«Jaʼ acʼo jpastic o batel li cʼusi sventa lec jun coʼnton jcotoltique»

Kʼ ALAL jaʼ to laj yichʼ pasel pavimentar li bee parejo xvinaj xchiʼuk lek tsots. Pe mi sta yoraile chlik tsikʼuk xchiʼuk chlik chʼenpʼujanuk, jaʼ yuʼun skʼan meltsanel sventa mu sok echʼel mas xchiʼuk ti muuk xakʼ vokolil ta tsʼakale.

Jaʼ jech xuʼ xlik tsikʼuk ek ti kʼuyelan xkil jbatik xchiʼuk jchiʼiltaktike. Li jtakbol Pabloe snaʼoj lek ti jelajtik kʼusi tsnopik li jchʼunolajeletik ta Romae, jaʼ yuʼun xi laj yal mantale: «Acʼo jpastic o batel li cʼusi sventa lec jun coʼnton jcotoltique, xchiʼuc li cʼusi jaʼ sventa chijtsatsubutic yuʼune», xi (Rom. 14:13, 19). ¿Kʼu yuʼun jaʼ skʼan jpastik batel li kʼusitik jun-o koʼonton jkotoltike? ¿Kʼusi skʼan jpastik sventa junuk-o koʼontontik li ta tsobobbaile?

¿Kʼu yuʼun skʼan oyuk lekilal kuʼuntik?

Mi muʼyuk chichʼ meltsanel ta anil li pavimento ti bu tsikʼemike xuʼ me toj ep chakʼ vokolil ti bu toj nat xa chʼenajtike. Jaʼ me jech xuʼ tsots xakʼ vokolil ek mi muʼyuk ta jchapantik li kʼopetike. Xi la stsʼiba li jtakbol Juane: «Me oy bochʼo jech ta xal: “Li vuʼune lec jcʼanoj Dios”, me xie, pero me xtiʼet yoʼnton yuʼun xchiʼile, jaʼ jʼepalcʼop. Yuʼun li bochʼo mu scʼan xchiʼil ti chil ta sate, ¿cʼuxi xuʼ ta scʼan li Dios ti mu xilbe sate?» (1 Juan 4:20). Li kʼopetik ti muʼyuk chichʼ chapanele xuʼ me jaʼ stij koʼontontik ta spʼajel li kermanotaktike.

Li Jesuse laj yal ti muʼyuk lek chil Dios ti kʼuyelan chkichʼtik ta mukʼ mi muʼyuk ta jchapan jkʼoptik xchiʼuk kermanotaktike, jaʼ yuʼun xi laj yalbe mantal li yajtsʼaklomtake: «Me oy chavichʼ batel smoton Dios te ta scajlebe, me te chtʼab ta avoʼnton ti oy acʼop achiʼuc achiʼile, jaʼ lec te xacomtsan ta stuqʼuil scajleb matanal li smoton Dios avichʼoj batele. Bat chapano baʼyuc acʼop achiʼuc li achiʼile. Tsʼacal xuʼ chtal avacʼbe li smoton Diose» (Mat. 5:23, 24). Jech kʼuchaʼal chkiltike, ti kʼu yuʼun toj tsots skʼoplal skʼan jchapan jkʼoptik xchiʼuk li jchiʼiltaktike jaʼ ti ta jkʼan ta jmuyubtabetik yoʼonton li Jeovae.a

Li kʼop ikʼot ta pasel ta tsobobbail ta Filipose, te chkilbetik yan srasonal xtok ti kʼu yuʼun skʼan jchapan li jkʼoptike. Li Pabloe te chalbe skʼoplal ta skarta jtos kʼop ti lik yuʼunik li Evodia xchiʼuk Sintiquee, yaʼeluke yakal xa chakʼ ta vokol li lekilal ta tsobobbaile (Fili. 4:2, 3). Jech, mi muʼyuk chichʼ chapanel ta anil li kʼope mu jaluk ta xpuk batel. Ta sventa ti ta jkʼantik oyuk-o kʼanbail kuʼuntik xchiʼuk ti jmojuk oyutik xchiʼuk li kermanotaktike, ta jpastik persa ti lekuk xkil jbatik ta jujuntale.

Xi laj yal li Jesuse: «Xcuxet noʼox yoʼnton li bochʼo yacʼoj svocolic ta spajesel cʼope» (Mat. 5:9). Ta me jtatik muyubajel xchiʼuk jun oʼontonal mi muʼyuk ta jsaʼtik kʼope. Jech xtok, mi muʼyuk ta jsaʼtik kʼope muʼyuk me mas chi j-ipaj, yuʼun «me mucʼ noʼox coʼntontique jaʼ slequilal li jbecʼtaltique» (Pro. 14:30). Yan li buchʼu toj echʼ noʼox x-ilinike jaʼ me mas nopajtik noʼox ch-ipajik.

Akʼo mi jnaʼojtik onoʼox ti skʼan mu jsaʼtik kʼope, xuʼ van mu jnaʼtik lek kʼuxi ta chapanel li kʼopetik chlik kuʼuntik xchiʼuk jchiʼiltaktike. Jkʼelbetik batel skʼoplal jayibuk beiltasel ta Vivlia ti toj jtunel kuʼuntike.

Mi xlamet noʼox jkʼopojeltike jaʼ me mu xlik-o kʼop

Kʼalal jutuk noʼox tsikʼem li spavimentoal bee kʼun noʼox me ta chʼayesel. ¿Mi xuʼ van jpasbetik perton o «jchʼaybetik» li spaltail kermanotaktik ti mu toj tsotsuke? Jaʼ me jtos ti kʼusi mas lek xuʼ jpastik taje, yuʼun jech kʼuchaʼal laj yal jtakbol Pedroe, «li cʼanvaneje ta xacʼ chʼayuc ep mulil» (1 Ped. 4:8).

Pe oy onoʼox bu tsots li kʼop bakʼintike, ti mu stakʼ ti jech noʼox ta jchʼay ta joltike. Jkʼeltik kʼusi kʼot ta pasel ta stojolal li j-israeletik ti kʼalal jaʼ toʼox laj yichʼik li Albil Balumile. Li «snitilultac ti Rubene, ti Gade, xchiʼuc ti oʼlol jvocʼ snitilultac ti Manasese», ti muʼyuk bu jelavemik li ta jot ukʼum Jordane, «lic svaʼanic jun mucʼ ta altar». Li yan snitilulaltak Israele yalojik mi jaʼ sventa yan diosetik li skajleb matanal taje, jaʼ yuʼun mu teuk noʼox skʼelojik. Jech oxal la xchapan sbaik sventa chbat spasik kʼop (Jos. 22:9-12, Ch).

Oy jlom j-israeletike oy lek sprevail yuʼunik yaʼeluk sventa chbat tsakvanikuk ta kʼop xchiʼuk ti ta mukul-mukul chbatike, sventa jech mu epuk xlajik li stukike. Pe muʼyuk anil xbatik un li j-israeletik ti jelavemik echʼel ta ukʼum Jordane, baʼyuk la stak echʼel yajkʼopojelik sventa chchiʼin ta loʼil li yermanotakike. Xi la sjakʼ li jkʼopojeletike: «¿Cʼu yuʼun ti laj abajbeic smantal Dios cuʼuntic vuʼutic li israeletique, ti laj acomtsanic li Diose?». Muʼyuk srasonal ti jech la saʼik mulile, yuʼun li nitilulaletik taje muʼyuk bu la spasbeik skajleb smoton yan diosetik. ¿Kʼu van yelan chaʼiik ti vaʼ yelan sabat smulike? ¿Mi tstsak van ta kʼop li yermanotakike? ¿Mi mu van skʼan xchapbeik smelol? Moʼoj kʼuxi un; xlamet kʼopojik xchiʼuk la xchapbeik lek smelolal ti yuʼun jaʼ ta skoj ti tskʼan chtunik ta stojolal Jeovae. Ti kʼuyelan la stakʼike maʼuk noʼox muʼyuk la sokesik ti kʼuyelan lek xil sbaik xchiʼuk Diose, moʼoj, yuʼun jech muʼyuk xchamik xtok. Ti ta smelol noʼox kʼopojike jaʼ chapaj-o li kʼope (Jos. 22:13-34).

Pʼij kʼusi la spasik ek li yan j-israeletike, yuʼun kʼalal skʼan toʼox xbatik ta pas kʼope la xchap skʼopik baʼyuk xchiʼuk li «snitilultac ti Rubene, ti Gade, xchiʼuc ti oʼlol jvocʼ snitilultac ti Manasese». «Mu me ta aniluc noʼox xaʼilin —xi chtojobtasvan li sKʼop Diose—, yuʼun li ilinele jaʼ jech stalelic li bochʼotic bolique.» (Ecl. 7:9.) Jech kʼuchaʼal chal Vivliae, ti kʼuyelan lek ta chapanel li jkʼoptike jaʼ ti xlamet noʼox xi jkʼopoje xchiʼuk ti jamal xi jkʼopoje. Mu me xuʼ jpat koʼontontik ti chakʼbutik sbendision Jeova mi mu jkʼan jchap jkʼoptik xchiʼuk junuk ermanoe xchiʼuk ti te oy-o ta koʼontontik ta skoj ti oy kʼusi chopol spasojbutik kalojtike.

¿Kʼusi van skʼan jpastik xtok mi chalbutik junuk ermano ti chopol chaʼi ta skoj ti oy la kʼusi chopol jpasojbetike? ¿Kʼusi van ta jpastik mi jecheʼ tsaʼ jmultike? Xi chalbutik li Vivliae: «Li cʼunil tacʼovele jaʼ tspajes li cʼacʼal oʼntonale» (Pro. 15:1). Li j-israeletik ti sabat smulik ta yichʼel ta mukʼ yan diosetike xlamet noʼox skʼopojelik la xchapbeik smelolal, pe tukʼ laj yakʼ sbaik un, vaʼun jaʼ jech la skʼunijesbeik yoʼonton li yermanotakik ti kʼalal jaʼo tsots li kʼope. Mi jaʼ chchiʼinutik ta loʼil yaʼi jun ermano o mi voʼotik ta jkʼan ta jchiʼintik ta loʼile, skʼan xi jakʼbe jbatike: «¿Kʼu van yelan jkʼopojel, kʼu yelan yechʼomal ke xchiʼuk kʼu yelan jtalelal skʼan sventa jchapan li kʼope?».

Oyuk me jpʼijil xi jkʼopojutik

Li Jeovae snaʼoj ti skʼan xkaltik kʼalal oy kʼusi chkat-o koʼontontike. Pe skʼan me jkʼel jbatik lek, yuʼun mi muʼyuk to jchapanojtik li kʼope yikʼaluk me jaʼ xkalbetik echʼel jkʼoptik ti buchʼutik mu sta-o xkalbetike. Li kʼusi te oy-o ta koʼontontike jaʼ me chi jloʼiltavan-o echʼel. Xi chal Proverbios 11:11 ta sventa ti kʼusi chkʼot ta pasel mi ta jloʼiltatik li yantike: «Ta sventa scʼopic li bochʼotic chopolique ta soc scʼoplal o [li jteklume]». Mi chopol chi jkʼopoj ta stojolal junuk ermano eke xuʼ me jsokesbetik slekilal li jteklume, jaʼ xkaltik, li tsobobbaile.

Pe maʼuk noʼox skʼan ti mu chopoluk xi jkʼopoj ta stojolal li kermanotaktike; moʼoj, yuʼun skʼan ti lekuk xi jkʼopoj ta stojolalik sventa oyuk lekilale. Melel onoʼox ti xi la stojobtas jchʼunolajeletik li jtakbol Pabloe: «Mu xa me xlocʼ ta aveic scotol cʼusitic muʼyuc lec». Pe xi to laj yal xtoke: «Jaʼalic cʼusitic lec ti jaʼ sventa chijtsatsubutic yuʼune, yuʼun jech xuʼ chtun yuʼunic ec li bochʼotic oy to cʼusi scʼan yuʼunique [...]. Lec xavil abaic, cʼux xavaʼay abaic ta jujuntal. Talbat xapasbeic abaic perdón», xi (Efe. 4:29-32). Mi chalbutik junuk ermano ti oy kʼusi chopol laj yaʼi laj kaltik o la jpastike, ¿mi mu jechuk ti mas kʼun chkaʼitik ta xchapanel jkʼoptik xchiʼuk ta skʼanbel perton ti jnaʼojtik ti lek onoʼox chkʼopoj ta jtojolaltike? Jaʼ jech ek, mi lek onoʼox chi jkʼopojutik ta stojolal li kermanotaktike mas me kʼun chkaʼitik ta xchapanel mi oy bu lik jkʼoptik junuk veltae (Luc. 6:31).

«Coʼol» xi jtun ta stojolal Dios

Ta skoj ti jpas mulilutike, li kʼusi mas ta jpastike jaʼ ti chi jnamaj ta stojolal li buchʼu oy kʼusi chopol la spasbutike xchiʼuk ti ta jchʼak jbatik ta stojolale. Pe taje mu lekuk ti jech ta jpastike (Pro. 18:1, NM). Ta skoj ti jaʼutik jun jteklum ti jmoj chkichʼbetik ta mukʼ sbi li Jeovae, skʼan me «coʼol chlic tun[kutik]» xchiʼuk li kermanotaktike (Sof. 3:9).

Mu me xchibaj koʼontontik ta yichʼel lek ta mukʼ Jeova ta skoj li kʼusi chalik o tspasik yantike. Jnopbetik skʼoplal li abol sba meʼonal ants ti laj yil Jesús laj yakʼ «scotol [yuni takʼin] ti cʼu yepal oy yuʼun sventa tsmacʼlin sba oe», ti te la stikʼ stakʼin ta jun xkaxail te ta chʼulnae. Kʼalal skʼan toʼox jun-chib kʼakʼal xkʼot ta pasel taje, li Jesuse tsots laj yal ti chopol kʼusi tspasik li jchanubtasvanejetike. ¿Mi jaʼ van muʼyuk xa chakʼ-o yuni takʼin li meʼonal ants sventa chichʼ ta mukʼ Jeova ta skoj li kʼusitik chopol tspasik li jbabeetik ta relijione? ¿Mi laj van yal Jesús ti akʼo mu xakʼ li yuni takʼine? Moʼoj, yuʼun la skʼupil kʼopta ta skoj ti laj yakʼ yuni takʼin ta sventa li chʼulnae (Luc. 21:1-4). Li antse tukʼ la xchʼun li Mantale, jaʼ to te chʼay skʼoplal li Mantal kʼalal laj yakʼ ta matanal xkuxlejal li Jesuse.

¿Kʼusi van ta jpastik mi chkaʼitik ti oy kʼusi muʼyuk lek la spasbutik junuk ermanoe? ¿Mi muʼyuk xa van ta sjunul koʼonton chi jtunutik ta stojolal Jeova ta skoj taje? ¿O mi ta van xkakʼtik persa ta xchapanel li kʼop sventa mu jsokestik li lekilal ta tsobobbail ti toj ep sbalile?

«Ti me xuʼe —xi chtojobtasvan li Vivliae—, jaʼ ti acʼo avaqʼuic persa ti muʼyucuc cʼop avuʼunic achiʼuquic scotol cristianoetique.» (Rom. 12:18.) Kakʼ ta koʼontontik xchʼunel li tojobtasel taje, vaʼun jaʼ me jech te chi jxanav-o echʼel li ta sbelel kuxlejale.

[Tsʼibetik ta yok vun]

[Lokʼol ta pajina 17]

Skʼan xchapan skʼopik li Evodia xchiʼuk Sintiquee

[Lokʼol ta pajina 18]

¿Kʼu van yelan jkʼopojel, kʼu yelan yechʼomal ke xchiʼuk kʼu yelan jtalelal skʼan sventa jchapan li kʼope?