¿Mi oy buchʼu xuʼ xal li kʼusi chkʼot ta pasel ta tsʼakale?
«Vuʼun noʼox jtuc Diosun [...]. Vuʼun noʼox jtuc xuʼ chcal li cʼusi chcʼot ta pasel ta tsʼacale; epal jabil toʼox scʼan xcʼot ta pasel ti cʼalal chcale.» (Isaías 46:9, 10)
LI KʼAKʼALETIK avie mu xa noʼox stakʼ naʼel li kʼusi xuʼ xkʼot ta pasel ta tsʼakale. Jaʼ yuʼun, li buchʼu chchanbeik skʼoplal li politikae, li takʼine xchiʼuk li xkuxlejal krixchanoetike, yakal chchanbeik ti kʼu sjalil echʼem tal xkuxlejal li krixchanoetike xchiʼuk kʼusitik tskʼan spas li krixchanoetik avi kʼakʼale sventa snaʼik li kʼusi chkʼot ta pasel ta tsʼakale. Yan krixchanoetike, ti tskʼan snaʼik tajek li kʼusi chkʼot ta stojolalik ta tsʼakale, jaʼ chbat sjakʼbeik li buchʼutik chchanbeik skʼoplal li kʼanaletike xchiʼuk li espiritismoe. Pe muʼyuk kʼusi lek kʼotem ta pasel yuʼunik. Vaʼun chaʼa, ¿mi mu van stakʼ naʼel li kʼusi chkʼot ta stojolal li balumile, li kutsʼ kalaltike o li voʼotike? ¿Mi oy van ta melel buchʼu xuʼ x-al yuʼun li kʼusi chkʼot ta pasel ta tsʼakale?
Li ta sversikuloaltak slivroal Isaías ti laj xa kaltik ta akʼole, li Jeova Dios ti skotol xuʼ yuʼune, laj yal ta melel ti stuke xuʼ xojtikin li kʼusi chkʼot ta pasel ta tsʼakale. Ta stojolal li j-alkʼope, li Diose laj onoʼox yal ti voʼneal j-israeletike ta xkolik lokʼel li ta mosoil ta Babiloniae xchiʼuk ti tsutik batel ta Jerusalén sventa chbat xchaʼmeltsanik li jteklume xchiʼuk li chʼulnae. Pe ¿bu to kʼalal lek jamal laj yalbe skʼoplal ti kʼusi chkʼot ta pasele? Jutuk mu chib sien jabil ti skʼan toʼox xkʼot ta pasele, li Isaiase laj xa onoʼox yalbe sbi li buchʼu chbat stsal li Babiloniae, ti jaʼ li Ciroe. Xchiʼuk laj yal ti ta skʼejbe batel yok li ukʼum Eufratese, ti jaʼ smero smakobbail li jteklum taje. Laj yalbe skʼoplal xtok ti jamal chkom li smukʼta tiʼnail Babilonia ta skoj ti chʼay ta sjolik smakele, ta skoj taje muʼyuk la vokol tspas kanal li Ciroe (Isaías 44:24–45:7).
Li krixchanoetike mu x-al yuʼunik li kʼusi chkʼot ta pasel ta tsʼakale, pe li Diose x-al yuʼun. «Mu me xanop ti oy cʼusi lec xuʼ chapas ta yocʼomale, —xi la stsʼiba li pʼijil ajvalil Salomone—, yuʼun mu xanaʼ cʼusi yichʼoj tal li jun cʼacʼal ocʼome.» (Proverbios 27:1.) Jaʼ jech chkʼot ta pasel li avi kʼakʼal eke: li krixchanoetike mi jaʼuk x-al yuʼunik li kʼusi xuʼ chkʼot ta xkuxlejalik ta tsʼakale. Pe ¿kʼu yuʼun jaʼ x-al yuʼun li Diose? Yuʼun li stuke xojtikin lek skotol li kʼusitik spasojane, te kapal skʼoplal li kʼusi tsnopik xchiʼuk li kʼusi onoʼox oy ta yoʼonton li krixchanoetike. Jaʼ yuʼun chaʼa, kʼalal sta-o chile, xuʼ kak x-al yuʼun ta melel kʼusi tspas li jun jteklume o li jun krixchanoe. Maʼuk noʼox taje, xuʼ yuʼun ti akʼo jech xkʼot ta pasel li kʼusitike. Kʼalal oy kʼusi ta xalik ta sbi Jeova li j-alkʼopetike, li stuke «ta [xakʼ] cʼotuc ta pasel scʼopic li [yajtuneltake]» xchiʼuk «ta [xakʼ] ti lec chbat cʼusi chalic li jʼalmantaletic» yuʼune (Isaías 44:26). Li taje jaʼ noʼox stuk xuʼ yuʼun spas li Jeovae.
Li j-alkʼop Isaiase, ti jaʼo kuxi kʼalal skʼan toʼox mas ta vukub sien jabil xvokʼ li Jesuse, kak xa onoʼox laj yalbe skʼoplal ti chvul li Mesiase. Manchuk mi jech, li ta xvaxaklajunebal sigloe, junantik jlabanvanejetik (críticos) lik xchibal kʼoptaik mi melel li kʼusi chal li livroe. Laj yalik ti albil kʼopetik ta sventa li Mesiase maʼuk la melel albil kʼopetik. Tsnopik ti oy buchʼu jaʼ to la la stsʼiba kʼalaluk jelavem xaʼox li kʼusitik te albile. Pe ¿mi melel van taje? Ta 1947 laj yichʼ tael voʼneal tsʼibetik ta jun chʼen te nopol ta Nab Muerto, te kapal laj yichʼ tael jun skopiail slivroal Isaías. Jech kʼuyelan chalik li buchʼu xchanojbeik lek skʼoplale, li vun taje, laj yichʼ pasel kʼalal sien toʼox jabil skʼan xvokʼ li albil Mesías o Cristoe. Lek jamal ta aʼyel chaʼa, ti Vivliae chalbe skʼoplal li kʼusi chkʼot ta pasel ta tsʼakale.
Ta melel, mi jaʼuk Isaías xchiʼuk li yantik jtsʼibajometik yuʼun Vivliae, xuʼ van la snaʼik ta stukik noʼox li kʼusi chkʼot ta pasel ta tsʼakale. Yuʼun, «jaʼ iventainatic yuʼun Chʼul Espíritu. Jaʼ viniquetic icʼopojic ta sventa Dios» (2 Pedro 1:21). Li ta yan mantaletik chtale ta jkʼelbetik skʼoplal xkuxlejal Jesús ti kak xa onoʼox yaloj li j-alkʼop Isaiase. Mi laje ta xkalbetik skʼoplal li kʼusi laj yal Jesús xchiʼuk li yajtsʼaklomtak ta sventa li jkʼakʼaliltike xchiʼuk li kʼusi chkʼot ta pasel ta mas tsʼakale.