Li kʼusi spas kuʼuntike jaʼ me chakʼ jmuyubajeltik

«¡MUʼYUK xkʼot ta pasel kuʼun xtok!» ¿Jayib velta jech kalojtik ta skoj ti muʼyuk xkʼot ta pasel kuʼuntik li kʼusi jnopojtike? Jun meʼil yajtsʼaklom Cristoe yikʼaluk van chlub ta jyalel chaʼi ta skoj ti skʼan tajmek chabiel li sneneʼ ti jaʼ to vokʼeme xchiʼuk chopol chaʼi ti chʼabal xa yorail yuʼun li kʼusitik ta sventa mantale. Jun yajtsʼaklom Cristo xtoke yikʼaluk van mu kʼusi xtun-o chaʼi ta skoj ti kʼuyelan chʼi tale xchiʼuk tsnop ti mu kʼusi mas spas yuʼun ta tsobobbaile. Yan ermana ti oy xa sjabilale yikʼaluk van chopol tajmek chaʼi ta skoj ti mu xa spas yuʼun li abtelaletik ta sventa Dios kʼuchaʼal tspas toʼoxe, ti kʼalal oy toʼox yipale xchiʼuk ti xuʼ toʼox chaʼi yuʼun stuke. Christiane, ti mu spas yuʼun li kʼusi tskʼan ta stojolal Dios ta skoj ti kʼuyelan xkuxlejal ta yutsʼ yalale, xi chale: «Bakʼintike chi och ta okʼel kʼalal chkaʼi jun mantal ti bu tstijik oʼontonal ti akʼo jlikestik li abtelal ta prekursore», xi.

¿Mi stsal kuʼuntik li kʼusitik taje? Kʼusi spasoj jlom yajtsʼaklomtak Cristo sventa oyuk noʼox smelolal stsakik ta venta ti kʼu yelan li xkuxlejalike? ¿Kʼusi sbalil ta jtatik kʼalal oy noʼox smelolal li kʼusi ta jkʼan ta jtatike?

Jaʼuk noʼox me jpastik li kʼusi spas kuʼuntike

Xi tojobtasvan li jtakbol Pabloe: «Jʼechʼel me cuxetuc o avoʼnton acotolic ta stojol li Cajvaltique. Chacalboxuc yan velta, cuxetuc o me avoʼntonic», xi. Laje xi laj yal ti kʼuxi xuʼ xkuxetuk-o koʼontontike: «Acʼbeic yil scotol cristianoetic ti oy xa slequil avoʼntonique [slamajemal avoʼontonik]», xi (Fili. 4:4, 5). Jaʼ jech, sventa jkʼupin li kabteltik ta stojolal Diose xchiʼuk ti junuk noʼox koʼontontik yuʼune, skʼan me ta rasonuk noʼox li kʼusi ta jkʼan ta jtatike xchiʼuk ti jaʼuk noʼox jech jpastik ti kʼuyelan xuʼ ta jkuxlejaltike xchiʼuk ti xi jtojob spasele. Mi ta jkʼan ta jtatik ta jyalel li kʼusi mu onoʼox jtatike ta me xlik jvul-o koʼontontik. Melel onoʼox xtok un, taje maʼuk me skʼan xal ti chkichʼ jbatik ta jyalel ta kʼuxe. Ti jaʼ xa ta jtunes jvokoltik sventa ta jpak-o jkʼoplaltik sventa mu xa masuk xi jlokʼ ta chol mantal ti akʼo mi xuʼ to kuʼuntik jutukuke.

Kʼusiuk ti vokolal ta jnuptantike, li Jeovae tskʼan ti akʼo xkakʼbetik li kʼusi mas leke, ti ta sjunuluk koʼontontik xi jtun ta stojolale (Col. 3:23, 24). Yuʼun mi moʼoje, muʼyuk me yakal ta jpastik li kʼusi laj kalbetik Jeova kʼalal laj kakʼ jbatik ta stojolale (Rom. 12:1). Jech noxtok, ta me jmaktik ta be li jun oʼontonal xchiʼuk li muyubajel chkaʼitik jech kʼuchaʼal chaʼiik li buchʼutik ta sjunul yoʼonton chtunike xchiʼuk li yantik bendision tstaike (Pro. 10:22).

Li jpʼel kʼop jelubtasbil ta Vivlia kʼuchaʼal «slequil avoʼntonique», ti xie, xuʼ jaʼ skʼoplal ti buchʼu oy ta yoʼonton xchiʼile. Jaʼ skʼan xal «oy slamajemal yoʼnton» (Sant. 3:17, Ch). Li jpʼel kʼop taje maʼuk skʼan xal ti persa skʼan chʼunel skotol li kʼusi chichʼ alele. Jaʼ yuʼun chaʼa, li jun krixchano ti oy noʼox srasone chakʼ lek venta ti oy noʼox spajeb li kʼusi spas yuʼune. ¿Mi tsots taje? Veno, li yantike mu tsotsuk chaʼiik ti oyuk slekil yoʼontonik ta stojolal li yantike, pe jaʼ tsots chaʼiik li ta stojolal stukike. Jnoptik avaʼi ta sventa liʼe: mi chkakʼtik venta ti chlubtsaj xa tajmek li jun kamigotik ta skoj li kʼusitik tspase, ¿mi mu tauk van xkalbetik ti akʼo sjel li xkuxlejale? Jech ek li ta jtojolaltike, skʼan xkakʼtik venta li kʼusi chakʼ kiltik ti mu xa spas kuʼuntik mase (Pro. 11:17).

Melel onoʼox, li buchʼutik persa onoʼox tspasik li kʼusi ch-albatik yuʼun stot smeʼik ta sbikʼtalike jaʼ me mas tsots chaʼiik ta yakʼel venta li kʼusi noʼox spas yuʼunike. Oy yantike persa skʼan lek spasik skotol ti kʼusi ch-albatik sventa lek x-ilat yuʼun stot smeʼik kʼalal bikʼitik toʼoxe. Mi jaʼ jech laj kil ta jbikʼtaltike, yikʼaluk me mu jechuk jnoptik kʼuchaʼal tsnop Jeova ta jtojolaltike. Pe mu me xchʼay ta joltik ti skʼanojutik ta skoj ti chi jtun ta stojolal ta sjunul koʼontontike. Li Vivliae jamal chalbutik ti «snaʼoj [Jeova] ti cʼu xʼelan pasbilutique; snaʼ ti lum achʼelutic noʼoxe» (Sal. 103:14). Akʼo mi snaʼoj ti oy noʼox spajeb kʼusi spas kuʼuntike, skʼanojutik yuʼun jaʼ ti chi jtun ta stojolal ta sjunul koʼontontike. Mi jnaʼojtik ti maʼuk jun simaron ajvalil li Diose, mas me kʼun chkaʼitik ti xkakʼtik venta ti oy noʼox spajeb li kʼusi spas kuʼuntike xchiʼuk ti muʼyuk bu ta jkʼan ta jpastik li kʼusi mu spas kuʼuntike (Miq. 6:8).

Akʼo mi nabil taje, oy yantik ti tsots chaʼiik ti oyuk noʼox smelolal li kʼusi tspasike. Mi jaʼ jech chavaʼie, ¿kʼu yuʼun mu xa kʼanbe tojobtasel junuk avamigo ti lek yij ta mantale xchiʼuk ti lek xa yojtikine? (Pro. 27:9.) Jech kʼuchaʼal liʼe, li voʼote yikʼaluk van cha kʼan cha tun ta prekursor regular. Taje toj lek me li kʼusi cha kʼan cha tae. Pe yikʼaluk van tsots chavaʼi stael. Li avamigoe yikʼaluk van oy kʼusi xakʼ anop ti jech xavikta jlomuk li kʼusi ta akuxlejale. O xuʼ van xakʼ avil xtok mi jaʼ van yorail ti xlik abtejan ta prekursor ta skoj ti kʼusitik abainoj ta avutsʼ avalale. Jmoj cha nopik mi spas avuʼun li abtelal taje o mi oy kʼusi skʼan xa jel sventa spas avuʼun. Ta sventa li yajtsʼaklomtak Cristo ti nupunemike, jaʼ me li malalil ti mas stakʼ skolta li yajnil sventa jechuk spas echʼel ti bu kʼalal xakʼ li xkuxlejale. Mi tskʼan chepajes yabtel junuk u li antse, lek ti xalbe ti akʼo xkux lek yoʼ to mu slikese. Jaʼ me jech oy lek yipal chaʼi xchiʼuk ti tskʼupin li chol mantale.

Akʼo ta avoʼonton li kʼusi spas avuʼune

Yikʼaluk van mu xa spasbe avuʼun mas yabtel Jeova ta skoj li chamel anuptanoje o ta skoj ti oy xa ajabilale. O mi oy avalab anichʼnabik ti bikʼitik toe, yikʼaluk van cha nop ti muʼyuk cha tabe lek sbalil li xchanel aVivlia ta atuke xchiʼuk li tsobajeletik ta skoj ti skʼan xa chʼakbe mas yorail xchiʼuk ti skʼan xavakʼ avipal ta skʼelel li avalab anichʼnabe. ¿Pe mi jaʼ van oy tajmek ta ajol ti mu xa kʼusi spas mas avuʼune ti jaʼ mu xa xavakʼ venta li kʼusi spas to avuʼune?

Jaʼ jechtik ikʼot ta stojolal jun jlevita ta voʼneal Israel. Akʼo mi staoj jun matanal, ti chtun chib xemana ta jabil li ta chʼulnae, li stuke tskʼan teuk-o chtun yoʼ bu oy skajleb matanale, akʼo mi lek onoʼox ti jech oy ta yoʼontone, pe mu xuʼ yuʼun (Sal. 84:1-3). ¿Kʼusi koltaat-o sventa mu xat yoʼonton li jlevitae? Jaʼ ti laj yakʼ venta ti stuk noʼox jech matanal staoj ti te oy jun kʼakʼal ta yamakʼil chʼulane (Sal. 84:4, 5, 10). Jaʼ me jech ek un, skʼan me oyuk sbalil chkiltik li kʼusi spas to kuʼuntike, mu stakʼ ti jaʼuk xa noʼox jnopilantik li kʼusi mu xa spas kuʼuntike.

Jnopbetik skʼoplal Nerlande, jun yajtsʼaklom Cristo ta Canadá ti skotol xa ora chotol ta xila oy syantaile. Ta skoj ti jech ipe, toj jutuk chaʼi li kʼusi tspas ta yabtel Diose. Pe kʼelavil, jelel li kʼusi snopoj toʼox kʼalal la spas ta xcholob mantal jun mukʼta pʼolmajebal ti nopol yiloj snae. Xi chal li Nerlande: «Te chi choti ta jxila ti oy syantail ta stsʼel jun chotlebal li ta mukʼta pʼolmajebale. Kʼupil sba chkaʼi ta xcholbel mantal li buchʼu chtal chotiikuk sventa chkuxik jlikeluke», xi. Chakʼ tajmek muyubajel chaʼi li jtos chol mantal ti tsots skʼoplal taje.

Paso ti kʼuyepal xuʼ avuʼune

Jnopbetik skʼoplal jkot varko ti oy spokʼale, ti chtuchʼ ta sjunul yipal li nab ta skoj ti xujbil batel ta ikʼe. Pe kʼelavil, ta anil noʼox chlik jun tsatsal ikʼal voʼ, vaʼun li kapitan ta varkoe persa skʼan syalesbe li spokʼale. Akʼo mi mu stakʼ spajtsan li tsatsal ikʼal voʼe, xuʼ jaʼ xa jech stsʼot li svarko ti kʼuyelan stakʼ chile. Jaʼ me jech ek un, oy bateltik ti mu spas kuʼuntik ta mantal li kʼusi ta jnuptantik ti xkoʼolaj kʼuchaʼal tsatsal ikʼal voʼe. Akʼo mi jech, xuʼ spas kuʼuntik ta mantal jutukuk li jvokoltik ta jkuxlejaltik mi jaʼ noʼox ta jpastik li kʼusi stakʼ chkiltike xchiʼuk ti ta jeltik ti kʼuyelan ta jtunestik li yip jbekʼtaltike, jnopbentik xchiʼuk li koʼontontike. Mi jech ta jpastike oy-o me muyubajel xchiʼuk jun oʼontonal chkaʼitik ti chi jtun ta stojolal Diose (Pro. 11:2).

Jkʼelbetik jayibuk skʼelobil. Mi chʼabal noʼox kipal chkaʼitik pe ti oy jtsobajeltik ta ikʼ osile, mas me lek ti mu jlubtsan jbatik li ta kʼakʼaltike sventa xi jbat li ta tsobajele xchiʼuk ti jkʼupintik li xchiʼinel ta loʼil ermanoetike. O mi mu xuʼ xlokʼ ta chol mantal ta naetik li jun ermana ta skoj ti ip yole, xuʼ xikʼ talel junuk ermana ta sna sventa xcholik mantal ta telefono kʼalal vayal li yole.

¿A ti mi mu xuʼ avuʼun xchanel skotol li mantal chichʼ kʼelel ta tsobajel ta skoj li kʼusi cha nuptane? Mi jaʼ jeche jaʼ noʼox chano ti kʼuyepal xuʼ avuʼune, pe chano me lek un. Ta melel, xuʼ xi j-abtej-o xchiʼuk jech oy-o muyubajel kuʼuntik mi ta jeltik un jutukuk li kʼusi ta jkʼan ta jtatike.

Melel onoʼox, oy bakʼintik ti skʼan stsatsal koʼontontik xchiʼuk kipaltike. Jech kʼuchaʼal liʼe, li Serge xchiʼuk Agnès ta Franciae ep kʼusitik la sjelik li kʼusitik toʼox snopoj tspasike. «Kʼalal laj kaʼikutik ti xchiʼuk xa yol li Agnèse —xi li Serge—, te nel-o skʼoplal laj kaʼikutik li misioneroale», xi. Li Serge ti oy chaʼvoʼ stsebetik avi ti kʼupilik sba tajmeke, xi chal li kʼusi la spasik xchiʼuk yajnile: «Ta skoj ti mu xa xuʼ xi tunkutik ta yan balumile, laj kakʼ ta koʼontonkutik ti chi tunkutik kʼuchaʼal misioneroal ta jlumalkutike, jaʼ yuʼun li batkutik ta jun tsobobbail ti yan-o kʼop chkʼopojike», xi. ¿Kʼusi kʼotem ta pasel ti jech la spasike? Xi chal li Serge: «Jtunel tajmek chkaʼi jbakutik li ta tsobobbaile», xi.

Jun ermana ti mas xa ta 70 sjabilal ti Odile sbie, ti ta Francia nakal eke, ip ta artrosis chamel ta sjol yakan, jaʼ yuʼun mu xkuch yuʼun ti jal vaʼale. Chat tajmek yoʼonton li Odile ta skoj ti mu xa x-akʼe xchol mantal ta naetik yuʼun xchamele. Pe muʼyuk bu xikta sba, moʼoj, yuʼun ti kʼusie jaʼ lik spas ti kʼusi noʼox spas yuʼune, lik xchol mantal ta telefono. «Kʼun tajmek ta pasel xchiʼuk toj echʼ xa noʼox la jkʼupin ti muʼyuk toʼox jech jnopoje», xi. Li jtos kʼuyelan chol mantal taje, jaʼ la xchaʼkʼupin-o li muyubajel chakʼ yabtel Diose.

Ti oy noʼox smelol li kʼusi jkʼelojtike chakʼ talel bendisionetik

Xuʼ me mu masuk jta jvokoltik, pe sventa jeche skʼan me ta smeloluk noʼox ti kʼusi ta jkʼan ta jpastike. Mi jaʼ ta jkʼan ta jtatik li kʼusi stakʼ noʼox taele, xuʼ me jtatik, akʼo mi oy noʼox spajeb li kʼusi spas kuʼuntike. Jaʼ me jech jun koʼontontik yuʼun li kʼusi spas kuʼuntike, akʼo mi jutuk noʼox yilel, pe xi jmuyubaj yuʼun (Gál. 6:4).

Jech xtok, mi ta rason noʼox ti kʼusi ta jkʼanbe jbatike, jaʼ me jech ta jpastik ta stojolal kermanotaktik xtok xchiʼuk mas me oy ta joltik ti oy noʼox spajeb li kʼusi spas yuʼunike. Taje jaʼ me tskoltautik ta yalbel koliyal li kʼusitik tspasik ta jtojolaltike, xchiʼuk xtok, jaʼ me jech ta jkolta jbatik ta jujuntal xchiʼuk ti kʼux chkaʼibe jba jvokoltike (1 Ped. 3:8). Vuleso me ta ajol ti kʼanvanem tajmek li jTotik Jeovae, yuʼun muʼyuk bu tskʼanbutik li kʼusi mu spas kuʼuntike. Vuleso me ta ajol xtok mi ta rason noʼox li kʼusi cha kʼan cha tae, xa muyubaj noʼox me xchiʼuk jun noʼox me avoʼonton yuʼun li abtelal yuʼun yajtsʼaklomtak Cristoe.

[Lokʼol ta pajina 29]

Sventa jkʼupintik li abtelal yuʼun Dios xchiʼuk ti jun noʼox koʼontontik yuʼune, li kʼusi ta jkʼan ta jtatike skʼan me oyuk noʼox srasonal xchiʼuk ti jech jpastik li kʼuyelan xuʼ ta jkuxlejaltike xchiʼuk li kʼusi spas kuʼuntike

[Lokʼol ta pajina 30]

Li Nerlande xmuyubaj noʼox ti kʼuyepal xuʼ xchol mantale

[Lokʼol ta pajina 31]

Ti xkoʼolaj kʼuchaʼal tsatsal ikʼal voʼ li vokolil ta jkuxlejaltike jaʼ me chakʼ akʼo jpastik ti kʼuyepal xuʼ kuʼuntike

[Lokʼol ta pajina 31]

© Wave Royalty Free/age fotostock

[Lokʼol ta pajina 32]

Li Serge xchiʼuk Agnèse xmuyubajik ti jech la snopik ta achʼ li kʼusi tspasike