¿Kʼu yelan atalelal cha kʼan?

XI LA sjakʼbe jun prekursora li bankilal yuʼun polisia ta jun lum yuʼun Filipinase: «¿Kʼuxi la avut sventa sjel stalelal li vinik leʼe?». Vaʼun xi to la sjakʼ xtok kʼalal yakal chakʼ ta ilel li vun te latsal ta xmexae: «¿Mi xa naʼ kʼusi sventa li vunetik leʼe? Jaʼ li vunetik ti chal ti oy smul li vinike. Laj xa avakʼbe slekilal li lum liʼe». Li vinik taje naka yakubel toʼox tspas xchiʼuk toj echʼem saʼ kʼop. ¿Kʼusi tijbat-o yoʼonton yoʼ la sjel stalelale? Jaʼ li mantal ta sKʼop Dios yakʼoj ta naʼel stuke.

Ta smiyonal noʼox krixchanoetik xchʼunoj li tojobtasel yakʼoj Pablo liʼe: «Tscʼan chajipic comel stalel li pocoʼ cristianoe, jaʼ ti cʼu toʼox xaʼelanic ta voʼonee, yuʼun jaʼ noʼox tsoquesvan, [...] jaʼ xa chalapbeic stalel li achʼ cristiano ti pasbil jech chac cʼu chaʼal stuc li Diose» (Efe. 4:22-24). Kʼusiuk ti skʼan xichʼ jelel ta jtalelaltike, jkotoltik me ti buchʼutik ta jkʼan ta jtsʼaklitik li Cristoe skʼan me jlaptik li achʼ talelalile.

Pe li jtalelaltik sventa xuʼ xkichʼtik voʼe, jaʼ to noʼox slikebal. Kʼalal chichʼ voʼ li jun krixchanoe, xkoʼolaj kʼuchaʼal ti oy kʼusi pasbil ta teʼ ti jutuk to chʼulbile. Akʼo mi xvinaj xa ti kʼusi chichʼ pasele, li jchʼul teʼe skʼan xchʼul lek jaʼ to mi tsuts yuʼune, skʼan me spasilanbe echʼel li kʼusitik jsetʼ-juteb skʼane, jaʼ to me mi kʼupil xa sba kom ta kʼelele. Jaʼ jech ek li krixchano ti ta xichʼ voʼe oy xa me li stalelaltak ti mas tsots skʼoplal ta sventa li jun yajtunel Diose. Pe naka to me chlik meltsajuk tal li achʼ talelalile. Oy to me kʼusi skʼan ta jeltik sventa jchʼul li jtalelaltik taje.

Jaʼ jech laj yil Pablo ek ti oy to kʼusi skʼan sjel ta stalelale. Xi jamal laj yale: «Acʼo me ta jcʼan ta jpas li cʼusi leque, pero jaʼ xaʼox liʼ oy ta jtojol li cʼusi chopole» (Rom. 7:21). Li Pabloe xojtikin sba lek xchiʼuk snaʼoj kʼuyelan tskʼan li stalelale. Jaʼ me jech skʼan xkojtikin jbatik lek ek, xchiʼuk xi jakʼbe jbatike: «¿Kʼusi jchopol talelal ti jnaʼoje? ¿Kʼu yelan jtalelal, xchiʼuk kʼu yelan jtalelal ta jkʼan?

¿Kʼusitik jchopol talelal oy?

Ti jchaʼachʼubtastik jpʼejuk voʼneal na ti toj lajem xa li yoyaltak xchiʼuk stsʼamteʼaltake, maʼuk noʼox me skʼan bonel maʼ taje. Mi muʼyuk ta jtsaktik ta venta li yoyaltak xchiʼuk stsʼamteʼaltake mas to me chakʼ vokolil ta tsʼakal. Jaʼ jech li ta jtalelaltik eke: mu baluk noʼox ti jel jsetʼ-juteb jtalelaltike. Skʼan me jkʼeltik lek ti kʼuyelan yutil koʼontontike xchiʼuk jkʼeltik ti kʼusi chopole; mi mu jechuk ta jpastike xuʼ me xchaʼsut tal li jchopol talelaltike. Toj tsots me skʼoplal chaʼa ti akʼo jkʼel jbatik leke (2 Cor. 13:5). Mi laj xa kiltik ti kʼusitik chopol ta jtalelaltike, skʼan me jchʼayestik. Sventa spas kuʼuntik taje ta me skoltautik li Jeovae.

Xi la stsʼiba li Pabloe: «Li scʼop Diose cuxul, oy stsatsal, echʼem to jech chtuchʼ jelovel yuʼun jech chac cʼu chaʼal espada ti chaʼjot lec yee. Ch-och cʼalal to ta yut jol coʼntontic. Tsliʼ jelovel cʼalal to ta jtsʼacaliltic, cʼalal to ta jchʼuxuviltic [«xchinabil jbakiltik», NM]. Xchiʼuc snaʼ cʼusi oy ta coʼntontic, xchiʼuc cʼusitic ta jnoptic» (Heb. 4:12). Li sKʼop Diose toj tsots ch-abtej ta jtojolaltik. Chkʼot kʼalal to ta yut koʼontontik, kʼalal to ta xchinabil jbakiltik (tuétano). Chakʼ ta naʼel li kʼusi ta jnoptike xchiʼuk li kʼusi oy ta koʼontontik ta melele, vaʼun jaʼ jech chakʼ ta ilel ti kʼukelantike. Pe taj une xuʼ me toj jelel xchiʼuk ti kʼusi chal krixchanoetik ta sventa li jtalelaltike o ti kʼusi chkal jtuktike. ¡Toj jtunel sventa chakʼ kiltik kʼusi chopol ta jtalelaltik li Vivliae!

Kʼalal chichʼ chaʼmeltsanel li mol nae, maʼuk noʼox skʼan jelbel li kʼusitik lajemik xa yuʼune; yuʼun me skʼan jkʼeltik xtok kʼusi ti sok-oe. Jaʼ me jech muʼyuk bu chchaʼsok. Jaʼ jech ek, maʼuk noʼox me skʼan jkʼeltik li kʼusi chopol ta jtalelaltike; skʼan me jkʼeltik kʼusi ta skoj xchiʼuk kʼusitik tspas ti jechuk jtalelaltike, yuʼun jaʼ me jech lek ta jventaintik. Ep kʼusitik ti jech spasoj tal li jtalelaltike; jaʼ ti kʼuyelan li krixchanoetik ti bu li jchʼie, ti kʼukelantik ta takʼin xchiʼuk li ta jkuxlejaltike, ti kʼuyelan bu li jchʼi tale, ti kʼuyelan laj kichʼtik tsʼitesele, li kamigotaktike xchiʼuk ti kʼuyelan laj kichʼtik chanubtasel ta relijione. Jech xtok li chʼayob oʼontonale, li kʼusitik chlokʼ ta televisione xchiʼuk li pelikulaetik ta jkʼeltike tsjel jtalelaltik. Mi chkiltik li kʼusitik tsots chopol ch-abtej ta jtalelaltike, mas me kʼun chkaʼitik ta slokʼesel ta jtojolaltik li kʼusitik chopol tspas ta jtalelaltike.

Kʼalal chkiltik li kʼusitik chopol ta jtalelaltike, xuʼ van xi jnoptike: «Yuʼun jtalel onoʼox jech». Pe taje muʼyuk me sbalil ti jech ta jpoj jbatike, jech kʼuchaʼal albatik yuʼun Pablo li tsobobbail ta Corinto ti jaʼik toʼox jmulaviletike, ti jyakubeletik toʼoxe, ti chchiʼin toʼox sbaik ta vayel li viniketike xchiʼuk li antsetike. Xi albatike: «Oy toʼox bochʼo jech la spas avuʼunic, pero liʼ ta orae pocbiloxuc xa [...] ta sventa li Espíritu yuʼun Dios[e]» (1 Cor. 6:9-11). Ta sventa ti chkoltavan li xchʼul espiritu Jeovae xuʼ me jel jtalelaltik ek mi jech skʼane.

Jkʼelbetik skʼoplal Marcosa ti te nakal ta Filipinase. Xi chal kaʼitik ti kʼu toʼox yelan stalelale: «Li chʼi ta jun utsʼ-alalil ti bu yan sba utbail xchiʼuk majbaile; jaʼ yuʼun lik jtoy jba kʼalal lapalun ta balunlajuneb jabile». Li Marcose lek ojtikinbil ta skoj ti toj lek xaʼi xtajin ta takʼine xchiʼuk ti buyuk noʼox tstijanbe pistola krixchanoetik sventa ch-elkʼaje. Jech, la snop chelkʼanik jkot avion xchiʼuk yamigotak, akʼo mi muʼyuk onoʼox kʼot ta pasel li kʼusi snopojike. Tspasilan-o kʼusitik chopol akʼo mi nupunem xaʼox li Marcose xchiʼuk mu kʼusi kom yuʼun ta skoj li tajimol ta takʼine. Ta tsʼakal jutuke lik xchan Vivlia ek, ti yakal xa onoʼox chchanubtasat yuʼun yajrextikotak Jeova li yajnile. Ta slikebale mu sta-o laj yaʼi ti xkʼot ta yajtsʼaklom Cristoe. Pe lik yakʼ ta xkuxlejal li kʼusi yakal chchane xchiʼuk lik batuk ta tsobajeletik, vaʼun jaʼ ikoltaat ta yiktael ti kʼu toʼox yelan kuxule. Li avi une yichʼoj xa voʼ li Marcose xchiʼuk chchanubtas yan krixchanoetik ti akʼo sjel stalelalik eke.

¿Kʼu yelan atalelal cha kʼan?

¿Kʼusi skʼan jeltik sventa xlekub li jtalelaltike? Xi tojobtasvan li jtakbol Pabloe: «Comtsanic scotol li cʼusitic chopole: jaʼ ti stsoqʼuet noʼox avoʼntonique, ti ta anil noʼox chaʼilinique, ti xcupet noʼox scʼacʼal avoʼntonique, ti chachopolcʼopojique, xchiʼuc li cʼusiticʼ muʼyuc stu chlocʼ ta aveique. Mu xa me xavepalcʼopta abaic, yuʼun laj xa ajipic comel li pocoʼ atalelique xchiʼuc li yabtelal chapasic toʼoxe. Jaʼ xa xalapic o batel li achʼ atalelique, yuʼun jech yantic chalecubic batel. Jech coʼol chacʼot achiʼuquic li Bochʼo la spasutique, jech lec tsʼacal chavotquinic scotol» (Col. 3:8-10).

Ti kʼusi mas tsots skʼoplal ta jkʼantike, jaʼ ti jlokʼes li jmol talelaltike xchiʼuk ti jaʼ jlaptik li j-achʼ talelaltike. ¿Kʼusi skʼan jpastik sventa jaʼ jlaptik taje? Xi tstakʼ li Pabloe: «Lec xavil abaic, cʼux xavaʼay abaic ta jujuntal. Talbat xapasbeic abaic perdón jech chac cʼu chaʼal la spasboxuc perdón Dios ta sventa li Cristoe». «Lapic o li slequil avoʼntonique, li cʼuxubinvaneje, ti biqʼuit chavacʼ abaique, ti mansooxuc noʼoxe, li yutsil avoʼntonique, xchiʼuc li smucʼul avoʼntonique. Yuʼun tʼujbiloxuc xa yuʼun li Diose, yuʼunoxuc xa, lec scʼanojoxuc. [...] Li cʼusi tsots scʼoplal ta scotole, jaʼ ti oyuc ta avoʼntonic o li cʼanvaneje, yuʼun jaʼ mero jpasvanej ta jun.» (Efesios 4:32; Col. 3:12, 14.) Mi chkakʼ lek ta jol koʼontontik ta yakʼbel yipal ti jechuk li jtalelaltike, ta me xi jpas ta lekil krixchano xchiʼuk lek chilutik «Mucʼul Dios xchiʼuc [...] cristianoetic» (1 Sam. 2:26). Kʼalal ay ta Balumil li Jesuse, toj labal sba laj yakʼ ta ilel li talelaletik taje. Mi ta jkʼelbetik lek skʼoplal ti kʼuyelan la spase, jaʼ me ta jchanbetik-o stalelal xchiʼuk li sTote; jech ta melel, jaʼ ta «[jchanbetik] yoʼnton li Diose» (Efe. 5:1, 2).

Oy to yan kʼusi xuʼ jpastik sventa xlekub li jtalelaltike, jaʼ ti jkʼelbetik skʼoplal kʼuyelan stalelalik li krixchanoetik ti te skʼoplalik ta Vivliae xchiʼuk ti jkʼeltik kʼusi ti lek-o stalelalik o kʼusi ti chopol-oe. Jnopbetik skʼoplal José, li skerem moltotil Jacobe. Li vokolaletik la snuptane muʼyuk lik yat-o yoʼonton xchiʼuk muʼyuk sok-o li stalelaltak ti toj kʼupilik sbae (Gén. 45:1-15). Pe jvules ta joltik li Absalón ti jaʼ xnichʼon li ajvalil Davide. Akʼo mi jaʼ jun vinik ti labal sba ch-ile ta skoj li spat xokone xchiʼuk ti oy ta yoʼonton yilel li jteklume, jaʼ jun jloʼlavanej echʼ xchiʼuk jmilvanej (2 Sam. 13:28, 29; 14:25; 15:1-12). Jech kʼuchaʼal chkiltike, ti kʼuyelan kʼupil sba ta kʼelel jun krixchanoe maʼuk ti kʼuyelan li spat xokone o ti kʼuyelan tspas sba yilele.

Spas me kuʼuntik

Mi ta jkʼan chlekub batel jtalelaltike xchiʼuk ti kʼupil jbatik ta sat Jeovae, skʼan me jkʼeltik lek ti kʼuyelan li yutil koʼontontike (1 Ped. 3:3, 4). Jech kʼuchaʼal laj xa jchanbetik skʼoplale, skʼan me jkʼeltik lek bu li jpaltailtik sventa xuʼ jel li jtalelaltike, skʼan xkakʼtik venta ti kʼu yuʼun jech ta jpastike xchiʼuk ti xkakʼbetik yipal ti jechuk jtalelaltik kʼuchaʼal jun yajtsʼaklom Cristoe. ¿Mi spas kuʼuntik taje?

Spas kʼuxi un. Xuʼ xi jelutik li ta koltael chakʼ Jeovae. Xi jkʼantik kʼuchaʼal la skʼan li jtsʼibajom yuʼun salmoe: «Dios cuʼun, jelbun li coʼntone; acʼo achʼubuc li cʼusi oy ta yut coʼntone» (Sal. 51:10). Jkʼanbetik Jeova ti akʼo x-abtej ta jtojolaltik li xchʼul espiritue xchiʼuk ti yantikuk xlekub batel kuʼuntik jujun kʼakʼal ti kʼuyelan ta jpasbetik li kʼusi tskʼan yoʼontone. Ta melel: xuʼ me spas kuʼuntik ti masuk kʼupil sba jtalelaltik jujun kʼakʼal ta stojolal Jeovae.

[Tsʼibetik ta yok vun]

[Lokʼol ta pajina 4]

¿Mi bal noʼox van ti jbontik li jpʼej na ti lajem ta tsatsal ikʼal voʼe?

[Lokʼol ta pajina 5]

¿Mi xkoʼolaj atalelal xchiʼuk li Cristoe?