Mu me kʼusi xchʼay koʼontontik, yuʼun «jaʼ yorail ta xquichʼtic batel lec aʼyej»

LI CHANVOʼ viniketik ti ipik ta kʼaʼemal chamele muʼyuk xa maʼ ti oy kʼusi lek tstaike, yuʼun muʼyuk kʼusi x-akʼbatik kʼalal la skʼanik limuxna ta stiʼ jteklume. Li jsirioetike la sjoyibtaik Samaria, jaʼ yuʼun chchamik xa ta viʼnal li krixchanoetik tee. Altik xa ti x-ochik li ta jteklume, yuʼun toyolik tajek stojol li veʼlile. Jech ta melel, oy xa onoʼox la stiʼ sbaik (2 Rey. 6:24-29).

Vaʼun li viniketik ti ipik ta kʼaʼemal chamele batik ti bu spasoj skarpanaik li jsirioetike, jaʼo batik kʼalal ikʼ xaʼox osil sventa muʼyuk buchʼu x-ilatike. Yuʼun muʼyuk xa onoʼox kʼusi stakʼ spasik. Pe mu kʼusi xbakʼ kʼalal kʼotike. Te chukajtik laj yilik kaʼetik xchiʼuk vuroetik, muʼyuk junuk soltaro chchabivan. Toj labal laj yilik, jaʼ yuʼun la xnachʼtaik ochel jpʼej karpana, pe muʼyuk buchʼu te oy, jech oxal ochik li ta nae, vaʼun lik slajesik li kʼusitik tee xchiʼuk laj yuchʼik skotol li kʼusitik te la staike. Te la staik kʼusitik pasbil ta kʼanal takʼin, ta sakil takʼin, kʼuʼiletik xchiʼuk yan kʼusitik ti toj ep sbalile. La xkuchik batel ti bu kʼalal xuʼ yuʼunike, bat snakʼik xchiʼuk tal to xkuchik yan. ¡Li jsirioetike laj yiktaik komel ti bu spasoj skarpanaike! ¿Kʼu yuʼun? Ta skʼelobil sjuʼel Jeova laj yakʼ ti akʼo xaʼiik jsirioetik ti te xa xtal soltaroetike. Yalojik mi tal xa li yajkontraike, jaʼ yuʼun li soltaroetike anil xa lokʼik batel xchiʼuk te laj yiktaik skotol li kʼusitik yuʼunike.

Li viniketik ti ipik ta kʼaʼemal chamele yakalik-o ta yeanel yan kʼusitik, pe vaʼun vul ta sjolik ti chcham xa ta viʼnal li krixchanoetik ta Samariae, jaʼ yuʼun chopol laj yaʼi sjol yoʼontonik. Xi laj yalike: «Muʼyuc lec li cʼusi ta jpastique. Ti jechuque jaʼ yorail ta xquichʼtic batel lec aʼyej». Jaʼ yuʼun la stambeik batel ta anil ta jteklum sventa chbat yalik li kʼusi laj yilike (2 Rey. 7:1-11).

Jaʼ jechtik kuxulutik kʼuchaʼal li viniketik ti ipik ta kʼaʼemal chamele, yuʼun «jaʼ yorail ta xquichʼtic batel lec aʼyej». ¿Kʼusi ti aʼyej taje? Jaʼ li kʼusi laj yal Jesús kʼalal la sloʼiltabe li «senyail [...] slajebal kʼusitik chkʼotanuk ta pasele» (Mat. 24:3, NM). Xi laj yale: «Ti lequil achʼ cʼop scʼoplal ti ventainel yuʼun ti Diose, ta xichʼ puquel ta sbejel banomil yoʼ jech ta snaʼic scotolic ti oy coltaele. Vaʼi un, ta xtal ti slajebal cʼacʼale» (Mat. 24:14, Ch). ¿Kʼuxi van xuʼ xtun kuʼuntik taje?

Xuʼ me slajesutik li skʼop oʼontonal ti kʼuyelan chi jkuxie

Xmuyubajik tajek li buchʼutik ip ta kʼaʼemal chamel kʼalal la staik li kʼusitike, jaʼ yuʼun chʼay ta sjolik ti kʼuyelan svokolik ta Samariae. Jaʼ batem tajek ta yoʼontonik ti kʼusi chtun yuʼun stukike. ¿Mi xuʼ van jech xkʼot ta jtojolaltik ek? Melel onoʼox, li Jesuse laj yal ti «ta to xtal tsots viʼnal» li ta slajebal kʼusitike (Luc. 21:7, 11). Xi la spʼijubtas li yajtsʼaklomtake: «Qʼuelo me aba atuquic. Mu me stsatsub avoʼntonic ta scoj li cʼusitic tscʼan abecʼtalique, ta sventa li yacubele, xchiʼuc ta sventa scʼop oʼntonal ti cʼu xʼelan chacuxiique» (Luc. 21:34). Jech ta melel, skʼan me jkʼel jbatik ta sventa li skʼop oʼontonal jujun kʼakʼal ti mu xchʼay ta joltik yuʼun ti «jaʼ yorail ta xquichʼtic batel lec aʼyej[e]».

Jkʼeltik kʼusi kʼot ta stojolal jun ermana ti Blessing sbi ti jaʼ baʼyel yakʼoj ta xkuxlejal li mantale. Abtej ta prekursora kʼalal chchanunaj toʼoxe. Laje nupun xchiʼuk jun ermano ti chtun ta Betele, vaʼun take ta ikʼel sventa xbat tunuk ta Betel ta Benín ek. Xi chale: «Kus kuartoetik li kabtele xchiʼuk ta jkʼupin tajek». Li Blessing oy xa ta lajcheb jabil jun yoʼonton ch-abtej ta tsʼakal ora xchiʼuk xmuyubaj tajek ti muʼyuk bu xchʼay yoʼonton ti «jaʼ yorail ta xquichʼtic batel lec aʼyej[e]».

Li kʼusitik xuʼ xchʼay jkʼakʼaltike

Kʼalal la stak batel ta chol mantal 70 ta voʼ yajtsʼaklomtak li Jesuse, xi laj yalbee: «Ta melel toj ep li cʼaoje; jaʼ muʼyuc ep li bochʼo tscʼajique. Jaʼ lec cʼanbeic Yajval cʼaoj ti acʼo stac batel ep jcʼaojetic yuʼune» (Luc. 10:2). Mi mu stsob ta yorail li kʼusi tstsʼun jun jtsʼunole ep me tsok. Jaʼ jech ek mi muʼyuk baxbolutik ta chol mantale, xuʼ ep buchʼu xlaj. Jaʼ yuʼun xi to laj yal li Jesuse: «Mu me bochʼo xaloʼilaj achiʼuquic ta be» (Luc. 10:4). Li jpʼel griego kʼop ti «xaloʼilaj» xi jelubtasbile, maʼuk noʼox kʼalal oy buchʼu «te xa kom» xkutike, o ti «te xa bat» xi jchie. Yuʼun te smakoj xtok kʼalal tsnup ta be yamigoik ti tsmeyike o ti jal tajek chloʼilajike. Ta skoj ti tsots skʼoplal skʼan xalik noʼox ta anil aʼyej li yajtsʼaklomtak Jesuse, skʼan lek stunesik li kʼakʼale.

¡Jal tajek chchʼay jkʼakʼaltik li kʼusitike! Voʼne xa tajek ti jaʼ onoʼox mas chchʼay jkʼakʼaltik li televisione. Pe ¿kʼusi xuʼ xkaltik ta sventa li selularetik xchiʼuk li komputadoraetike? Achʼ to la sjakʼbeik ta Gran Bretaña 1,000 mukʼta krixchanoetik, te ivinaj ti «jun krixchano ta Gran Bretaña ti maʼuk jkʼulej xchiʼuk ti maʼuk toj povre xtoke 88 minuto tstunes telefono ta kʼakʼal, 62 minuto ta selular, 53 minuto tskʼel skoreo ta komputadora xchiʼuk 22 minuto tstak echʼel mensajeetik». Mi ta jtsobtik stekel li minutoetik taje mas jutuk ta chib velta x-echʼ yepal ti jayib ora skʼan x-abtej jun kʼakʼal ta chol mantal li jun prekursor auksiliare. Xuʼ xi jakʼbe jbatike: «¿Kʼu van sjalil ta jpas li kʼusitik taje?».

Li Ernst xchiʼuk Hildegard Seliger jaʼ jun nupultsʼakal ti toj lek la stunes skʼakʼalike. Jal ochik ta chukel, te van mas ta 40 jabil ta xchaʼvoʼalik ti bu chtakat batel ta tsatsal abtel jchukeletik sventa nazie xchiʼuk laj yichʼik tikʼel ta chukel ta chukinab yuʼun komunista. Pe kʼalal lokʼike la stunesik lek, yuʼun tunik ta prekursor ti kʼu to sjalil kuxiik ta Balumile.

Ep krixchano ti tskʼan chchiʼinik ta loʼil li nupultsʼakal Seligere, jaʼ yuʼun jal xuʼ te xbat yuʼunik kʼakʼal ta skʼelel xchiʼuk ta stakʼel li kartaetik chtakbatik tale. Pe li kʼusi mas toj tsots skʼoplal chilik li nupultsʼakal taje jaʼ ti chtunik ta stojolal Jeovae.

Jech kʼuchaʼal jnaʼojtike, stalel onoʼox ti ta jkʼan ta jchiʼintik ta loʼil li buchʼutik jkʼanojtike. Taje muʼyuk kʼusi chopol. Jech onoʼox, lek ti ep ta tos kʼusitik ta jpastik jujun kʼakʼale. Pe skʼan me oyuk noʼox spajeb li kʼusi ta jchʼay-o koʼontontike, yuʼun mi mu jechuk ta jpastike toj ep me kʼakʼal chchʼay kuʼuntik ti jaʼ muʼyuk xa mas yorail li chol mantale, yuʼun «jaʼ yorail ta xquichʼtic batel lec aʼyej».

Baxbolukutik ta xcholel li lekil aʼyeje

Jaʼ jun mukʼta matanal ti kuxulutik ta «yorail [ti] ta xquichʼtic batel lec aʼyej[e]». Mu me xkakʼtik ti akʼo oyuk kʼusi xchʼay koʼontontik jech kʼuchaʼal kʼot ta stojolalik ta slikebal li chanvoʼ viniketik ti ipik ta kʼaʼemal chamele. Xi laj yakʼik ventae: «Muʼyuc lec li cʼusi ta jpastique». Mu me lekuk mi jech ta jpastik eke, ti chkakʼtik akʼo xchʼay koʼontontik li kʼusi ta jkʼan jtuktike o li kʼusitik tsmakutik ta xcholel lek li mantale.

Li jtakbol Pabloe toj lek laj yakʼ ta ilel stalelal ti skʼan jchanbetik ta sventa li chol mantale. Kʼalal la snopbe skʼoplal li jtob jabil xcholoj xaʼox mantale, xi laj yale: «Jaʼ jech ipuc batel cuʼun li Lequil Aʼyej yuʼun Cristoe» (Rom. 15:19). Jaʼ jech, li Pabloe muʼyuk laj yakʼ xchʼay ta yoʼonton ti xmuyubaj noʼox ta xchol mantale. Jchanbetik li stalelale xchiʼuk ta sjunuluk koʼonton jcholbetik skʼoplal li Ajvalilal yuʼun Dios kʼuchaʼal la spase, yuʼun kuxulutik ta «yorail [ti] ta xquichʼtic batel lec aʼyej[e]».

[Lokʼol ta pajina 28]

Li Blessing muʼyuk laj yakʼ ti akʼo xmakat li kʼusitik yuʼun stuke, moʼoj, yuʼun la xchol mantal ta tsʼakal ora

[Lokʼol ta pajina 29]

Li nupultsʼakal Seligere lek la stunes skʼakʼalik