¿Kʼu yuʼun skʼan xichʼ akʼbel sbain yantik xchiʼuk kʼuxi ta pasel?

LI YAKʼBEL sbain yantike, mas xa toj voʼne skʼoplal, jaʼ achʼ to maʼ li jbalumiltike. Jaʼ la spas Jeova li jun noʼox xNichʼone, vaʼun jaʼ la stunes ta «pʼijil j-abtel, [NM]» sventa tspas li vinajel-balumile (Pro. 8:22, 23, 30; Juan 1:3). Kʼalal la spas baʼyel nupultsʼakal li Diose, xi laj yalbe mantale: «Nojesic li banamile; ventainic o» (Gén. 1:28). Jech ta melel, laj yakʼbe sbain krixchanoetik ta yepajesel echʼel ta spʼejel Balumil li nichimaltik ta Edene. Kʼuchaʼal chkiltike, jaʼ jech stalelal Jeova ti chakʼbe sbain yantik li kʼusitike xchiʼuk jaʼ jech la spas ta slikebal onoʼox li s-organisasion eke.

¿Kʼusi smakoj batel ti chichʼ akʼbel sbain yantike? ¿Kʼu yuʼun skʼan xchan moletik ti xakʼbeik sbain yantik li kʼusitik sbainojik ta tsobobbaile? ¿Kʼuxi ta pasel?

¿Kʼusi smelolal ti chichʼ akʼbel sbain yantike?

Ti skʼan xichʼ akʼbel sbain yantik, xie jaʼ skʼan xal ti chichʼ vaʼanel jun krixchano sventa jaʼ spas o xabtelan jtosuk kʼusi yuʼun li buchʼu chvaʼanvane. Ta yan kʼop xkaltike, jaʼ ti skʼan xkoltavan yan krixchanoetik sventa xkʼot ta pasel li kʼusi yichʼoj nopele, xchiʼuk jaʼ skʼan xal xtok ti chichʼ akʼbel yabtel li jun krixchanoe.

Li ermanoetik ti chichʼ akʼbel yabtelik ta tsobobbaile skʼan me spasik, akʼo yalik ti kʼuyelan xbat yuʼunike xchiʼuk skʼan me xichʼ jakʼbel ek li buchʼu akʼbil sbaine. Pe li buchʼu mas sbainoje jaʼ ti buchʼu laj yakʼ li abtelale, skʼan skʼel ti yakal tspas ti buchʼu laj yakʼbe sbaine xchiʼuk skʼan me skolta ta spasel mi jech skʼane. Veno, pe oy van buchʼu yikʼaluk xi sjakʼbe sbaike: «¿Kʼu yuʼun skʼan xkakʼbe sbain yantik mi spas kuʼun jtuke?».

Srasonal sventa xichʼ akʼbel sbain yantik

Jnopbetik skʼoplal ti la spas li jun xNichʼon li Jeovae xchiʼuk ti laj yakʼ akʼo xkoltavan ta spasel li kʼusitik laj yichʼ pasel ta tsʼakale. Jnaʼojtik ti «jaʼ ta sventa iʼayin scotol li cʼusitic oy ta vinajele, li cʼusitic oy ta banamile, xchiʼuc li cʼusitic xquil ta jsatique, xchiʼuc li cʼusitic mu xquil ta jsatique» (Col. 1:16). Xuʼ ox yuʼun ti lajuk spas skotol li Jpasvaneje, pe mu jechuk la spas, yuʼun oy ta yoʼonton ti akʼo xmuyubaj ek ta spasel abtelaletik li xNichʼone (Pro. 8:31). Taje jaʼ laj yojtikinbe-o lek stalelal Dios li Nichʼonile. Xkaltikuke jaʼ jech la xchanubtas xNichʼon li Totile.

Jaʼ jech la spas kʼuchaʼal sTot li Jesuse, yuʼun laj yakʼbe sbain abtel yantik kʼalal liʼ naki ta Balumile. Ta kʼunkʼun la xchanubtas li yajtsʼaklomtake. Sventa jaʼikuk jbabe ta chol mantale, la stak echʼel li lajchaʼvoʼ yajtakboltake, laje la stak batel 70 yajtsʼaklomtak (Luc. 9:1-6; 10:1-7). Vaʼun jaʼ jech chapal xa chkʼot sta kʼalal chbat li ta lumetik ti bu la stak batel baʼyuk li yajtsʼaklomtake. Kʼalal laj yikta Balumil li Jesuse, laj yakʼbe sbain mukʼta abtelaletik li yajtsʼaklomtak ti chanemik xaʼoxe, abtelaletik kʼuchaʼal li chol mantale (Mat. 24:45-47; Hech. 1:8).

Jaʼ jech ojtikinbil ek li stsobobbail yajtsʼaklom Cristoe, ti chakʼbe sbain abtelal yantike xchiʼuk ti chchanubtase. Xi albat yuʼun Pablo li Timoteoe: «Jaʼ me jech xavacʼbe sbain ti buchʼutic oy slequil yoʼntonique, ti xuʼ yuʼunic ta xchanubtasel ti yane» (2 Tim. 2:2, Ch). Jech ta melel, ti buchʼutik xtojobik xae skʼan me xchanubtasik li yantike, yuʼun jaʼ jech chchanubtasvanik echʼel ek.

Li mol ti chakʼbe sbain yantik li yabtel akʼbile, jaʼ me jech chakʼbe smuyubajel yantik kʼalal chchanubtasvanike xchiʼuk kʼalal tsvulaʼanik ermanoetike. Oy noʼox spajeb ti bu kʼalal xuʼ yuʼun li jun krixchanoe, jaʼ yuʼun kʼalal jech chil li mole, jaʼ me chtijbat-o yoʼonton ta yalbel yan ermanoetik ti akʼo sbainik jlomuk abtelaletik ta tsobobbaile. Xi chal li Vivliae: «Ti buchʼu biqʼuit ta xacʼ sbae, oy ta stojol ti bijilile» (Pro. 11:2, Ch). Kʼalal bikʼit chakʼ sba li jun krixchanoe snaʼoj lek ti bu noʼox kʼalal xuʼ yuʼune. Ta me xlubtsaj xchiʼuk yikʼaluk me mu xa xokob ta skʼelel yutsʼ yalal mi tspas yaʼi skotole. Jaʼ yuʼun ti kʼusi mas toj leke jaʼ ti komon xichʼ pasel li abtelale. Jaʼ yuʼun li buchʼu jbabe yuʼun moletike xuʼ me xalbe yan moletik ti skʼelbeik skʼoplal li takʼin ta tsobobbaile. Kʼalal tskʼelbeik svunal takʼin li moletik taje, jaʼ me jech chakʼik venta ti kʼuyelan oy ta takʼin li tsobobbaile.

Maʼuk noʼox chchan mas spasel abtelal xchiʼuk ti chil kʼuyelan ta pasel batel li buchʼu chichʼ akʼbel sbaine, moʼoj, yuʼun jaʼ jech chil ek ti bu kʼalal xtojob ta spasel abtelal li buchʼu laj yakʼe. Jaʼ xkaltik, ti kʼalal chichʼ akʼbel yan ermanoetik li abtelal ti spas yuʼunike, jaʼ me jech «ta xichʼic qʼuelbel yabtelic» yuʼun moletik ti buchʼu kʼelbilik xa ti xuʼ xtunik ta yajkoltaobba moletike (1 Tim. 3:10).

Ta slajebal une jaʼ me jech chakʼik ta ilel moletik ti spatoj yoʼontonik ta stojolal yantik ti chakʼbeik sbain abtelale. Li Pabloe la xchanubtas Timoteo ti kʼalal laj yikʼ batel xchiʼin ta misioneroale. Laj yamigoin sbaik ta jyalel, jaʼ yuʼun xi laj yalbe Timoteo li Pabloe: «Mero jnichʼonot ta sventa ti laj achʼun li scʼop Dios[e]» (1 Tim. 1:2). Jaʼ jech kʼot ta stojolal Jeova xchiʼuk li Jesús ek kʼalal jmoj abtejik ta spasel li yan kʼusitike. Jaʼ jech xuʼ xkʼot ta stojolalik ek li moletik kʼalal chakʼbeik sbain yantik li abtelal sbainojike.

¿Kʼu yuʼun oy jlom ti mu skʼanike?

Akʼo mi snaʼojik jlom moletik ti oy sbalil ti chichʼ akʼbel sbain abtelal li yan ermanoetike, vokol chaʼiik ta spasel, vaʼun yikʼaluk mu skʼan xakʼbeik sbain yantik, yuʼun tsnopik ti jaʼ jech muʼyuk xa tspasvanik ta mantale. Xuʼ van tskʼan ti jaʼikuk-o jbabe ta jyalele. Pe skʼan me jvules ta joltik ti kʼalal mu toʼox chbat ta vinajel li Jesuse, laj yakʼbe tsatsal abtelaletik li yajtsʼaklomtake, akʼo mi snaʼoj ti mas tsots skʼoplal li abtelal tspasike, ti jaʼ mu sta li abtelal la spas stuke (Mat. 28:19, 20; Juan 14:12).

Yikʼaluk van oy laj yakʼbe sbain jtosuk abtelal yan ermano li jun mole —pe ti muʼyuk bu lek xkʼot ta lokʼele— jaʼ yuʼun tsnop ti jaʼ lek chbat li abtelal mi tspas stuke xchiʼuk ti jaʼ ta ora tstsuts yuʼune. Pe jkʼeltik kʼusi la spas li Pabloe: snaʼoj onoʼox ti toj tsots skʼoplal ti xichʼ akʼbel sbain yantik li abtelale, xchiʼuk xaʼibe lek smelolal xtok un ti oy bu mu jechuk tajek tspas yabtel li buchʼu chichʼ chanubtasel ta sbainel abtel ti kʼuyelan tskʼan stuke. Kʼalal bat ta sba velta ta misioneroal li Pabloe, la xchanubtas li skerem chiʼil ta chol mantale, jaʼ li Marcose. Pe toj chopol laj yaʼi Pablo kʼalal laj yikta yabtel li kereme, ti sut echʼel ta snae (Hech. 13:13; 15:37, 38). Pe taje maʼuk chibaj-o yoʼonton ta xchanubtasel yantik li Pabloe. Kʼuchaʼal laj xa kaltike, laj yalbe Timoteo ti akʼo xbat chiʼinatuke, vaʼun kʼalal laj xaʼox xchan lek spasel tsatsal abtelaletik li kereme, te laj yikta ta Éfeso xchiʼuk laj yalbe ti akʼo sbiiltas jkʼelvanejetik ta tsobobbail xchiʼuk yajkoltaobbatak moletik (1 Tim 1:3; 3:1-10, 12, 13; 5:22).

Li moletik ta jkʼakʼaliltik eke maʼuk me skʼan xal ti mu xa bu chchanubtasik yan ermanoetik ta skoj noʼox ti oy junuk ti muʼyuk bu la xchʼam lek li chanubtasele. Maʼuk noʼox tsots skʼoplal ti ta jpat koʼontontik ta stojolal yantike xchiʼuk ti ta jkoltatike, moʼoj, yuʼun jaʼ lek ti jech ta jpastike. Pe ¿kʼusi skʼan tsakel ta venta kʼalal oy kʼusi chkakʼbetik sbain yantike?

Kʼuxi ta akʼbel sbain

Skʼan jkʼeltik ti kʼusi spas yuʼun li ermanoetik kʼalal oy kʼusi chkakʼbetik sbainike. Kʼalal laj yilik ti persa skʼan oy buchʼu spuk veʼlil jujun kʼakʼal li ta Jerusalene, li jtakboletike la stʼujik «vucub viniquetic [...] ti bu lec scʼoplalique, ti ventainbil yoʼntonic yuʼun Chʼul Espiritue, xchiʼuc ti oy sbijilique» (Hech. 6:3). Jaʼ yuʼun mi jaʼ chavakʼbe spas jun krixchano ti mu stakʼ jpat-o lek koʼontontike, yikʼaluk van muʼyuk bu tspas. Jaʼ yuʼun jaʼ akʼbo spas li kʼusitik bikʼit noʼoxe, vaʼun mi stakʼ xa jpat-o koʼontontik chavile yikʼaluk van jaʼ xa chavakʼbe spas li kʼusitik mas tsots skʼoplale.

Pe oy to kʼusitik tsots skʼoplal skʼan xichʼ kʼelel. Jaʼ ti jelajtik me kʼuyelan stalelal li jujun krixchanoe, ti kʼusi xtojob spasele xchiʼuk ti kʼuyelan yiloj ta pasel li abtelale. Yikʼaluk van jaʼ toj lek xcholvan li jun ermano ti lek xkʼopoje xchiʼuk ti kʼupil sba stalelale, pe ti buchʼu lek xcholet kʼusi tspas echʼele xchiʼuk ti lek xchapet kʼusitik tspase yikʼaluk van jaʼ lek xtun kʼuchaʼal yajkoltaobba sekretario ta tsobobbail. Yan li jun ermana ti lek snaʼ stʼujobtasel kʼusitike xuʼ jaʼ xichʼ akʼbel sbain ti kʼuyelan ta tʼujobtasel ta nichimetik li sNaʼobil slajel Cristoe.

Li jun krixchano ti buchʼu oy kʼusi chakʼbe sbain yane skʼan me jamal xalbe ti kʼusi tskʼan akʼo spase. Kʼalal skʼan toʼox stak batel j-ichʼ kʼopetik li Juan J-akʼvanej ta voʼ sventa oy kʼusi bat sjakʼbeik Jesuse, baʼyel la xchapbe smelolal li kʼusi tskʼan tsnaʼe xchiʼuk laj yal li kʼusi chalbeike (Luc. 7:18-20). Kʼalal laj yalbe yajtsʼaklomtak li Jesús ti akʼo stsobbeik li sovrail veʼlil ti ta skʼelobil juʼelal laj yakʼe, laj yakʼbe akʼo skʼel stukik li kʼusitik jtsetʼ-juteb skʼan pasele (Juan 6:12, 13). Jaʼ ti kʼuyelan li jujutos abtelale xchiʼuk ti kʼusi snaʼ spasel li jun jkoltavaneje. Kʼuk yelan, li buchʼu chakʼ ta bainel li abtelale xchiʼuk ti buchʼu chichʼ akʼbele skʼan me snaʼik kʼusi ti skʼan pasele xchiʼuk ti kʼu sjalikil chichʼ alel ti kʼuyelan xbat li abtelale. Xchaʼvoʼal skʼan snaʼik ti kʼuyepal spas yuʼun li buchʼu ch-akʼbat sbain abtelale. Mi skʼan xichʼ alel kʼusi fechail skʼan stsutse, jaʼ van mas lek chaʼi ti buchʼu tspas abtelal mi xuʼ xal sloʼil eke, jaʼ me mu stakʼ mi jaʼ noʼox chichʼ albel ti kʼusi ora skʼan stsutsese.

Li ermano ti akʼbil yabtele skʼan me oyuk kʼusi x-abtej-o, skʼan me koltael xchiʼuk skʼan me akʼbel takʼin ti kʼuyepal chtun yuʼun sventa tspas li yabtele. Jech xtok lek me ti snaʼik yantik ti kʼusi yabtel yakal tspas li jun ermanoe. Li Jesuse laj yakʼbe «sllavial li ventainel yuʼun Dios ta [vinajel]» li Pedroe, taje laj yil li yan yajtsʼaklomtak kʼalal jech la spase (Mat. 16:13-19). Jaʼ me jech ek un, bateltike jaʼ van lek ti akʼo snaʼ tsobobbail buchʼu sbainoj jtosuk abtelale.

Kʼalal pʼijutike chkoltavan xtok. Mi oy junuk mol ti tstikʼ sba tajek ta spasel li abtelal ti yakʼojbe sbain yan ermanoe, ta me xakʼ ta ilel ti muʼyuk spatoj yoʼonton ta stojolale. Jech onoʼox ti oy bakʼintik ti mu van jechuk chkʼot ta pasel ti kʼuyelan chichʼ kʼanele. Pe mi laj yichʼ akʼbel spas stuk jlomuk kʼusitik li ermano ti oy kʼusi akʼbil sbaine, xuʼ van xnop xaʼi xchiʼuk xchan batel lek spasel. Melel onoʼox chaʼa, taje maʼuk me skʼan xal ti mu xa sventauk-o kʼuyelan chichʼ pasel abtelal li jun mole. Jech kʼuchaʼal liʼe, li Jeovae laj yakʼbe sbain ta spasel kʼusitik ta slikebal li xNichʼone, pe la skolta-o sba ta spasel ek. Xi laj yalbe li Pʼijil J-abtele: «Jpastic cristiano jech chac cʼu chaʼal vuʼuti[ke]» (Gén. 1:26). Jaʼ yuʼun chaʼa, skʼan me xavakʼ ta ilel ta akʼopojel xchiʼuk ta atalelal ti cha kolta aba li ta abtele xchiʼuk ti xa kʼupil kʼopta li ermano ti yakal tspase. Jech xtok, xuʼ xa kolta ta skʼelbel skʼoplal ti kʼuyelan xbat li abtelale. Mi muʼyuk lek chichʼ pasele, skʼan me xa koltavan o xa tojobtasvan. Naʼo me ti voʼot oy ta aba li stsutseb abtelal ti la avakʼbe sbain yane (Luc. 12:48).

Epal ermanoetike staojbeik sbalil ti laj yichʼik akʼbel yuʼun moletik abtelaletik ti skʼan pasel ta tsobobbaile, yuʼun jaʼ svinajeb ti kʼanbilike. Jech onoʼox, li moletike skʼan xaʼibeik smelolal kʼu yuʼun skʼan xakʼbeik sbain abtelal li ermanoetike xchiʼuk kʼuxi xuʼ spasik sventa xchanbeik stalelal li Jeovae.

[Rekuadro ta pajina 29]

KʼALAL CHICHʼ AKʼBEL SBAIN YANTIKE,

• jmoj ta jkʼupintik li muyubajele

• mas ep kʼusi chkʼot ta pasel kuʼuntik

• chkakʼtik ta ilel ti oy jpʼijiltike xchiʼuk ti bikʼit chkakʼ jbatike

• ta jchanubtastik ta spasel li yabtelike

• chkakʼtik ta ilel ti jpatoj koʼontontik ta stojolalike

[Rekuadro ta pajina 30]

KʼUXI TA AKʼBEL SBAIN

• Tʼujbo jujun yajval li jujutos abtelal ti spas yuʼunike

• Jamal lek xavalbe skʼoplal xchiʼuk jamal lek xa loʼilajik

• Jamal lek xaval li kʼusi skʼan pasele

• Akʼo me ti kʼusitik chtune

• Akʼo ta avoʼonton li abtelal eke xchiʼuk akʼo ta ilel ti apatoj avoʼonton ta stojolal li buchʼu tspase

• Oyuk ta avoʼonton ta sbainel li stsutseb abtelale

[Lokʼol ta pajina 31]

Ti chichʼ akʼbel sbain yan ermano jtosuk abtelale jaʼ skʼan xal ti chichʼ kʼelel-o batele