ipʼijubtasvan ta sventa li kʼusitik ch-echʼilan ta televisione.a Ta sventa ti kʼusi pʼij chkʼot ta pasel yuʼun li novelaetik ti lek ojtikinbilike, xi laj yal li revistae: «Li saʼel kʼanele jaʼ chichʼ tunesel ta spakbel skʼoplal kʼusiuk talelalil. Jech kʼuchaʼal liʼe, jun tseb ti chʼabal smalal ti xchiʼuk xa yole xi chalbe jun yamigae: “Pe jkʼanoj tajmek li Victore. Mu jventauk-o. [...] ¡Ti jech jkuchojbe batel ta jchʼut xnichʼone xtoj-o yuʼun ti kʼusiuk ta jpase!” —xi—. Li uni son chichʼ aʼiel tee chmakbat-o snopben li jun krixchano sventa mu xakʼ venta ti chopol kʼusi tspas li tsebe. Li ants ti tskʼel televisione lek chil li Víctor eke. Kʼux ta yoʼonton li tsebe. “Oy srason yaʼuk” —xi—. “Toj labal sba ti kʼuyelan ta snopbeik smelolale”, xi laj yal jun jkʼel television ants ti vul xchʼulel ta mas tsʼakale. “Jnaʼojtik ti muʼyuk lek li mulivajele. [...] Pe laj kakʼ venta ti lek chkil li ta jnopbene” —xi—».
12. ¿Kʼusi chakʼ ta ilel ti jtunel to li pʼijubtasel ta sventa li novelaetike?
12 Leʼ xa ti kʼalal laj yichʼ pukel li mantaletik taje, li chopol chʼayob oʼontonaletik taje mas to pʼolemik talel. Jech, ta jlom lumetike sjunul kʼakʼal-akʼobal ch-echʼ. Viniketik, antsetik xchiʼuk chex kerem-tsebetik ta onoʼox smakʼlintas-o snopbenik li chʼayob oʼontonaletik taje. Pe li yajtsʼaklomutik Cristoe skʼan me mu jloʼla jbatik ti jechuke. Toj chopol me ti ta jnoptik ti muʼyuk chopol ta kʼelel taje, ti ta jnoptik ti oy to kʼusitik mas chopol chkʼot ta pasel li ta jkuxlejaltik ta melele. Kʼuk noʼox yelan, ¿kʼuxi xuʼ spak-o skʼoplal jun yajtsʼaklom Cristo ti jaʼ tstʼuj sventa chchʼay-o yoʼonton skʼelel krixchanoetik ti muʼyuk bu snopoj jsetʼuk ta xikʼ ochel ta yut snae?
13, 14. ¿Kʼuxi la koltaatik jlom ti buchʼutik la skʼelik li pʼijubtasel laj yichʼ alel ta sventa televisione?
13 Ep yajtsʼaklomtak Cristoe la stabeik sbalil ti la xchʼunik li pʼijubtasel laj yakʼ li «jʼabtel ti jun [«tukʼ», NM] yoʼnton [...], ti lec bije» (Mateo 24:45-47). Kʼalal la skʼelik li tojobtaseletik ti lek jamal laj yichʼ alel ti lokʼesbilik ta Vivliae, jlom jkʼel vunetike la stsʼibaik ti kʼuyelan koltaatik yuʼun li mantaletik taje. Jun antse xi laj yale: «Leʼ xa tal ta oxlajubeb jabil nopem xkaʼi ta skʼelel novela. Kaloje muʼyuk tsokesun ta mantal, yuʼun chi kʼot ta tsobajeletik xchiʼuk ta jchol mantal bakʼintik. Pe mu jechuk. Jaʼ jech la jnop ti kʼuchaʼal krixchanoetik ch-echʼ ta novelae: mi chutot li amalale o mi muʼyuk kʼanbilot chavaʼi aba yuʼune, staʼo ti cha mulivaje, yuʼun jaʼ ta smul li amalale. Ti jech la jnop ti “staʼoe”, li mulivaj, vaʼun jaʼ jech la jta jmul ta stojolal Jeova xchiʼuk ta stojolal li jmalale», xi. Laj yichʼ lokʼesel ta tsobobbail li ants taje, pe kʼalal echʼ skʼakʼalile ivul xchʼulel, la sutes yoʼonton xchiʼuk laj yichʼ chʼamel yan velta ta tsobobbail. Li mantaletik ti pʼijubtasvan ta sventa li novelaetike akʼbat stsatsal yoʼonton sventa mu xa skʼel li kʼusitik tspʼaj Jeovae (Amós 5:14, 15).
14 Yan kartae xi chale: «Li okʼ kʼalal la jkʼel li mantaletike, yuʼun laj kakʼ venta ti mu xa jaʼuk yuʼun Jeova skotol li koʼontone. Jech oxal, laj kalbe ta melel ta orasion ti chkikta ti nopem xkaʼi skʼelel novelae», xi. Kʼalal yaloj xaʼox kolaval ta skoj li mantaletike, jun ants yajtsʼaklom Cristo ti laj yakʼ venta ti nopem xaʼi skʼelel novelaetik eke xi laj yale: «La jakʼbe jba mi yakal van tsokes ti kʼuyelan oyun ta stojolal Jeovae. ¿Kʼuxi xuʼ jaʼ “yamigaikun” [li buchʼutik ch-echʼ ta novelae] xchiʼuk ti jaʼ yamigaun xtok li Jeovae?», xi. Mi tsokesbe xa onoʼox yoʼonton krixchano leʼ xa ta 25 jabil li kʼusitik ch-echʼ ta televisione, ¿kʼusi van chkʼot ta pasel yuʼun li avie? (2 Timoteo 3:13.) Jech oxal chaʼa, mu jyalesbetik sbalil li spetsʼtak Satanás ta sventa li chʼayob oʼontonale, kʼusiuk noʼox, mi jaʼ ta novela, videojuego ti chvinaj majbaile o sonetik ti oy svideoal ti bu chvinaj mulivajele.
Li petsʼ ti muʼyuk lek chkil jbatike
15. ¿Kʼu yelan tsyak jlom yajtsʼaklomtak Cristo li Satanase?
15 Li Satanase tstunes ti muʼyuk lek chkil jbatik sventa chchʼak li steklumal Jeovae. Buchʼuuk noʼox —kʼusiuk matanal abtelal staoj— xuʼ chpʼaj li ta petsʼ taje. ¿Kʼuxi? Jaʼo kʼalal chkakʼtik akʼo sokes li jlekilaltike, ti jmoj tsobolutike xchiʼuk ti chkakʼtik akʼo sokes li xchʼiel ta mantal steklumal Jeovae (Salmo 133:1-3).
16. ¿Kʼusi pʼij chkʼot ta pasel yuʼun Satanás mi chkakʼtik akʼo xchʼakutik ti jech muʼyuk lek chkil jbatike?
16 Kʼalal jaʼo yakal li Baʼyel Mukʼta Pas Kʼop ta spʼejel Balumile, li Satanase la saʼ ta kʼop li s-organisasion Jeova liʼ ta Balumil sventa tslajes yaʼie. Pe muʼyuk bu spas yuʼun (Apocalipsis 11:7-13). Jaʼo te lek pʼij lik yakʼbe tal yipal ta xchʼakel li steklumal Diose. Mi chkakʼtik akʼo xchʼakutik ti muʼyuk lek chkil jbatike, xuʼ van tijil xi jbat ta spetsʼ «li jyacvaneje», yuʼun xuʼ yakal jpajestik ta spasel yabtel li chʼul espiritu ta jtojolaltik xchiʼuk ta stojolal li tsobobbaile. Taje chmuyubaj-o tajmek li Satanase, yuʼun snaʼoj mi sok ta kʼusiuk noʼox li lekilal xchiʼuk ti jmoj oyutik ta tsobobbaile tsok ek li chol mantale (Efesios 4:27, 30-32).
17. ¿Kʼusi tskoltautik ta xchapanel kʼalal oy bu muʼyuk lek chkil jbatike?
17 Pe ¿kʼusi xuʼ jpastik mi oy jkʼoptik xchiʼuk junuk jchiʼiltike? Melel onoʼox ti jelel li jujutos kʼope. Pe manchuk mi oy ep srasonal ti jech muʼyuk xa lek chkil jbatike, muʼyuk junuk srasonal sventa mu xichʼ chapanel (Mateo 5:23, 24; 18:15-17). Li tojobtaseletik ta jtatik ta sKʼop Diose jaʼ yakʼoj ta naʼel stuk, jech oxal, lek tukʼik. Jaʼ yuʼun chaʼa, kakʼ ta jkuxlejaltik li beiltaseletik ta Vivliae, yuʼun persa onoʼox lek kʼusi chkʼot ta pasel yuʼun.
18. Li stalelal Jeovae, ¿kʼuxi tskoltautik ta xchapanel li kʼop chlik kuʼuntik xchiʼuk jchiʼiltaktike?
18 Li Jeovae maʼuk noʼox oy ta yoʼonton tspas perton, yuʼun «chchʼay ta [y]oʼnton li jmul[tike]», jaʼ xkaltik, tspas perton ta melel (Salmo 86:5; 130:4). Jtos ti kʼuyelan chkakʼtik ta ilel ti kʼanbil nichʼonilutik yuʼun Jeovae jaʼ ti jchanbetik stalelale (Efesios 5:1). Jpas mulilutik jkotoltik xchiʼuk chtun tajmek kuʼuntik li sperton Jeovae. Jaʼ yuʼun, skʼan me pʼijutik mi chkiltik ti vokol chkaʼitik spasel pertone. Yuʼun xuʼ jech chkʼot ta jtojolaltik kʼuchaʼal li j-abtel ta slokʼolkʼop Jesús ti muʼyuk la skʼan la spasbe perton li xchiʼil ta abtele. Kʼalal laj yaʼi li yajvale —ti jaʼ toj echʼ noʼox ep yil la xchʼaybee—, la stikʼ ta chukel. Xi la stsutses slokʼolkʼop li Jesuse: «Jaʼ noʼox jech chaspasboxuc ec li Jtot te oy ta vinajele me mu scotoluc avoʼntonic jʼechʼel chapasbeic perdón smul li achiʼilique», xi (Mateo 18:21-35). Jnoptik ta sventa li lokʼolkʼop taje, vaʼun jnoptik jayib velta spasojbutik perton li Jeovae. Ta melel, taje jaʼ me tskoltautik ta xchapel kʼusiuk kʼopal oy kuʼuntik ta stojolal li kermanotaktike (Salmo 19:14).
Lek oyutik yuʼun li «avilal ti nakʼal ti jaʼ yuʼun li Buchʼu te oy ta Toyole»
19, 20. Li ta xibal sba kʼakʼal liʼe, ¿kʼuxi skʼan jtsaktik ta mukʼ li «avilal ti nakʼal» xchiʼuk li «xyaxinal» Jeovae?
19 Xibal sba li kʼakʼal kuxulutike. Ti muʼyukuk xchabiojutik ta slekil yoʼonton li Jeovae, voʼne xa onoʼox sbikʼojutik jechuk li Satanase. Sventa mu xi jpʼaj ta spetsʼtak «li jyacvaneje», skʼan te oyutik-o li ta «avilal ti nakʼal ti jaʼ yuʼun li Buchʼu te oy ta Toyole [NM]», jun avilal ti maʼuk batsʼi osile, ti bu xuʼ jta jpojeltik ta «xyaxinal li Bochʼo echʼem svuʼele» (Salmo 91:1).
20 Jech oxal chaʼa, jkʼeltik onoʼox kʼuchaʼal jpojobbailtik li smantaltak Jeovae, maʼuk kʼuchaʼal jmakeltik. Jkotoltik oy jun kajkontratik ti mu jechuk spʼijil kʼuchaʼal krixchanoe. Ti muʼyukuk tskoltautik li Jeovae, muʼyuk buchʼu xuʼ xkol jechuk li ta spetsʼtake (Salmo 124:7, 8). Jaʼ yuʼun chaʼa, jkʼanbetik koltael Jeova sventa mu xi jpʼaj ta spetsʼtak «li jyacvaneje» (Mateo 6:13).
[Tsʼibetik ta yok vun]
a La Atalaya 15 yuʼun mayo ta 1983, paj. 3-7.
¿Mi xvul ta ajol li voʼote?
• ¿Kʼu yuʼun jaʼ jun jmilvanej petsʼ ti «chijxiʼutic yuʼun li cristianoetique»?
• ¿Kʼuxi tstunes li yakel ta saʼel kʼulejal li Diabloe?
• ¿Kʼu yelan stunesoj li chopol chʼayob oʼontonal sventa tsyak jlom yajtsʼaklomtak Cristo li Satanase?
• ¿Kʼusi petsʼal tstunes sventa tsokes ti jmoj oyutik li Diabloe?
[Lokʼol ta pajina 28]
Jlome pʼajemik li ta petsʼ ti «chijxiʼutic yuʼun li cristianoetique»
[Lokʼol ta pajina 29]
¿Mi cha kʼupin li chʼayob oʼontonal ti tspʼaj Jeovae?
[Lokʼol ta pajina 31]
¿Kʼusi xuʼ jpastik mi muʼyuk lek chkil jbatik xchiʼuk junuk kermanotike?