Chʼikutik batel ta sjunul koʼontontik ta «yotquinel [lek] li Diose»

TA JKʼANTIK ti lek xilutik Jeova jkotoltik li jchʼunolajelutike. Jaʼ yuʼun ta jkʼantik ti yantikuk xlekub batel li xchʼunel koʼontontike xchiʼuk ti ta sjunuluk koʼontontik xi j-abtejutik li ta chʼul abtelale. Pe li jtakbol Pabloe ta spʼijubtasutik ta sventa li kʼusi xibal sba la snuptanik li judioetik ta skʼakʼalile: «Ti scotol yoʼnton tscʼan chtunic yuʼun Diose, pero mu snaʼbeic smelol cʼu xʼelan xuʼ chtunic yuʼun», xi (Rom. 10:2). Jamal lek ta aʼiel chaʼa, li xchʼunel koʼontontik xchiʼuk ti kʼuyelan chkichʼtik ta mukʼ Jeovae maʼuk ta jech noʼox. Moʼoj, yuʼun ti kʼusie jaʼ ti skʼan xkojtikintik lek li Jpasvaneje xchiʼuk li kʼusi tskʼane.

Li ta yan skartatak Pabloe, te chal kaʼitik ti snitoj sba skʼoplal li saʼel mas yojtikinel kuʼuntik xchiʼuk li talelaletik ti lek chil Diose. Li Pabloe la skʼan ta orasion ti akʼo snaʼik lek kʼusi tskʼan yoʼonton Dios li jchʼunolajeletike, vaʼun xi laj yale: «Yuʼun jech xuʼ lec tucʼ chaxanovic ta sventa ti oyoxuc ta stojol li Cajvaltique, jech xuʼ chapasic li cʼusitic lec chile. Jech lec tsatin batel li lequil abtel chapasique, jech chachʼiic batel ta yotquinel [lek] li Diose», xi (Col. 1:9, 10). ¿Pe kʼu yuʼun skʼan «yotquinel [lek] li Diose»? ¿Xchiʼuk kʼu yuʼun ti skʼan x-epaj li yojtikinobil kuʼuntike?

Li yibel xchʼunel koʼontontike

Li kʼusi yibelinoj li xchʼunel koʼontontike jaʼ li yojtikinel lek li Diose xchiʼuk li kʼusi tskʼan ti te tsʼibabil ta Vivliae. Ti chʼabaluk taje, li xchʼunel koʼontontik ta stojolal Jeovae xkoʼolaj kʼuchaʼal xi jtajin spasel un chʼin na ta vun ti chlom ta anil mi tal jutukuk ikʼe. Li Pabloe chal kaʼitik ti akʼo jpastik li chʼul abtelal ta stojolal Dios ta «spʼijil rasonal» xchiʼuk ti akʼo «x-achʼub batel li cʼusi [ta jnoptike]» (Rom. 12: 1, NM, 2). Jaʼ tskoltautik ta spasel mi ta jchanolantik li Vivliae.

Ewa ti chtun ta prekursora regular te ta Poloniae, xi chal kaʼitike: «Ti jech mu jchanolan li sKʼop Diose, ta xpaj ta be kuʼun jechuk li yojtikinel Jeovae. Mu xa jechuk likel jtalelal kʼuchaʼal li yajtsʼaklom Cristoe xchiʼuk chkʼunib li xchʼunel koʼonton ta stojolal Diose. Chi laj li ta mantale», xi. ¡Mu me jechuk xkʼot ta jtojolaltik! Jkʼelbetik skʼoplal junuk ti buchʼu laj yepajes li yojtikinobil lek yuʼun ta sventa Jeovae, xchiʼuk ti jaʼ lek ilat-oe.

«Toj lec jcʼanoj ta jyalel li amantaltaque»

Li jtsʼibajom yuʼun Salmo 119, ta nichimal kʼop chal kaʼitik ti kʼuyelan chil li smantaltak Jeovae, li chanubtaseletike xchiʼuk li pʼijubtaseletike. Xi la stsʼibae: «Xcuxet noʼox coʼnton yuʼun li cʼusitic avaloje. [...] Jaʼ muiben o xcaʼay snopel li chanubtaseletic avuʼune», xi. Xchiʼuk xi to laj yale: «Li vuʼune toj lec jcʼanoj ta jyalel li amantaltaque; jaʼ batem o coʼnton snopilanel sbejel cʼacʼal», xi (Sal. 119:16, 24, 47, 48, 77, 97).

Li chaʼpʼel kʼop ti «lec jcʼanoj» xchiʼuk ti «batem o coʼnton snopilanel» ti xie, jaʼ skʼan xal ti chichʼ nopbel smelolal li sKʼop Diose xchiʼuk ti ta jkʼupintike. Taje jaʼ chakʼ kiltik ti skʼanoj tajmek xchanbel smantal Dios li jtsʼibajom yuʼun salmoe. Mu ta jechuk noʼox laj yaʼi ta yoʼonton, moʼoj, yuʼun «batem o [y]oʼnton» ta yaʼibel smelolal li skʼoptak Jeovae. Jech kʼuchaʼal chkiltike, tskʼan chojtikin tajmek li Diose xchiʼuk li kʼusi tskʼan yoʼontone.

Jamal xkiltik ti ta sjunul yoʼonton skʼanojbe sKʼop Dios li jtsʼibajom yuʼun salmoe. Xi xa jakʼbe abae: «¿Mi jaʼ jechun taj eke? ¿Mi toj kʼupil sba chkaʼi skʼelel xchiʼuk xchanel jujun kʼakʼal li Vivliae? ¿Mi chkakʼ kipal ta spasel jech xchiʼuk mi ta jkʼanbe akʼo skoltaun Jeova ta yaʼibel smelolal li kʼusi ta jchane? Mi tana xi cha takʼe, yakal me cha «[chʼi] batel ta yotquinel [lek] li Diose».

Xi chal li Ewa: «Chkakʼbe yipal ta slekubtasel ti kʼuyelan chi chanunaje. Ti kʼalal laj kichʼ li foyeto Veamos “la buena tierra”, ta jtunes onoʼox jutuk mu skotoluk velta kʼalal ta jchan jVivliae. Jech xtok, chkakʼ persa ti ta jtunes mas li Perspicacia para comprender las Escrituras xchiʼuk li yantik bu xuʼ jsabetik smelolal loʼile».

Jkʼelbetik skʼoplal jun nupul-tsʼakal ek: Wojciech xchiʼuk Małgorzata ti ep kʼusi sbainojik ta yutsʼ yalalike. ¿Kʼuxi yakʼojbeik yorail li kʼusitik tspasik ti te smakojbe skʼoplal yuʼunik li xchanel Vivlia eke? «Ta jujuntal ta jchʼakbekutik yorail sventa ta jchan ta jtukkutik li sKʼop Diose. Vaʼun, kʼalal ta jchan jvunkutik ta jkotolkutike xchiʼuk kʼalal chi loʼilajkutike, chkalbekutik skʼoplal li kʼusi tsots skʼoplal la jchankutike o ti tspat koʼontonkutik chkilkutike.» Maʼuk noʼox xmuyubajik-o ti toj lek chchan sVivliaike, moʼoj, yuʼun jaʼ jech «[chchʼiik] batel ta yotquinel [lek] li Diose».

Oyuk me ta koʼontontik xchanel mas kʼalal ta jkʼel jVivliatike

Li jchʼunolajelutike jnaʼojtik ti Diose «tscʼan ti acʼo coluc scotol cristianoetique, xchiʼuc ti acʼo lic yotquinic li cʼusi melele» (1 Tim. 2:3, 4). Taje jaʼ skʼan xal ti yuʼun tsots skʼoplal ti jkʼeltik li Vivliae xchiʼuk ti xkakʼtik persa xkaʼibetik lek smelolale (Mat. 15:10). Jtos ti kʼusi tskoltautik ta stael taje jaʼ ti ta sjunuluk koʼontontik ta jkʼan ta jchantik yan kʼusitik kʼalal ta jchantik li Vivliae. Jaʼ jech laj yakʼ ta ilel stalelalik li jchʼunolajeletik ta Berea kʼalal cholbatik mantal yuʼun jtakbol Pabloe: «Ta scotol yoʼntonic laj yaʼibeic scʼop li Pabloe. Scotol cʼacʼal la sqʼuelic li scʼop Diose, yuʼun tsqʼuelic me xcoʼlaj xchiʼuc cʼusi ta xchol li Pabloe» (Hech. 17:11).

¿Mi jech cha pas kʼuchaʼal li jchʼunolajeletik ta Berea ti «ta scotol yoʼntonic laj [yaʼiike]»? ¿Mi jaʼ ta jsaʼtik ti bu muʼyuk kʼusi mas chchʼay-o koʼontontik kʼalal ta jchan jVivliatike? Xuʼ me xkakʼbetik yipal ta xchanbel stalelal li jchʼunolajetik ta Bereae, akʼo mi muʼyuk toʼox ta jkʼupintik li xchanel vune. Melel onoʼox chaʼa, ep krixchanoetike mas xa jutuk tskʼelik xchiʼuk chchanik vun kʼalal chmalubike, pe taje mu me stakʼ jech spasik li yajtsʼaklomtak Cristoe. Jtekeltik, mi kerem-tsebutik to o mi mol-meʼelutik xa, skʼan me xkakʼtik persa ti mu kʼusi xchʼay koʼontontik kʼalal chi jchanunaje. Kʼalal yakal cha kʼel batel o yakal cha chanunaj echʼele, ¿kʼu yuʼun mu xa saʼ li kʼusitik mas tsotsik skʼoplal ti xuʼ xa loʼiltabe yan krixchanoe? ¿Kʼu yuʼun mu xa nop ti xa loʼiltabe anup achiʼil o junuk ermanoe? Taje jaʼ me tskoltaot ti xkom lek ta ajol avoʼontone, jech noxtok, ta me stabeik sbalil li yantike.

Chanbo stalelal Esdras kʼalal cha chan aVivliae, jun yajtunel Dios ti «jaʼ noʼox oy ta yoʼnton o ta xchan lec li smantaltac Mucʼul Diose» (Esd. 7:10). ¿Kʼuxi xuʼ xa pas? Ti kʼusi baʼyel skʼan xa pase jaʼ ti xa chapan lek ti bu cha chanunaje. Mi laje chotanaba xchiʼuk kʼanbo Jeova ti akʼo xakʼbot apʼijile xchiʼuk ti xa sbeiltase (Sant. 1:5). Vaʼun xi xa jakʼbe abae: «¿Kʼusi ta jkʼan ta jchan li avie?». Saʼo li kʼusitik mas tsots skʼoplal kʼalal yakalot skʼelele. Jech xtok, ¿kʼu yuʼun mu xa tsak ta vun? Xchiʼuk yikʼaluk van cha kʼan chavakʼbe senyail yan kʼusitik ti mu xa kʼan xa chʼay ta ajole. Nopo kʼuxi xuʼ xa tunes kʼalal oy kʼusi cha nop chapase, ta chol mantal o kʼalal cha patbe yoʼonton li ermanoetike. Mi laj avoʼonton xchanele, vuleso ta ajol skotol. Jaʼ me jech xuʼ xkom ta ajol li kʼusi laj achane.

Xi chal li Ewa laj kalbetik skʼoplale: «Kʼalal ta jkʼel li Vivliae ta xkakʼ venta ti bu chtakvan batel ta yan tekstoetike, ta jsaʼ ta Índice de las publicaciones Watch Tower xchiʼuk ta CD-ROM Watchtower Library. Jech noxtok, ta jtsak ta vun sventa jtunes ta chol mantal.

Oy junantik ti jal xa chchanbeik lek smelolal li Vivliae xchiʼuk ti yakʼoj tajmek ta yoʼontonik li kʼusitik sventa mantale (Pro. 2:1-5). Manchuk mi ep kʼusitik sbainojik xchiʼuk ti vokol chaʼiik ta xchʼakbel yorail ti chchan sVivlia stukike. Mi jaʼ jech ta atojolal taje, ¿kʼusi van stakʼ xa jel ti kʼu yelan achapanojbe yorail li kʼusitik cha pase?

¿Bu ta chʼakbel lokʼel yorail?

Melel onoʼox, kʼalal oy kʼusi ta jkʼupintik spasel jtosuke mas me kʼun ta chʼakbel yorail chkaʼitik. Ep buchʼutik yakʼojik venta ti kʼalal jaʼ tsnop tstaik li kʼusi stakʼ noʼox taele, jech kʼuchaʼal li skʼelel sliklej Vivliae, chlik skʼupinik li xchanel Vivlia ta stukike. Melel onoʼox ti tsots yileluk ti bu toj ep chalbe skʼoplal ti kʼuyelan sjel-stsʼak sba tal li kuxlejale, ti bikʼitik xa chalbe skʼoplal li voʼneal chʼulnae o li albil kʼopetik ti tsots ta aʼibel smelolal ti chʼabal kʼusi tsots skʼoplal ta sventa jkuxlejaltik yileluke. Akʼo mi jech, oy kʼusi stakʼ xa pas sventa xa ta li kʼusi anopoje. Jech kʼuchaʼal liʼe, kʼalal skʼan toʼox xa kʼel jvokʼuk Vivlia ti tsots ta aʼibel smelolal yilele, lek ti xa kʼelbe li stsʼak sloʼilale o ti kʼuxi xuʼ xkakʼ ta jkuxlejaltike. Li aʼyejetik taje te cha ta ta livro “Toda Escritura es inspirada de Dios y provechosa”, ti jutuk mu ta 50 kʼopetik lokʼeme.

Jech noxtok, mas kʼupil sba ti kʼalal ta jkʼel ta jnopbentik li kʼusi ta jchantik ta Vivliae, jaʼ xkaltik, ti jkʼelojtik xa yileluk li krixchanoetike xchiʼuk ti kʼusi chkʼotanuk ta pasele. Mi jech cha pas taje, mas me kʼupil chavaʼi ti kʼalal cha chanunaje xchiʼuk mas me ep sbalil cha tabe. Jaʼ me jech mas oy ta avoʼonton ta xchʼakbel yorail li xchanel avune xchiʼuk mas me kʼun chavaʼi ti xanopes-o aba xchanel jujun kʼakʼal li aVivliae.

Melel onoʼox chaʼa, li kʼusi laj yichʼ alele ta skoltautik ta jujuntal, ¿pe kʼusi xuʼ spasik li utsʼ-alaliletik ti chʼabal noʼox xokolike? Ti kʼusi baʼyel xuʼ xa pasike, ¿kʼu yuʼun mu xa chotan abaik vaʼun xa loʼiltaik lek ti oy sbalil li chanun ta utsʼ-alalile? Kʼalal jech cha loʼilajike yikʼaluk van oy kʼusitik lek xkʼot ta nopel avuʼunik, jech kʼuchaʼal ti xuʼ mas xa sob xa likik sventa cha chanik jutukuk li Vivliae, akʼo mi jayib noʼox kʼakʼal ta xemana. O yikʼaluk van xavakʼik venta ti skʼan xa chaʼchapanik li kʼusitik cha pasik ta utsʼ-alalile. Jech kʼuchaʼal liʼe, oy jlom utsʼ-alaliletike toj lek chilik ti chchanik li teksto ta sventa jujun kʼakʼale o ti chchanik jutukuk Vivlia kʼalal chlaj yoʼontonik ta veʼele. Kʼalal skʼan to skusik li mexae o ti chbat spasik yantik kʼusitike, baʼyel chchan sVivliaik lajunebuk o voʼlajunebuk minuto o mi moʼoje jaʼ tskʼelik ti kʼuyepal skʼan chanel Vivlia jujun xemanae. Akʼo mi vokol jutuk li ta slikebale, pe mu me jaluk chlik nopuk xaʼi li utsʼ-alalile xchiʼuk ta me xlik skʼupinik.

Li Wojciech xchiʼuk Małgorzata xi chalik ti kʼusi koltaat-o li yutsʼ yalalike: «Ep toʼox tajmek ta jchʼay jkʼakʼalkutik ta spasel kʼusitik ti chʼabal tsotsik skʼoplale. Jaʼ yuʼun la jnopkutik ti ta jutukajesbekutik yorail li stakel echʼel mensajeetik ta komputadorae xchiʼuk ti ta jchʼay koʼontonkutik ta kʼusitike. Jech xtok, laj kakʼbekutik lek skʼakʼalil xchiʼuk yorail sventa lek xi chanunajkutik», xi. Melel, muʼyuk tsutes yoʼontonik ti jech la spasike, li voʼot xchiʼuk avutsʼ avalal eke muʼyuk me bu cha sutes avoʼontonik mi jech cha pasike.

Ep sbalil ti ch-ayan lek yojtikinel kuʼuntike

Mi ta jtsaktik lek ta mukʼ li xchanel sKʼop Diose, «lec [me] tsatin batel li lequil abtel» ta jpastike (Col. 1:10). Vaʼun ta me xilik echʼel li yantik ti yakal chi jchʼi ta mantale. Jech xtok, lekutik me ta mantal xchiʼuk lek me xkaʼibetik smelolal li kʼusitik melel ta Vivliae. Ta yutsil noʼox me li kʼusi ta jnop ta jpastike xchiʼuk li tojobtaseletik chkakʼtike, jech xtok, muʼyuk me chi jbat ta mas kʼuchaʼal tspasik li krixchanoetik ti mu xojtikinik lek li kʼusi chal Vivliae. Pe ti kʼusi mas tsots skʼoplale jaʼ ti chi jnopaj mas ta stojolal Jeovae. Mas me ta jkʼanbetik li stalelale, xchiʼuk te me chvinaj ti kʼalal chkalbetik skʼoplale (1 Tim. 4:15; Sant. 4:8).

Kʼuk yelan li jabilaltike o ti kʼusitik xkojtikintike, kakʼbetik me yipal ta skʼupinbel li sKʼop Jeovae, jchanolantik lek xchiʼuk ta sjunuluk me koʼonton jchantik li kʼusitik ta Vivliae. Xuʼ me jpat lek koʼontontik ti muʼyuk chchʼay ta yoʼonton Jeova ti chkakʼbetik yipale (Heb. 6:10). Ta melel, toj ep me chakʼ jmotontik ti jech ta jpastike.

[Lokʼol ta pajina 13]

Sbaliltak Kʼalal Ch-epaj «Yotquinel [Lek] Li Diose»

Ta me stsatsub li xchʼunel koʼontontike xchiʼuk oy me slekil yutsil jtalelaltik ta stojolal li Jeovae (Col. 1:9, 10)

Ta me x-ayan mas jpʼijiltik xchiʼuk ta me jnaʼtik skʼelel kʼusi lek xchiʼuk kʼusi chopol kʼalal oy kʼusi ta jnop ta jpastike (Sal. 119:99)

Ta me jkʼupintik mas skoltael ti akʼo xnopajik ta stojolal Jeova li jchiʼiltaktike (Mat. 28:19, 20)

[Lokʼol ta pajina 14]

Yikʼaluk van mu kʼunuk ta tael ti bu xuʼ lek xi jchanunaje, pe toj ep me sbalil ti chkakʼbetik yipale

[Lokʼol ta pajina 15]

Jlom utsʼ-alaliletike nopem xaʼiik skʼelel jutukuk Vivlia kʼalal mi laj yoʼontonik ta veʼele