Jechuk jchʼuntik mantal xchiʼuk jechuk tsotsuk koʼontontik kʼuchaʼal li Jesuse

«Tsotsanic, yuʼun tsal xa cuʼun ti sba banomile.» (JUAN 16:33, Ch)

1. ¿Bu to kʼalal la xchʼunbe smantal Dios li Jesuse?

SKOTOL onoʼox velta la spasbe kʼusi tskʼan yoʼonton sTot ta vinajel li Jesuse. Mi jsetʼuk oy ta yoʼonton ti muʼyuk chchʼunbe smantal li Diose (Juan 4:34; Heb. 7:26). Pe muʼyuk bu kʼun laj yaʼi chchʼun mantal ta skoj li kʼusitik la snuptan ta Balumile. Kʼalal lik xchol mantal li Jesuse, lik kontrainvanuk li yajkontratake, ti te kapal skʼoplal ek li Satanase, sventa mu tukʼuk xakʼ yoʼontone la sujik, laj yilbajinik xchiʼuk la sloʼla yaʼiik (Mat. 4:1-11; Luc. 20:20-25). Skotolik taje toj tsots laj yakʼbeik svokol li Jesuse, jaʼ yuʼun laj yat tajek yoʼonton xchiʼuk toj kʼux laj yaʼi ta sbekʼtal, ta tsʼakale la smilik, la sjokʼanik ta jtel teʼ (Mat. 26:37, 38; Luc. 22:44; Juan 19:1, 17, 18). Akʼo mi tsots tajek laj yil svokol li Jesuse, «la xchʼun mantal, la xchʼun milel noxtoc» (Fili. 2:8).

2, 3. ¿Kʼusi chchanubtasutik ti la xchʼun mantal Jesús akʼo mi toj ep laj yil svokole?

² Li kʼusi la snuptan ta xkuxlejal li Jesús kʼalal ay kuxiuk ta Balumile, te to la xchan mas li xchʼunbel smantal Diose (Heb. 5:8). Pe ¿kʼusi ti skʼan xchan mas ti snaʼ xa onoʼox xchʼunel mantale? Yuʼun epal miyon jabil te la xchiʼin ta abtel sTot li Jesuse xchiʼuk tun ta «jun pʼijil j-abtel» kʼalal jmoj la spasik li kʼusitik oye (Pro. 8:30, NM). Li vokoliletik laj yil Jesús ta Balumile jaʼ jun preva laj yaʼi, pe tukʼ kuch yuʼun, yuʼun la xchʼun mantal xchiʼuk laj yakʼ ta ilel ti toj tukʼ yoʼonton ta stojolal li Diose. Skotol taje jaʼ koltaat-o sventa xchʼi mas ta mantal li xNichʼon Diose. ¿Kʼusi chakʼ jchantik taje?

³ Akʼo mi jaʼ jun tukʼil krixchano echʼ li Jesuse, snaʼoj ti chtun yuʼun koltael sventa xchʼun li mantale. Jaʼ yuʼun la skʼanbe koltael li Jeovae (kʼelo Hebreos 5:7). Li voʼotik eke skʼan me bikʼit xkakʼ jbatik xchiʼuk ti jkʼanbetik koltael li Dios sventa jchʼunbetik li smantale. Li jtakbol Pabloe xi laj yalbe mantal li yajtsʼaklomtak Cristoe: «Jechuc xanopic jech cʼu chaʼal laj snop ti Cristoe, yuʼun [...] laj snijan xchiman sba, laj yacʼ o sjol sbaquil xchiʼuc» (Fili. 2:5-8, Ch). Li kʼusi laj yakʼ ta ilel Jesuse jaʼ ti xuʼ xchʼun mantal li jun krixchano akʼo mi chopol li balumil bu nakale. Pe ¿mi xuʼ jchʼuntik mantal ti muʼyuk bu jech jtukʼiltik kʼuchaʼal li Jesuse?

Jchʼunej mantalutik akʼo mi jpas mulilutik

4. ¿Kʼusi smakoj ti yakʼojbutik jnopben jtuktik li Diose?

⁴ Li Adán xchiʼuk Evae jaʼ pʼijil kuxlejaletik ti xuʼ yuʼunik ta snopel stukike. Jaʼ jech xi jtojob li snitilulutik eke. ¿Kʼusi smakoj taje? Jaʼ ti xuʼ jtʼuj jtuktik li kʼusi leke xchiʼuk li kʼusi chopole, li xchʼunbel smantal Diose o ti mu jchʼunbetike. Pe ti yakʼoj jnopben jtuktik li Diose oy me kʼusi xuʼ lek xkʼot ta pasel kuʼuntik o ti chopol kʼusi xkʼot ta lokʼele. Jaʼ jech, li kʼusi ta jnop ta jpastike xuʼ me staik ta makiel li buchʼutik ta jpat jxokontike xchiʼuk xuʼ me jaʼ smilutik o xi jkuxiutik yuʼun.

5. ¿Kʼusi ti tsots tspasvan ta mantal chkaʼi jkotoltike, xchiʼuk kʼuxi xuʼ stsal kuʼuntik?

⁵ Li krixchanoutik ti jpas mulilutike maʼuk onoʼox jchʼun mantalutik chi jvokʼ, jaʼ yuʼun mu toj kʼunuk ta chʼunbel chkaʼitik li smantaltak Diose. Li jtakbol Pabloe oy kʼusi toj tsots laj yaʼi tspasvan ta mantal ta yoʼonton, jech kʼuchaʼal xi laj yale: «Oy yan mantal lec chaʼay ec li jbecʼtale. Jaʼ yuʼun jaʼ tscontrain sba xchiʼuc li yan mantal oy ta jol coʼntone. Li mantal lec chaʼay jbecʼtale jaʼ chacʼ ti acʼo smozoinun li mantal yuʼun li mulil liʼ sventainojbun jbecʼtale» (Rom. 7:23). Jech, mu toj tsotsuk ta chʼunel mantal kʼalal muʼyuk bu chkil jvokoltike o kʼalal muʼyuk kʼusi tsmakutike. Pe ¿kʼusi ta jpastik kʼalal jaʼ tskʼan koʼontontik «li cʼusi chopol tscʼan jbecʼtaltique [xchiʼuk] li cʼusi tscʼupin jsatique»? Li kʼusitik ta jkʼantike, ti jaʼ ta skoj ti jpas mulilutik xchiʼuk ta skoj «li espíritu liʼ ta banamile», toj tsots tsnit koʼontontik (1 Juan 2:16; 1 Cor. 2:12). Jaʼ yuʼun sventa stsal kuʼuntik taje skʼan skotoluk koʼontontik xkakʼ jbatik ta stojolal Dios, jaʼ xkaltik, jchapan li koʼontontike: kʼalal skʼan toʼox jnuptantik junuk prevae skʼan me xkakʼ ta koʼontontik xchʼunbel smantal Jeova akʼo mi oy kʼusi xkʼot ta pasel (Sal. 78:8). Li Vivliae chalbe skʼoplal ep yajtuneltak Dios ti tukʼ laj yakʼ yoʼontonike, yuʼun jaʼ ti baʼyuk la xchapan yoʼontonike (Esd. 7:10; Dan. 1:8).

6, 7. ¿Kʼusi chakʼ kiltik ti lek kʼusi chkʼot ta pasel kuʼuntik mi ta jchan jVivlia jtuktike?

⁶ Jtos ti kʼuxi xuʼ jchapan li koʼontontike jaʼ ti baxbolukutik ta xchanel li Vivliae xchiʼuk li vunetik sventa yajtsʼaklom Cristoe. Nopo avaʼi ta sventa liʼe. Yakal cha chan aVivlia atuk ta akʼobaltik ti jech onoʼox avakʼojbe yoraile. La akʼanbe Jeova ti akʼo xa yakʼbot xchʼul espiritue xchiʼuk ti akʼo skoltaot ta yakʼel ta akuxlejal li kʼusi cha chan ta sKʼope. Kaltikuk noʼox ti ch-echʼ jun pelikula ta television ta yokʼomal ti cha kʼel avaʼie. Akʼo mi toj lek ti kʼuyelan chalbeik skʼoplale, kʼotem ta achikin ti oy jutuchʼ ti yichʼoj tal majbail xchiʼuk ti chakʼ ta ilel mulivajele.

⁷ Vaʼun cha nopbe skʼoplal li tojobtasel laj yakʼ Pablo ta Efesios 5:3: «Jaʼ yuʼun li voʼoxuque, mu me xaloʼiltaic, mu xa me xavalbeic scʼoplal li mulivajele, li cʼusitic yan chopole, xchiʼuc li xpichʼetel avoʼntonique. Yuʼun mu xa jechuc tscʼan tspas li yuʼuntac Diose». Jech xtok vul ta ajol li tojobtasel laj yakʼ jtakbol ta Filipenses 4:8 (kʼelo). Vaʼun xi cha jakʼbe abae: «Mi yolbaj xa chkakʼ ta sokesel jol xchiʼuk koʼonton ta skoj pelikulaetik jech kʼuchaʼal jnopoj ta jkʼel okʼome, ¿mi jaʼ van jech yakal ta jchʼun mantal kʼuchaʼal la spas Jesuse?». ¿Kʼusi van cha pas ti jechuk xa nuptane? ¿Mi ta van xa kʼel li pelikula akʼo mi jech kʼuchaʼal taje?

8. ¿Kʼu yuʼun skʼan jtsaktik-o lek ta mukʼ li mantaletik sventa lekil talelalil xchiʼuk li beiltaseletik ta Vivliae?

⁸ Mu me lekuk ti muʼyuk ta jtsaktik lek ta mukʼ li mantaletik sventa lekil talelalil xchiʼuk li beiltaseletik ta Vivliae, ti ta jnoptik ti toj tsotsutik ta mantal xchiʼuk ti muʼyuk tsokesutik li chopol amigoile, akʼo mi jaʼik xkaltik li buchʼutik chlokʼik ta pelikulaetike, li kʼusitik ch-echʼ ta television ti jaʼ majbail xchiʼuk mulivajele. Skʼan jchabi jbatik xchiʼuk kalab jnichʼnabtik ta sventa li kʼusitik chopol tstunes Satanás ti xuʼ tsokesutike. Ep krixchanoetike chpoxta stsʼunobik sventa mu x-och xchanul, sventa mu xpuk batel li xchanule xchiʼuk ti mu slajesbat skotol li stsʼunobike. Veno, pe ¿mi mu van masuk skʼan jchabi jbatik ta sventa «li loʼlael chacʼ tal li pucuj ti toj lec yaʼyele»? (Efe. 6:11.)

9. ¿Kʼu yuʼun skʼan oyuk ta koʼontontik xchʼunbel smantal Jeova skotol kʼakʼal?

⁹ Stekel kʼakʼal oy kʼusi ta jnop ta jpastik ti jaʼ te tsakal skʼoplal mi jaʼ jech ta jpastik ti kʼuyelan tskʼan yoʼonton Jeovae. Mi ta jkʼan chi jkolutike skʼan me jchʼunbetik li smantale xchiʼuk ti xkichʼtik ta mukʼ li tukʼil beiltaseletik yuʼune. Sventa chkakʼtik ta ilel ti kuxul lek li xchʼunel koʼontontike skʼan me jchanbetik li stalelal Jesuse xchiʼuk ti jchʼuntik-o mantal akʼo mi xkichʼtik milel mi jech skʼane. Chakʼ jmotontik Jeova ti jech tukʼ-o koʼontontike. Xi laj yal ta melel li Jesuse: «Li bochʼo ta xcuch yuʼun cʼalal to ta slajebe jaʼ ta xcol» (Mat. 24:13). Jech, sventa jchʼuntik mantale skʼan oyuk stsatsal koʼontontik jech kʼuchaʼal la spas Jesuse (Sal. 31:24).

Toj lek ta chanbel stsatsal yoʼonton li Jesuse

10. ¿Kʼusi ta jnuptantik li yajtsʼaklomutik Cristoe, xchiʼuk kʼusi skʼan jpastik?

¹⁰ Ta skoj ti oyutik ta jun chopol balumile, skʼan oyuk stsatsal koʼontontik sventa mu jchanbetik li stalelaltake. Ep tajek chkil jvokoltik, chkil jvokoltik ta takʼin, chkichʼtik sujel ta stojolal krixchanoetik, ta sventa talelalil, ta sventa relijion ti xuʼ tsnamajesutik ta stojolal Jeovae. Ep yajtsʼaklomtak Cristoe chil svokolik ta kontrainel ta yutsʼ yalalik. Li ta chanob vunetik ta epal lumetike chakʼik tajek ta chʼunel ti kʼunkʼun la kʼataj tal li kuxlejaletike xchiʼuk ti mas xa ep krixchanoetik stsoboj li buchʼutik chalik ti chʼabal Diose. Mi ta jkʼan ta jchabi jbatik xchiʼuk mi ta jkʼan ta jtsaltik taje skʼan me oy kʼusi jpastik. Jaʼ chakʼ kiltik stalelal Jesús kʼuxi xuʼ stsal kuʼuntik taje.

11. ¿Kʼu yuʼun chakʼ stsatsal koʼontontik kʼalal ta jnopbetik skʼoplal li stalelal Jesuse?

¹¹ Xi laj yalbe yajtsʼaklomtak li Jesuse: «Ti liʼ ta banomile, ta xavichʼ avocolic. Jaʼuc leʼe, tsotsanic, yuʼun tsal xa cuʼun ti sba banomile» (Juan 16:33, Ch). Li stuke mi jaʼuk bu laj yakʼ ti akʼo spasat ta mantal yuʼun li kʼusitik liʼe. Muʼyuk laj yakʼ ti akʼo xmake ta spasel li yabtel ta chol mantale o ti muʼyuk xa tstsak ta mukʼ li mantaletik ta sventa lekil talelale xchiʼuk li beiltaseletik ta Vivliae. Jech ta jpastik ek kʼuchaʼal taje. Kʼalal la skʼopon Dios li Jesuse xi la skʼan vokol ta stojolal li yajtsʼaklomtake: «Muʼyuquic xa ta sventa banamil, jech chac cʼu chaʼal muʼyucun ta sventa banamil li vuʼune» (Juan 17:16). Mi ta jkʼelbetik skʼoplal li stalelal Jesuse xchiʼuk mi ta jnopbetik skʼoplale, ta me jta stsatsal koʼontontik sventa chʼakalutik ta stojolal li balumil liʼe.

Jechuk stsatsal koʼontontik kʼuchaʼal Jesuse

12-14. Alo kaʼitik kʼusitik la snuptan Jesús ti te laj yakʼ ta ilel stsatsal yoʼontone.

¹² Ti kʼu sjalil la xchol mantal li Jesuse laj yakʼ ta ilel ti lek tsots yoʼontone. Ta skoj ti jaʼ xNichʼon Diose tsots lek yabtel, jaʼ yuʼun «iʼoch ta chʼulna ta Jerusalén. Te lic sloqʼues scotol li bochʼotic ta xchonolajic, ta xmanulajic ta chʼulnae. La sbutqʼuinbe xmexaic li jeltaqʼuinetique. La sbutqʼuinbe xilaic li jchonpalomaetique» (Mat. 21:12). Kʼalal jun xaʼox akʼobal skʼan xcham li Jesuse, laj yakʼ ta spat li yajtsʼaklomtake, vaʼun xi laj yalbe li jtsop soltaroetik ti talemik ta chukvaneje: «Me vuʼun noʼox chasaʼicune, aqʼuic batuc li jchililtac liʼi» (Juan 18:8). Kʼalal mu toʼox jaluk yechʼel kʼalal la snit lokʼel yespada li Pedroe, laj yalbe ti akʼo stikʼ sutel ta snae, taje jaʼ jech la laj yakʼ ta ilel Jesús ti maʼuk spatoj-o yoʼonton li abtejebaletike, moʼoj, jaʼ spatoj-o yoʼonton li sjuʼel Jeovae (Juan 18:11).

¹³ Li Jesuse muʼyuk xiʼ ti kʼalal jamal laj yal li kʼusi chopol tspasik li jchanubtasvanejetik ta relijion xchiʼuk ti tsjutik kʼope. Xi laj yalbee: «¡Toj abul abaic, voʼoxuc li jchanubtasvanejoxuc ta smantal Diose xchiʼuc voʼoxuc li fariseooxuque, jloʼlavanejoxuc! Yuʼun chamaquic ta be li ventainel yuʼun Diose». Xchiʼuk xi to laj yale: «Jaʼ acomtsanojic ti bu toj tsots scʼoplal ta smantal Diose; jaʼ ti tscʼan pasel cʼusi tuqʼue, li cʼuxubinvaneje, xchiʼuc ti tscʼan jun coʼntontique [...]. Yuʼun jaʼ noʼox lec chapocbeic spat li vasoe xchiʼuc li setsʼe; yan li yute nojem ta elecʼ xchiʼuc ta scʼupinel cʼusitic oy ta avoʼnton atuquic» (Mat. 23:13, 23, 25). Jaʼ jech skʼan stsatsal yoʼontonik ek li yajtsʼaklomtak Jesuse, yuʼun li ta jelavele chkontrainatik yuʼun li jnitvanejetik ta relijione xchiʼuk oy junantik ti chmilatike (Mat. 23:34; 24:9).

¹⁴ Mi jaʼuk bu xiʼ ta stojolal pukujetik xtok li Jesuse. Jun veltae te tal ta stojolal Jesús jun vinik ti ochem pukuj ta yoʼontone, solel toj tsots ta jyalel, muʼyuk buchʼu xuʼ yuʼun ta xchuk, akʼo mi ta kadena. Pe li Jesuse muʼyuk xiʼ xchiʼuk la slokʼes li epal pukujetik ti ochem ta yoʼonton li vinike (Mar. 5:1-13). Li avie muʼyuk bu jech yakʼoj juʼeltik Dios sventa jpastik kʼuchaʼal la spas Jesuse. Pe kʼalal ta jcholbetik mantal li krixchanoetike xchiʼuk kʼalal ta jchanubtastike yakal me ta jpastik kʼop xchiʼuk li Satanase, ti jaʼ ta skoj ti «mu xchʼunique, yuʼun jaʼ macbil yoʼntonic» (2 Cor. 4:4). Jaʼ jech kʼuchaʼal ta stojolal Jesuse, li kabtejebtik sventa ta jpastik-o kʼope «maʼuc sventa cristiano; jaʼ ta sventa svuʼel li Diose. Yuʼun jech xuʼ ta jlilin[tik], ta jlajesbe[tik] scʼoplal sbijilic, srazonic li bochʼotic bij scuyoj sbaique», jaʼ xkaltik, li kʼusitik jecheʼ chʼunbil ti solel yakʼoj yibel ta oʼontonale (2 Cor. 10:4). ¿Kʼuxi xuʼ jtunestik li kabtejebtik ta mantal taje? Jkʼeltik kʼuxi la stunes li Jesuse.

15. ¿Kʼu yuʼun ti tsots lek yoʼonton li Jesuse?

¹⁵ Ti jech tsots yoʼonton echʼ li Jesuse maʼuk sventa labal xa xaʼi yuʼun li krixchanoetike. Moʼoj, yuʼun jaʼ ta skoj ti oy xchʼunel yoʼonton ta stojolal Diose. Jaʼ me jech skʼan ta jtojolaltik ek (Mar. 4:40). ¿Kʼuxi xuʼ oyuk kuʼuntik li melel xchʼunel oʼontonale? Veno, jaʼ chakʼ kiltik xtok li Jesús ti kʼuyelan ta taele. Xojtikinbe lek li sKʼop Diose xchiʼuk xchʼunoj lek li kʼusi te chale. Li yabtejebe jaʼ li espada chakʼ chʼul espiritue, li sKʼop Diose, maʼuk li batsʼi espadae. Nopajtik noʼox chalbe skʼoplal sventa chakʼ ta ilel ti melel li kʼusi chakʼ ta chanele. Ta melel, nopajtik noʼox ti tukʼ ta Tsʼibetik tslokʼes tal li kʼusi chale.a

16. ¿Kʼuxi xuʼ jtsatsubtas li xchʼunel koʼontontike?

¹⁶ Sventa stsal yuʼun prevaetik li xchʼunel koʼontontike, ti ta persa onoʼox ta jnuptantik kʼuchaʼal yajtsʼaklomutik Cristoe, skʼan me skotoluk kʼakʼal jkʼeltik, jchantik li sKʼop Diose xchiʼuk ti xi jkʼot ta tsobajeletike. Jaʼ me jech chkom lek ta joltik li melel mantaletik sventa lek tsots-o li xchʼunel koʼontontike (Rom. 10:17). Jech xtok, skʼan me jnopbetik lek skʼoplal sventa xakʼ lek yibel ta koʼontontik li melel mantaletik taje. Yuʼun me jaʼ tstsatsub-o lek koʼontontik mi kuxul lek li xchʼunel koʼontontike (Sant. 2:17). Skʼan me jkʼanbetik xchʼul espiritu xtok li Jeovae, yuʼun li xchʼunel oʼontonale jaʼ jtos yabtel chʼul espiritu (Gál. 5:22).

17, 18. ¿Kʼuxi laj yakʼ ta ilel Kitty ti tsots yoʼontone?

¹⁷ Jun tsebal yajtsʼaklom Cristo ti Kitty sbie, snaʼoj lek ti chakʼ stsatsal koʼontontik li melel xchʼunel oʼontonale. Ta sbikʼtal onoʼox snaʼoj ti mu stakʼ «x[kʼe]xov ta xcholel li Lequil [aʼyej]» ti bu chchanunaje; yuʼun oy onoʼox ta yoʼonton ta melel chcholbe mantal li xchiʼiltake (Rom. 1:16). Jaʼ jech tskʼan tspas yaʼi kʼalal ch-echʼ jujun jabile, ti chcholbe yaʼi mantal li xchiʼiltake, pe chiʼ ta xcholbel. Kʼalal lek xaʼox jchʼiel tale, yan-o xa bu bat chanunajuk, vaʼun xi la snope: «Li avi une ta jchol mantal, ta jpas ti bu kʼalal xuʼe, jaʼ ti muʼyuk toʼox jech la jpase». La skʼanbe Jeova ti akʼo x-akʼbat stsatsal yoʼonton xchiʼuk spʼijile, xchiʼuk ti xkʼot skʼakʼalil ti sta-o lek xchol mantale.

¹⁸ Kʼot skʼakʼalil ti lik li chanune, vaʼun li jchanunetike laj yakʼ sbaik ta ojtikinel ta stojolal li xchiʼiltakike. Jlome laj yalik ti oy srelijionike, pe laj yalik ta jamal xtok un ti muʼyuk la bu chakʼ ta xkuxlejalike. Vaʼun li Kitty taje laj yakʼ venta ti kʼot xa yorail li kʼusi tskʼan tspas yaʼie. Kʼalal jaʼ xa chkʼopoje, xi jamal laj yale: «Yajrextikoun Jeova xchiʼuk ta onoʼox xkakʼbe yipal sventa jechuk jtalelal kʼuchaʼal chal li Vivliae». Kʼalal yakal chloʼilaj echʼele, oy jlom xchiʼiltak ti muʼyuk bu lek laj yaʼiike, pe mu stekeluk, yuʼun oy buchʼutik ti la xchikintaike xchiʼuk ti oy kʼusi lik sjakʼik ta mas tsʼakale. Li maestroe laj yal ti toj lek ta chanbel stalelal Kitty ta sventa ti la spakbe skʼoplal li kʼusitik xchʼunoje. Jaʼ yuʼun xmuyubaj tajek ti jech tsots yoʼonton laj yakʼ sba kʼuchaʼal Jesuse.

Jechuk xchʼunel koʼontontik xchiʼuk jechuk tsotsuk koʼontontik kʼuchaʼal Jesuse

19. 1) ¿Kʼusi smakoj li melel xchʼunel oʼontonale? 2) ¿Kʼuxi xuʼ jmuyubtabetik yoʼonton li Jeovae?

¹⁹ Li jtakboletike laj yilik ti skʼan oyuk xchʼunel yoʼontonik sventa tsotsuk li yoʼontonike; jaʼ yuʼun xi la skʼanbeik vokol li Jesuse: «Epajesbuncutic li xchʼunojel coʼntoncutique» (kʼelo Lucas 17:5, 6). Li melel xchʼunel oʼontonale maʼuk skʼan xal ti jaʼ noʼox ta jchʼuntik ti oy li Diose. Moʼoj, skʼan jpat lek koʼontontik ta stojolal Jeova, jech kʼuchaʼal jun olol ti tspat lek yoʼonton ta stojolal stot ti skʼanoje. Li Salomone xi akʼbat snaʼ yuʼun Diose: «Jnichʼon, me lec bij chabate, lec jun coʼnton avuʼun. Batsʼi xcuxet noʼox jol coʼnton avuʼun, me puru tucʼ cʼusitic chlocʼ ta avee» (Pro. 23:15, 16). Jaʼ noʼox jech ek, kʼalal ta jpakbetik skʼoplal ta sjunul koʼontontik li stukʼil mantaltak Jeovae ta me xmuyubaj kuʼuntik, taje jaʼ me chakʼ mas stsatsal koʼontontik. Jchanbetik stalelal li Jesucristoe xchiʼuk oyuk stsatsal koʼontontik jpakbetik skʼoplal li tukʼilale.

[Tsʼib ta yok vun]

¿Mi x-albe avuʼun smelolal?

• ¿Kʼusi tskoltautik sventa jchʼuntik mantal akʼo mi jmulavilutik?

• ¿Kʼusi ti tsots-o li melel xchʼunel oʼontonale, xchiʼuk kʼuxi xuʼ stsatsub koʼontontik yuʼun?

• ¿Kʼusi chkʼot ta pasel mi la jchanbetik Jesús ti lek la xchʼun mantale xchiʼuk ti tsots yoʼonton echʼe?

[Lokʼol ta pajina 13]

¿Mi yakal cha chapan avoʼonton sventa xkuch avuʼun li prevaetike?

[Lokʼol ta pajina 15]

Ti tsots yoʼonton li Jesuse jaʼ ti oy xchʼunel yoʼonton ta stojolal Diose. Jaʼ me jech skʼan jpastik ek