Li achʼ revista sventa chichʼ chanel Li Jkʼel osil ta toyole

LI REVISTA ti atsakoj ta akʼobe jaʼ me li baʼyel revista sventa chichʼ chanel Li Jkʼel osil ta toyole. Li avie chkalkutik avaʼi jutuk kʼuyelan li revistae.

Li revista sventa chichʼ chanele jaʼ sventa li yajrextikotak Jeovae xchiʼuk li jchanunetik ta Vivlia ti yakal xchʼiik ta mantale. Jlik noʼox chlokʼ ta u xchiʼuk chichʼ talel chanib o voʼob xchanobiltak. Te cholol chtal ta yelov revista ti kʼuyelan chichʼ chanel li jujun xchanobile. Jech xtok, muʼyuk me chichʼ tal slokʼolal li ta yelove, yuʼun muʼyuk chkakʼtik ta chol mantal jech kʼuchaʼal li revista Li Jkʼel osil ta toyole ti jaʼ sventa skotol krixchanoetike.

Li ta pajina 2 te chal kaʼitik jutuk kʼusi stu li kʼusitik chichʼ chanele. Taje toj jtunel me yuʼunik kʼalal chchapan sbaik li buchʼutik chʼetesik Li Jkʼel osil ta toyole, sventa lek chchanbeik smelolal li kʼusitik chichʼ chanel xchiʼuk li tsobobbaile. Li ta pajina 2 xtoke te cholol tal sbi li yan mantaletik ti yichʼoj tale.

Ta xavakʼ venta ti mas xa komkom jutuk li xchanobiltake. Taje jaʼ me chakʼbutik mas yorail ta xchanel lek li tekstoetik ti mas tsotsik skʼoplal li ta Xchanel Li Jkʼel osil ta toyole. Chkalkutik avaʼi ti xa saʼ skotol li tekstoetik kʼalal yakal xa chapan abae. Ta jlom tekstoetike te baʼyel chal li jpʼel kʼop «kʼelo», taje jaʼ smelolal ti skʼan kʼelele xchiʼuk ti xichʼ chanel kʼalal ch-echʼ Xchanel Li Jkʼel osil ta toyole. Mi xakʼ orae, xuʼ xichʼ kʼelel li yan versikuloetike. Ta jlom xchanobiltak xtoke, te baʼyel chal li jpʼel kʼop «koʼoltaso xchiʼuk» li ta jlom tekstoetike. Mu masuk chichʼ kʼelel ta tsobajel maʼ taje, yuʼun muʼyuk jaʼ tajmek chalbe skʼoplal li kʼusitik tsots skʼoplal yakal chal li parafoe. Li kʼusi stue chaʼa, jaʼ ti chalbe jutuk skʼoplal o ti tstsʼakubtasbe skʼoplal li loʼile. Jaʼ yuʼun chaʼa, kʼalal yakal xa chapan abae chkalbotkutik avaʼi ti akʼo xa saʼ li tekstoetik taje. Jaʼ jech taje, xuʼ chaval kʼalal chavakʼ aloʼil mi jech tskʼan avoʼontone.

Li yaʼyejal abtelal ta jujun jabile muʼyuk xa chtal li ta revista Li Jkʼel osil ta toyole. Chlik lokʼuk ta stsʼakleb Kabteltik sventa Dios ti chlik li ta 2008, jech noxtok chlokʼ ta Anuario kʼuchaʼal onoʼox nopem xkaʼitike. Pe jech kʼuchaʼal laj xa kaltike, li revista sventa chichʼ chanele ta me xichʼ tal yan mantaletik. Manchuk mi ep ti muʼyuk chichʼ chanel ta tsobajel taje, ta me jtijkutik avoʼonton ta xchanel, yuʼun jaʼ jveʼeltik ta mantal ek ti chakʼbutik li «jʼabtel ti jun [«tukʼ», NM] yoʼnton [...], ti lec bije» (Mat. 24:45-47).

Ta sjaleb xa un, chkalkutik avaʼi ti jlik revista sventa krixchanoetik xchiʼuk li sventa chichʼ chanele, mu me chaʼlikuk revista ti jelelike, moʼoj, yuʼun chaʼlik ti jlik noʼox chkʼote: Li Jkʼel osil ta toyole. Yakal chalbe skʼoplal li Ajvalilal yuʼun Jeovae. Jaʼ yuʼun li parafo ta pajina 2 ti chal kʼusi stu li Li Jkʼel osil ta toyole koʼol yelan ta xchaʼlikal. Li jvokʼ bu chal «¿Mi xvul ta ajol?», ti chlokʼ li ta revista sventa chichʼ chanele, li sloʼilale te me chlokʼ tal ta xchaʼlikal revistaetik.

Leʼ xa tal ta sjabilal 1879, Li Jkʼel osil ta toyole tukʼ spasoj tal li yabtel ta xcholel li melel mantaletik ta sventa li Ajvalilal yuʼun Diose manchuk mi oy pas kʼopetik, vokol ta takʼin xchiʼuk kontrainel. Ta jkʼanbetik vokol Jeova ti xkoltavan xchiʼuk ti akʼo xakʼbe sbendision sventa jechuk-o spas li yabtel ta sventa ti kʼuyelan achʼ xa chlokʼ tale. Jech xtok, uni jkʼel revista ti jkʼanojotkutike, ta jkʼanbekutik Jeova ti akʼo xakʼbot sbendision ta sventa ti avakʼojbe yipal ta stunesel lek li achʼ revista sventa chichʼ chanel Li Jkʼel osil ta toyole.