Mu jnaʼtik bu junukal lek chbat
«Ovolajan noʼox ta sob xchiʼuc ta mal cʼacʼal, yuʼun mu xanaʼ bu junucal lec chbat.» (ECL. 11:6.)
1. ¿Kʼu yuʼun labal chkaʼitik ti kʼu yelan chchʼi tal jtosuk kʼusie xchiʼuk kʼu yuʼun chakʼ jchantik ti bikʼit xkakʼ jbatike?
LI JTSʼUNOLAJELE skʼan oyuk smalael yuʼun (Sant. 5:7). Kʼalal mi la stsʼunbe li sbekʼe skʼan smala xjav xchiʼuk xchʼi talel. Kʼunkʼun chchʼi talel maʼ taje. Mi lek ti kʼuyelan oye, xnachʼte-nachʼte likel sjol ta sba balumil. Chchʼi echʼel, vaʼun ta xakʼ sat. Kʼalal mi yijub xaʼox une, lek xa me ta tsobbel sat. Ti chkiltik kʼuyelan labal sba chchʼi tale, toj labal to van sba chkaʼitik. Pe oy kʼusi chakʼ jchantik sventa bikʼit xkakʼ jbatik noxtok. Jech ta melel: li voʼotike xuʼ jtsʼunbetik li sbekʼ tsʼunubile xchiʼuk stakʼ xkatʼestik, pe jaʼ noʼox Dios ti xuʼ xchʼi yuʼune (koʼoltaso xchiʼuk 1 Corintios 3:6).
2. ¿Kʼusi laj yakʼ ta chanel Jesús ta sventa li chʼiel ta mantal li ta lokʼolkʼop ti la jkʼeltik ta yan xchanobile?
2 Jech kʼuchaʼal laj kiltik ta yan xchanobile, li Jesuse la skoʼoltas ta yabtel jun jtsʼunolajel li abtel ta xcholel mantal sventa Ajvalilal yuʼun Diose. Li ta lokʼolkʼop ti jelel kʼuyelan sbalumilale te laj yichʼ alel ti akʼo mi lek li sbekʼ tsʼunubile maʼuk svinajeb mi chchʼi xchiʼuk mi chakʼ sat, moʼoj, yuʼun jaʼ ti kʼuyelan yoʼonton li krixchanoe (Mar. 4:3-9). Li ta lokʼolkʼop ti chal ti chvay li jtsʼunolajele, te laj yakʼ ta ilel ti mu xaʼibe lek smelolal kʼuyelan chchʼi talel li kʼusi la stsʼune. Li srasonal jech kʼuchaʼal laj kiltike, jaʼ ti jaʼ ta sjuʼel Dios chchʼi tale, maʼuk ta sjuʼel jun krixchano (Mar. 4:26-29). Jkʼeltik batel oxtos slokʼolkʼop Jesús li avi une: li sbekʼ mostasae, li svolesobil xchʼut pane xchiʼuk li nutiʼ stsakobil choye.a
Li lokʼolkʼop ta sventa sbekʼ mostasae
3, 4. ¿Kʼusitik skʼoplal Ajvalilal yuʼun Dios chalbe skʼoplal li lokʼolkʼop ta sventa sbekʼ mostasae?
3 Li lokʼolkʼop ta sventa sbekʼ mostasa ti te oy ta kapitulo 4 yuʼun Marcos eke, oy kʼusi chib chalbe smelolal: baʼyel, jaʼ ti labal sba epajem talel li krixchanoetik ti xchʼamojik li aʼyej sventa Ajvalilal yuʼun Diose, li xchibale jaʼ li chabiel chichʼike. Xi laj yal li Jesuse: «¿Cʼusi xuʼ ta jcoʼoltsan o li ventainel yuʼun Diose? ¿Cʼusi loʼilal ta jlocʼta o ti xcoʼlaj smelole? Jaʼ jech chac cʼu chaʼal becʼ mostaza chichʼ tsʼunel ti jaʼ noʼox stuc toj biqʼuit ta scotol yan tsʼunubiletique. Pero cʼalal me laj yichʼ xaʼox tsʼunele, jaʼ noʼox stuc toj mucʼ ta xbat ta scotol li yan tsʼunubiletique. Lec mucʼtic chacʼ scʼobcʼob, jech chtal mutetic ta vinajel, chtal spas stasic ta scʼobcʼob “yuʼun oy lec xyaxinal”», xi (Mar. 4:30-32).
4 Li ta lokʼolkʼop liʼe jaʼ chalbe skʼoplal ti kʼuyelan xchʼiel li Ajvalilal yuʼun Diose, ti jaʼ te chvinaj ti toj ep yakal xichʼ cholel li lekil aʼyej yuʼun Ajvalilale xchiʼuk ti kʼu to yepal epajem talel li tsobobbailetik leʼ xa tal ta Pentecostés ta sjabilal 33. Li sbekʼ mostasa ti bikʼit tajmeke, chichʼ tunesel bakʼintik kʼalal chichʼ albel skʼoplal li kʼusi bikʼitik tajmeke (koʼoltaso xchiʼuk Lucas 17:6). Akʼo mi bikʼit ta jyalel li sbekʼe, xuʼ xkʼot ta oxib o voʼob metro staylej xchiʼuk ti tsotsik tajmek li skʼobkʼobe, xuʼ xkaltik ti jaʼ jun teʼ yaʼele (Mat. 13:31, 32).
5. ¿Kʼuxi ichʼi tal li stsobobbail jchʼunolajel ta baʼyel sigloe?
5 Li stsobobbail jchʼunolajele jaʼo lik talel kʼalal laj yichʼik tʼujel ta chʼul espiritu 120 yajtsʼaklomtak Cristo ta Pentecostés ta sjabilal 33. Akʼo mi jutebik toʼox ti vaʼ kʼakʼal taje, ta jutuktik noʼox kʼakʼal ti ta smilal noʼox jchʼunolajeletik lik talikuk ta stojolalike (kʼelo Hechos 2:41; 4:4; 5:28; 6:7; 12:24; 19:20). Mu statik lek 30 jabil une epaj li jkʼajojetike, jaʼ yuʼun laj yalbe tsobobbailetik ta Colosas li jtakbol Pablo ti laj xa «yichʼ cholbel scotol cristianoetic liʼ ta [balumil]» li lekil aʼyeje (Col. 1:23). ¡Toj ep xa noʼox ichʼi!
6, 7. 1) ¿Kʼusi chʼiem talel leʼ xa ta 1914? 2) ¿Kʼuxi tstsuts ti kʼusi chʼiem tale?
6 Leʼ xa onoʼox talel ta 1914 ti kʼalal laj yichʼ vaʼanel ta vinajel li Ajvalilal yuʼun Diose, li skʼobkʼobtak teʼel mostasa ta lokʼolkʼope chʼiem tal tajmek. Li steklumal Diose yiloj kʼuyelan kʼotem ta pasel ta melel li kʼusi chal albil kʼop ta slivroal Isaías liʼe: «Acʼo me toj jutebic, pero chcʼot cʼalal ta jmil; acʼo me solel muʼyuc epic, pero chcʼot ta jun mucʼta lum» (Isa. 60:22). Li jtsop tʼujbil krixchanoetik ti la spasik li abtel ta sventa Ajvalilal yuʼun Dios ta slikebaltik siglo 20, mu onoʼox bu snopojik ti ch-ayan jutuk mu vukubuk miyon yajrextikotak Jeova li ta sjabilal 2008 ti tspasik li abtelal ti oy mas ta 230 mukʼtik lumetik xchiʼuk yan osiletike. Toj ep xa noʼox chʼiem talel, jech kʼuchaʼal li sbekʼ mostasa ta lokʼolkʼop laj yal Jesuse.
7 Pe mu teuk noʼox chkʼot li xchʼiele. Chkʼot skʼakʼalil ti skotol li krixchanoetik ti chkuxiik liʼ ta Balumile jaʼ xa me chventainatik yuʼun li Ajvalilal yuʼun Diose. Mi jech xaʼox taje, chamemik xaʼox me li chopol krixchanoetike. Taje maʼuk chkʼot ta pasel ta yip krixchanoetik, moʼoj, yuʼun jaʼ chkʼot ta pasel yuʼun li Kajvaltik Jeova ti jaʼ Mukʼul Jpas mantale (kʼelo Daniel 2:34, 35). Vaʼun ta xkilbetik stsutsebal skʼoteb ta pasel jun albil kʼop yuʼun Isaías ti xi chale: «Chnoj ta yotquinel Mucʼul Dios sbejel li banamile, jech chac cʼu chaʼal nojem ta voʼ li nabe», xi (Isa. 11:9).
8. 1) ¿Buchʼu jaʼ skʼoplal li mutetik li ta lokʼolkʼop ta sventa sbekʼ mostasae? 2) ¿Kʼusi chabibilutik-o li avi kʼakʼale?
8 Li Jesuse laj yal ti tsta spojelik ta xyaxinal teʼ li mutetik ta vinajele, jaʼ xkaltik, li ta Ajvalilal yuʼun Diose. Li mutetik taje maʼuk skontraik li Ajvalilal yuʼun Diose, muʼyuk tslobeik li sbekʼe, mu jechikuk kʼuchaʼal li ta lokʼolkʼop ti bu ep ta tos balumile (Mar. 4:4). Li ta lokʼolkʼop ta sventa sbekʼ mostasae, li mutetike jaʼ skʼoplal li krixchanoetik ti tukʼ yoʼontonik ti te tsaʼ spojelik ta stsobobbail yajtsʼaklomtak Cristoe. Yakal xa chichʼik chabiel ta skoj chopol balumil li krixchanoetik taje, sventa mu sokesatik ta stalelalik xchiʼuk ta mantal (koʼoltaso xchiʼuk Isaías 32:1, 2). Jaʼ jechtik la skoʼoltas Jeova li Ajvalilal yuʼun Mesías xchiʼuk jpets teʼ kʼalal xi laj yale: «Te ta xvul jtsʼun ta jun toyol vits ta yosilal Israel. Lec toyolic chbat scʼobcʼob; lec chacʼ sat, ven lequil mucʼta chʼut teʼ ta xcʼot. Te chtal xcux yoʼntonic ta yolon scotol cʼusiuc noʼox mutal; te chnaquiic ta xyaxinal», xi (Eze. 17:23).
Li lokʼolkʼop sventa svolesobil xchʼut pane
9, 10. 1) ¿Kʼusi laj yalbe smelolal Jesús li ta lokʼolkʼop ta sventa li svolesobil xchʼut pane? 2) ¿Kʼusi skʼan xal ta jutuk mu skotoluk velta kʼalal svolesobil xchʼut pan xi li Vivliae?
9 Mu onoʼox stekeluk velta chil ta sat krixchano ti kʼuyelan chchʼie. Jaʼ jech laj yakʼ ta aʼiel Jesús kʼalal xi laj yal li lokʼolkʼop liʼe: «Ti cʼu xʼelan chventainvan li Diose, jaʼ jech chac cʼu chaʼal svolesubil xchʼut pan. Cʼalal tscap ta vucub cuartiya arina li antse, lec chvol o xchʼut scotol», xi (Mat. 13:33). ¿Kʼusi skʼan xal li svolesobil xchʼut pane, xchiʼuk kʼuxi tsakal skʼoplal xchiʼuk li xchʼiel Ajvalilal yuʼun Diose?
10 Li ta Vivliae jaʼtik onoʼox skʼan xal mulil li svolesobil xchʼut pane. Jech kʼuchaʼal liʼe, li jtakbol Pabloe la stunes sventa tskoʼoltas ti kʼuxi chtanij echʼel xchopolal li jun jmulavil ta tsobobbail Corintoe (1 Cor. 5:6-8). ¿Mi jaʼ van laj yalbe skʼoplal Jesús ti yakal xchʼi talel kʼusi chopol ti laj yalbe skʼoplal svolesobil xchʼut pane?
11. ¿Kʼusi stu ta Israel li svolesobil xchʼut pane?
11 Yoʼ to mu jtakʼtik li sjakʼobil taje, skʼan oyuk ta joltik oxtos kʼusi tsotsik skʼoplal. Baʼyel, akʼo mi mu onoʼox xakʼ ta tunesel svolesobil xchʼut pan kʼalal jaʼo yorail kʼin Koltael li Jeovae, pe oy bateltik ti ta xchʼame. Li j-israeletike ta stunesik svolesobil xchʼut pan kʼalal ta smilik matanal sventa lek x-ilatik yuʼun Diose, ti chlokʼ ta yoʼontonik yalbel koliyal li Jeova ta skoj li epal bendision ch-akʼbatike. Ti chveʼik kʼalal chakʼik li matanal taje jaʼ yorail muyubajel (Lev. 7:11-15).
12. ¿Kʼusi ta jchantik ti kʼuyelan tskoʼoltajes kʼusitik li Vivliae?
12 Xchibal, li Tsʼibetike oy bateltik ti chopol chalbe skʼoplal jtosuk kʼusie, pe oy bakʼintik ti lek chalbe skʼoplal xtoke. Jech kʼuchaʼal liʼe, li ta 1 Pedro 5:8 tskoʼoltas ta jkot leon li Satanase, taje jaʼ skʼan xal ti xibal sbae xchiʼuk ti chtiʼvane. Akʼo mi jech, li ta Apocalipsis 5:5 jaʼ chkoʼoltasat ta leon li Jesuse, yuʼun xi chichʼ albel skʼoplale: «Jun stsʼunubal li Judae, echʼem stsatsal jech chac cʼu chaʼal león», xi. Pe taje jaʼ skʼan xal stsatsal oʼontonal li leone xchiʼuk ti jaʼ skʼan xal tukʼilale.
13. ¿Kʼusi chchanubtasutik li svolesobil xchʼut pan ta sventa li chʼiel ta mantale?
13 Yoxibal, li Jesuse muʼyuk bu laj yal mi la xa sokes arina li svolesobil xchʼut pane, ti mu xa xtune. Moʼoj, jaʼ noʼox yakal xalbe skʼoplal ti kʼuyelan chichʼ pasel li pane. Li ants ta lokʼolkʼope yolbaj la yakʼ li svolesobil xchʼut pane, vaʼun lek kʼusi kʼot ta pasel yuʼun. Pe kʼelavil, ta skoj ti mukul ta arina li svolesobil xchʼut pane, li antse mu xil kʼuyelan tsmeltsaj talel. Taje jaʼ tsvules ta joltik li vinik ti tstsʼun bekʼ mostasae xchiʼuk ti chvay ta akʼobaltike. Xi laj yal li Jesuse: «Li stsʼunube te ta xlic javuc tal stuc, ta xlic chʼiuc tal, pero mu snaʼ cʼu xʼelan ta xchʼi», xi (Mar. 4:27). ¡Kʼun tajmek kʼuyelan ta koʼoltasel ti kʼuyelan mu xvinaj li chʼiel ta mantale! Akʼo mi mu xkiltik li ta slikebale, pe ta xvinaj ti kʼusi chkʼot ta pasel yuʼune.
14. ¿Kʼusi chchanubtasutik ta sventa chol mantal ti ch-abtej ta skotol arina li svolesobil xchʼut pane?
14 Maʼuk noʼox ti mu xil ta sat krixchanoetik li chʼiel ta mantale, moʼoj, yuʼun jaʼ jech chkʼot ta pasel ta spʼejel Balumil noxtok. Taje jaʼ yan skʼoplal li lokʼolkʼop yakal chkaltike. Li svolesobil xchʼut pane ta x-abtej ta skotol li kʼuyepal arinae, ta yoxpʼisal (Luc. 13:21). Jaʼ me jech ek un, li chol mantal sventa Ajvalilal yuʼun Dios ti jaʼ sventa oyuk li chʼiel ta mantale pukem tajmek, yuʼun batsʼi kʼotem «ta sbejel banamil» li xcholel lekil aʼyeje (Hech. 1:8; Mat. 24:14). ¡Jaʼ jun lekilal chkaʼitik ti ta jkolta jbatik li ta abtelal sventa Ajvalilal yuʼun Dios ti epajem tajmeke!
Nutiʼ ti stsakobil choye
15, 16. 1) Albo ta jaypʼeluk noʼox kʼop skʼoplal li nutiʼ stsakobil choye. 2) ¿Kʼusi skʼan xal li nutiʼ stsakobil choye, xchiʼuk kʼusi skʼoplal xchʼiel Ajvalilal yuʼun Dios chal li lokʼolkʼope?
15 Mu jaʼuk mas tsots skʼoplal ti kʼuyepal krixchanoetik tskʼan chkʼotik ta yajtsʼaklomtak Cristoe, moʼoj, yuʼun ti kʼusi mas tsots skʼoplale jaʼ ti toj lekuk li jchol mantaletike. Li jtos xchʼiel Ajvalilal yuʼun Dios taje jaʼ la skʼan laj yal Jesús ti kʼalal laj yalbe skʼoplal yan lokʼolkʼope; jaʼ li nutiʼ ti stsakobil choye, xi chlike: «Ti cʼu xʼelan chventainvan li Dios te oy ta vinajele, jaʼ jech chac cʼu chaʼal nutiʼ stsacubil choy ti chichʼ tiqʼuel ochel ta yut nabe, te ta stsac tal ep ta chop choyetic», xi (Mat. 13:47).
16 Li nutiʼ stsakobil choy ti jaʼ skʼoplal li chol mantal sventa Ajvalilal yuʼun Diose, ep ta tos choyetik tstsak. Xi to chal batel li Jesuse: «Cʼalal chnoj li nutiʼe, ta sloqʼuesic ta tiʼnab. Te ta xchotiic, ta stʼujic ti bu lequique ta stiqʼuic ochel ta moch. Yan ti bu chopolique ta sjipic batel. Jaʼ jech ta xcʼot ta pasel ta slajebal cʼacʼal. Ta xtal ti jʼalmantaletique, chtal svoqʼuic loqʼuel li bochʼotic chopolic ti te capal xchiʼuc li bochʼotic tucʼ yoʼntonique. Ta sjipic ochel ta cʼocʼ, te ta xcʼot yocʼta sbaic, te xcʼuxet o yeic», xi (Mat. 13:48-50).
17. ¿Kʼusi ora chkʼot ta pasel li chʼakel chal Jesús ta slokʼolkʼop ta sventa li nutiʼ stsakobil choye?
17 ¿Mi jaʼ skʼoplal li slajebal chapanel sventa chijetik xchiʼuk tentsunetik ti vaʼ yelan chichʼik chʼakel kʼalal mi kʼot xaʼox ta ajvalilal Jesuse? (Mat. 25:31-33.) Moʼoj. Li slajeb chapanel taje jaʼo chkʼot ta pasel kʼalal yakal tsots vokolile, yan ti kʼalal chichʼ chʼakel chal ta slokʼolkʼop Jesús ta sventa li nutiʼ ti stsakobil choye jaʼo chkʼot ta pasel «ta slajebal cʼacʼal».b Jaʼ li ora kuxulutik avie, jun yorail ti tstsuts ta mukʼta tsatsal vokolile. Vaʼun chaʼa, ¿kʼusi skʼan xal li xchʼakel krixchanoetik yakal xichʼ pasel avie?
18, 19. 1) ¿Kʼusi abtelal ta sventa xchʼakel krixchanoetik yakal xichʼ pasel li avie? 2) ¿Kʼusi skʼan spas li krixchanoetik ti lek yoʼontonike? (Kʼelo noxtok li tsʼib ta yok vun ta pajina 21.)
18 Li ta nab ti jaʼ li epal krixchanoetike, ta smiyonal noʼox choyetik ta lokʼolkʼop ti tijbatem-o yoʼontonik yuʼun li s-organisasion Jeova avie. Chkʼotik ta sNaʼobil slajel Cristo junantik, chkʼotik ta tsobajel li yantike xchiʼuk lek chaʼiik chchanik Vivlia junantik. ¿Pe mi chakʼik ta ilel ta melel ti jaʼik melel yajtsʼaklomtak Cristoe? Melel onoʼox ti laj yichʼik lokʼesel ta tiʼ nabe. Pe kʼelavil, li Jesuse chal ti jaʼ noʼox chichʼik tikʼel ta moch —ti jaʼ skʼoplal li stsobobbailtak yajtsʼaklomtak Cristoe— li lekil choyetike. Li choyetik ti muʼyuk lekike ta xichʼik chʼayel xchiʼuk ta sjalile ta xichʼik tikʼel ta orno ti xtiltun skʼakʼale, ti jaʼ skʼan xal lajesel ta j-echʼele.
19 Li ta choyetik ti muʼyuk lekike ep tajmek krixchanoetik te ti laj yiktaik xchanel Vivlia xchiʼuk yajrextikotak Jeovae. Te oy jlom kerem-tsebetik noxtok ti muʼyuk onoʼox ta yoʼonton tspasik jech kʼuchaʼal la spas Jesuse, akʼo mi ta utsʼ-alalil yajtsʼaklom Cristo chʼiik tal. Muʼyuk bu la snop chtunik ta stojolal Jeova, o mi tunik ta stojolale ta anil noʼox laj yiktaik (Eze. 33:32, 33).c Pe yoʼ to mu xtal li slajebal chapanele tsots skʼoplal ti xakʼ sbaik ta tikʼel «ta moch» o ta tsobobbail stekel li krixchanoetik ti lek yoʼontonike, xchiʼuk ti teuk oyik-o li ta pojobbail taje.
20, 21. 1) ¿Kʼusi la jchantik ti la jkʼeltik oxtos slokʼolkʼop Jesús ta sventa li chʼiel ta mantale? 2) ¿Kʼusi oy ta avoʼonton spasel?
20 ¿Kʼusi la jchantik ti la jvules ta joltik jlikeluk li kʼusi laj yal ta slokʼolkʼop Jesús ta sventa li kʼusi yakal xchʼie? Li kʼusi la jchantik ta baʼyele jaʼ ti jech kʼuchaʼal jpʼej sbekʼ mostasae, jaʼ jech chʼiem tajmek li kʼusitik sventa Ajvalilal yuʼun Dios ta Balumile. Mu kʼusi xuʼ smak ta be sventa xchʼi batel mas li yabtel Jeovae (Isa. 54:17). Jech noxtok, li buchʼu tsaʼ spojel ta xyaxinal teʼe chabibilik lek ta mantal. Li ta xchibal lokʼolkʼope te la jchantik ti jaʼ chakʼ chʼiel ta mantal li Diose. Jech kʼuchaʼal li svolesobil xchʼut pan ti mukul tskʼatajes skotol li arinae, jaʼ jech mu xvinaj lek li chʼiel ta mantal eke. Li ta yoxibal lokʼolkʼope te laj kiltik ti mu stekeluk chkʼotik ta lekil jchankʼopetik li buchʼutik chchʼamik mantale. Yantike jaʼ jechik kʼuchaʼal li choyetik laj yal Jesuse.
21 ¡Toj lek ta aʼiel ti ep tajmek lekil choyetik yakal xikʼ talel li Jeovae! (Juan 6:44.) Jaʼ jech yakal chakʼ kiltik ti kʼuyepal yakal ch-epaj echʼel ta jujun balumile. Jaʼ staʼo kʼupil kʼoptael Dios skotol taje. Ta sventa ti kʼusi laj xa jchantike, jtekeltik me skʼan stij koʼontontik ta xchʼunel li mantal laj yichʼ alel ta voʼne liʼe: «Ovolajan noʼox ta sob [...,] yuʼun mu xanaʼ bu junucal lec chbat, me jaʼ ti baʼyuc laj atsʼune o me jaʼ ti bu tsʼacal laj atsʼune, o me xchibal lec chbat» (Ecl. 11:6).
[Tsʼibetik ta yok vun]
a Ti kʼuyelan chichʼ chapbel smelolal tana liʼe jelbil xa me, mu xkoʼolaj kʼuchaʼal ilokʼ ta revista La Atalaya 15 yuʼun junio ta 1992, paj. 17-22, xchiʼuk li ta 15 yuʼun marso ta 1976, paj. 173-191.
b Akʼo mi jelel onoʼox jutuk li kʼusi chal Mateo 13:39-43 ta sventa li xcholbel skʼoplal Ajvalilal yuʼun Diose, jmoj skʼakʼalil ta xkʼot ta pasel xchiʼuk li lokʼolkʼop ta sventa li nutiʼ stsakobil choye, jaʼ xkaltik, chkʼot ta pasel ta «slajebal cʼacʼal». Jech-o chichʼ pasel li xchʼakel choyetik ta lokʼolkʼope, jech kʼuchaʼal li tsʼunolajel xchiʼuk li stsobbel sat ta jpastik avi kʼakʼale (La Atalaya 15 yuʼun oktubre ta 2000, paj. 25, 26; «Kichʼtik ta mukʼ li jun noʼox melel Diose», paj. 178-181, par. 8-11).
c ¿Mi jaʼ van skʼan xal ti mu xa lekuk chil anjeletik xchiʼuk ti xchʼayojik xa echʼel stekel li buchʼutik mu xa bu chchanik Vivlia o mu xa bu tstsob sbaik xchiʼuk steklumal Jeovae? Mu jechuk ta melel. Mi oy buchʼu ta sjunul yoʼonton tskʼan tsut echʼel ta stojolal Jeovae, jamal me tiʼna ta stojolal (Mal. 3:7).
¿Kʼusi cha takʼ?
• ¿Kʼusi chchanubtasutik li lokʼolkʼop ta sbekʼ mostasa ta sventa li xchʼiel Ajvalilal yuʼun Dios xchiʼuk li chabiel ta mantale?
• ¿Kʼusi jaʼ skʼoplal li svolesobil xchʼut pan ta lokʼolkʼope, xchiʼuk kʼusi melel ta sventa xchʼiel Ajvalilal yuʼun Dios laj yakʼ ta chanel li Jesuse?
• ¿Kʼusi jtosukal skʼoplal sventa xchʼiel Ajvalilal yuʼun Dios laj yichʼ alel li ta lokʼolkʼop ta sventa li nutiʼ stsakobil choye?
• ¿Kʼusi skʼan jpastik sventa teukutik-o li ta jtsop krixchanoetik ti tsobbilik ta moche?
[Lokʼol ta pajina 18]
¿Kʼusi chchanubtasutik li lokʼolkʼop ta sbekʼ mostasa ta sventa li xchʼiel Ajvalilal yuʼun Diose?
[Lokʼol ta pajina 19]
¿Kʼusi ta jchantik li ta lokʼolkʼop ta svolesobil xchʼut pane?
[Lokʼol ta pajina 20]
[Lokʼol ta pajina 21]
¿Kʼusi skʼan xal li xchʼakel lekil choyetik xchiʼuk li chopol choyetike?