Tstij koʼontontik ti akʼo jech xi jkʼanvan kʼuchaʼal kʼanvan Cristoe

«Ti cʼu xʼelan scʼanoj li yuʼuntac ta sliquebe, jaʼ jech scʼanoj o cʼalal ta slajeb.» (JUAN 13:1)

1, 2. 1) ¿Kʼu yuʼun chkaltik ti toj echʼ noʼox kʼanvan li Jesuse? 2) ¿Kʼusi ti ta jchanbetik skʼoplal tana ti jaʼ sventa chkakʼtik ta ilel ti chi jkʼanvane?

LI JESUSE stuk noʼox jech ti xuʼ jchanbetik ti kʼuyelan kʼanvane. Toj lek laj yakʼ ta ilel ti ta sjunul yoʼonton kʼanvane, te vinaj ta skʼopojel, ti kʼuyelan chanubtasvane xchiʼuk te vinaj kʼalal laj yakʼ sba ta milel ta jtojolaltike. Kʼalal to ta slajebal xkuxlejal ta Balumil la xkʼuxubin skotol li krixchanoetike, jaʼ mas to la xkʼuxubin li yajtsʼaklomtake.

² Li yajtsʼaklomutik Cristoe toj lek me ti jchanbetik stalelal li Jesuse, yuʼun ti kʼuyelan stalelale tstij koʼontontik ti akʼo jkʼuxubin li kermanotaktike xchiʼuk li yan krixchanoetike. Li ta xchanobil liʼe, ta jkʼelbetik skʼoplal kʼuxi xuʼ xchanbeik stalelal Jesús li moletike xchiʼuk ti ta slekiluk yoʼonton skoltaik li ermanoetik ti spasoj tsots smulike o akʼo mi mu masuk tsots. Ta jkʼeltik xtok kʼuxi tstij koʼontontik ti kʼuyelan kʼanvan Jesús ta skoltael li ermanoetik ti chilik vokolile, ti ip noʼox chaʼiike xchiʼuk ti chilik nojelal ta voʼ o yan kʼusitike.

3. ¿Kʼusi la spas Jesús ta stojolal Pedro akʼo mi toj tsots li smul la spase?

³ Kʼalal jun xaʼox akʼobal skʼan xcham li Jesuse, li yajtakbol ti Pedro sbie oxib to velta laj yal ti mu xojtikin li Jesuse (Mar. 14:66-72). Pe li Jesuse yaloj xa onoʼox ti tsutes yoʼonton li Pedroe. Vaʼun kʼalal jaʼ jech la spas li jtakbole laj yakʼ ta perton xchiʼuk oy kʼusitik mukʼ skʼoplal laj yakʼbe sbain ta mas tsʼakal (Luc. 22:32; Hech. 2:14; 8:14-17; 10:44, 45). ¿Kʼusi ta jchantik taje? ¿Kʼusi ta jchantik kʼalal chkiltik ti kʼusi tspas Jesús kʼalal oy buchʼu tsots tspas smule?

Jechuk jtalelaltik kʼuchaʼal Jesús ta stojolal li buchʼutik tspas smulike

4. ¿Bu ti mas tsots skʼoplal skʼan jechuk jtalelaltik kʼuchaʼal Jesuse?

⁴ Ep ti butik skʼan jechuk jtalelaltik kʼuchaʼal Jesuse, pe ti bu mas toj tsots xchiʼuk ti kʼux chkaʼitike jaʼo ti kʼalal oy buchʼu ta kutsʼ kalaltik tsots tsaʼ smule, o junuk ermano ta tsobobbail. Kʼux ta alel, pe ti kʼalal yantik xnopaj slajeb li kʼusitik yuʼun Satanás liʼe, mas to chakʼ jvokoltik li espiritu yuʼun balumile. Li yajtsʼaklomtak Cristoe, kerem-tsebetik o mol-meʼeletik, xuʼ me jech mu kʼusi skʼanik kʼuchaʼal li yan krixchanoetike xchiʼuk ti xlik stoy sbaike, ti mu xa stsakik ta mukʼ li mantaletik sventa lekil talelale, taje jaʼ me xuʼ xkʼunibik-o ta xanel li bikʼit be sventa kuxlejal sbatel osile. Li ta baʼyel sigloe laj yichʼik lokʼesel ta tsobobbail jlom yajtsʼaklomtak Cristo, jlome laj yichʼik tsatsal mantal. Jaʼ jech li avi eke (1 Cor. 5:11-13; 1 Tim. 5:20). Mi ta slekil yoʼonton tskʼelbeik skʼoplal moletik li ermano ti spasoj smule, xuʼ me xkʼot ta yoʼonton yuʼunik li mantal chalbeike.

5. ¿Kʼuxi xuʼ xchanbeik stalelal Cristo li moletik kʼalal tskoltaik jun jpas mulile?

⁵ Li moletike skotol ora chakʼbeik yipal ta spakbel skʼoplal stukʼil mantaltak Dios kʼuchaʼal la spas Jesuse. Pe kʼalal jech tspasike chakʼik ta ilel xmanxoalik, slekil yoʼontonik xchiʼuk chakʼik ta ilel ti skʼanojik li Jeovae. Kʼalal «oy svocol [yoʼonton]» chaʼiik li yajtsʼaklomtak Cristo ti spasoj smulike xchiʼuk ti «lajem stsatsal [yoʼontonike]», jaʼ xkaltik, ti laj xa sutes yoʼontonik ta melele, muʼyuk tsots chaʼiik moletik ti ta «[s]coltaic ta smucʼul [yoʼontonike]» (Sal. 34:18; Gál. 6:1). Pe ¿kʼusi chkʼot ta pasel kʼalal mu skʼan kʼusi albel li jpas mulile o ti muʼyuk bu tsutes yoʼontone?

6. ¿Kʼusi ti mu stakʼ spasik ta jyalel li moletik kʼalal tskoltaik li jpas mulile, xchiʼuk kʼu yuʼun?

⁶ Kʼalal mu skʼan stsak ta mukʼ tojobtaseletik ta Vivlia li jpas mulile o ti yan-o buchʼu chakʼbe smuline, yikʼaluk van chopol xaʼiik li moletik xchiʼuk li yan ermanoetik ta tsobobbaile. Ta skoj ti snaʼojik ti yakʼoj vokolil li jpas mulile xchiʼuk ti chopol stalelale, yikʼaluk van chakʼik ta ilel moletik ti chopol chaʼiike. Pe muʼyuk me lek ti jech ch-ilinike xchiʼuk maʼuk jech chakʼik ta ilel ti yichʼojbeik «sjol yoʼnton li Cristoe» (1 Cor. 2:16; kʼelo Santiago 1:19, 20). Jech onoʼox ti oy bu tsots laj yalbe mantal junantik krixchanoetik li Jesuse, pe muʼyuk kʼusi chopol xlokʼ ta ye ta skoj stiʼemal sjol mi jaʼuk ti tskʼan xa chakʼbe svokol yantike (1 Ped. 2:23). Moʼoj, yuʼun jamal laj yakʼ ta ilel ti xuʼ tsutes yoʼonton li jpas muliletike xchiʼuk ti xuʼ lek x-ilatik yan velta yuʼun Jeovae. Jech onoʼox, jun srasonal ti kʼu yuʼun tal ta Balumile jaʼ sventa «ay scolta jpasmuliletic» (1 Tim. 1:15).

7, 8. ¿Kʼusi skʼan te oyuk ta sjol li moletik kʼalal chchapanik jtosuk mulile?

⁷ ¿Kʼuxi skʼan xtun kuʼuntik li stalelal Jesús ta sventa ti kʼuyelan chkiltik li buchʼu chichʼ tukʼibtasel ta tsobobbaile? Veno, ti kʼusie skʼan svules ta joltik ti jaʼ sventa chichʼ chabiel chijetik ti kʼalal oy buchʼu chichʼ tukʼibtasele xchiʼuk ti chichʼ tijbel yoʼonton li jpas mulil ti akʼo sutes yoʼontone (2 Cor. 2:6-8). Akʼo mi toj kʼux chkaʼitik ti oy jlom chichʼik lokʼesel ta tsobobbail ta skoj ti muʼyuk tsutes yoʼontonike, tspat tajek koʼontontik ti ep buchʼutik tsutik tal ta stojolal Jeovae. Mi chakʼbeik yipal moletik ti akʼo jechuk stalelalik kʼuchaʼal Cristo kʼalal chchiʼinik ta loʼil li jpas mulile yikʼaluk me xaʼibe lek smelol li jpas mulile xchiʼuk ti sut tal ta tsobobbaile. Yikʼaluk van mu xa xvul ta sjol kʼusitik tekstoal kʼelbat, pe li kʼusi snaʼoj leke jaʼ ti ichʼe ta kʼuxe xchiʼuk ti tsake ta mukʼe.

⁸ Akʼo mi toj tsots bakʼintik li kʼusi tskʼelbeik skʼoplal li moletike skʼan me xakʼik ta ilel «li yabtel Chʼul Espiritue», mas to me li kʼanelale (Gál. 5:22, 23). Mu me stakʼ ti anil xa slokʼesik ta tsobobbail li buchʼu spasoj smule. Moʼoj, yuʼun ti kʼusie skʼan xakʼik ta ilel ti oy ta yoʼontonik ta melel tskʼan tskoltaike. Kʼalal tsutes yoʼonton li jpas mulil —ti ep jech chkʼot ta pasele—, oy me ta yoʼonton ta melel tstojbe ta vokol Jeova xchiʼuk li moletike, li «krixchanoetik [ti xkoʼolaj] kʼuchaʼal matanaletik[e]», ti jaʼ koltavanik sventa xlekub ta mantale (Efe. 4:8, NM, 11, 12).

Li kʼanelal yuʼun yajtsʼaklomtak Cristo ta slajebal kʼakʼale

9. Alo jtosuk ti kʼuyelan laj yakʼ ta ilel ti skʼanoj yajtsʼaklomtak li Jesuse.

⁹ Li ta Evanjelio yuʼun Lucase te chkiltik ti ep ta velta laj yakʼ ta ilel Jesús ti chkʼanvane. Li Jesuse snaʼoj onoʼox ti tsjoyibtaik Jerusalén li soltaroetik ta Romae, yuʼun jaʼ jun lum ti albil yuʼun Dios ti oy smule, jaʼ yuʼun li buchʼutik te nakalike mu stakʼ xjatavik. Jech oxal xi la spʼijubtas li yajtsʼaklomtake: «Cʼalal chavilic liʼ xa joyibtabil ta soldadoetic li lum Jerusalene, naʼic me ti yuʼun laj xa sta yorail [...] chichʼ vuqʼuesele». ¿Kʼusi van skʼan spasik kʼalal mi kʼot skʼakʼalil taje? Lek jamal li mantal laj yal Jesuse: «Voʼoxuc ti liʼ nacaloxuc ta Judea banamile, jatovanic batel ta anil ta vitsetic. Li bochʼotic liʼ oyic ta yut lume, acʼo loqʼuicuc batel. Li bochʼotic loqʼuemic batele, mu xa me xʼochic tal. Yuʼun jaʼ xa scʼacʼalil ta xichʼbeic stojol jech chac cʼu chaʼal tsʼibabil comele» (Luc. 21:20-22). Li soltaroetik ta Romae la sjoyibtaik Jerusalén ta sjabilal 66, laje sutik echʼel, vaʼun jaʼ jech la spasik li kʼusi laj yal Jchanubtasvanej yuʼunik li tukʼil yajtsʼaklomtak Cristoe.

10, 11. ¿Kʼuxi tskoltautik li stalelal yajtsʼaklomtak Cristo ti jatavik lokʼel ta Jerusalén sventa jchapan jbatik kʼalal mi tal «li tsots vocole»?

¹⁰ Kʼalal jatavemik xaʼox lokʼel ta Jerusalén li yajtsʼaklomtak Cristoe skʼan xakʼik ta ilel ti skʼanoj sbaike, jech kʼuchaʼal kʼanvan Cristoe xchiʼuk ti xakʼbe sbaik li kʼusi oy yuʼunike. Pe oy to jun smukʼta kʼoteb ta pasel ta mas jelavel li albil kʼop laj yal Jesuse. Xi laj yale: «Ta onoʼox xtal li tsots vocole. Muʼyuc onoʼox jech cʼalal ilic li banamile xchiʼuc cʼalal to tana. Muʼyuc ta xcʼot ta pasel jech yan velta noxtoc» (Mat. 24:17, 18, 21). Kʼalal skʼan toʼox «li tsots vocole» xchiʼuk ti kʼalal yakale, yikʼaluk van jnuptantik tsots vokoliletik ek xchiʼuk ti muʼyuk kʼusi lek x-ayan kuʼuntike. Mi jech jnopbentik kʼuchaʼal Cristoe jaʼ me tskoltautik kʼalal chkʼot yorail li vokoliletik taje.

¹¹ Skʼan me jchanbetik stalelal Jesús kʼalal jech chkʼot ta pasele xchiʼuk ti jkʼeltik ta slekil koʼontontik kʼusitik chtun yuʼun li yantike. Xi tojobtasvan li Pabloe: «Li jujunutique jaʼ acʼo jpastic li cʼusi jaʼ sventa slequilal yantique, ti jaʼ sventa tstsatsub o yoʼntonique. Yuʼun li Cristoe mu jaʼuc la spas li cʼusi lec laj yaʼay stuque. [...] Li Dios ti chijyacʼbutic smucʼul coʼntontic, ti chispatbutic coʼntontique, acʼo yacʼ ti coʼol avoʼntonic acotolic jech chac cʼu chaʼal tscʼan li Cajvaltic Jesuse» (Rom. 15:2, 3, 5).

12. ¿Kʼusi kʼanelal skʼan jchʼiestik, xchiʼuk kʼu yuʼun?

¹² Li Pedro ti kʼane tajek yuʼun Jesuse xi laj yalbe mantal li yermanotake: skʼan «ti achʼunojic xa li scʼop Dios ti jaʼ melele» xchiʼuk ti «chacʼanan abaic ta sventa ti achiʼil xa abaic ta voqʼuel cʼoteme». Jaʼ jech, xi albatike: «Jʼechʼel chacʼanan abaic o ta scotol avoʼntonic» (1 Ped. 1:22). Mas to jech skʼan jchʼies jtalelaltik kʼuchaʼal yajtsʼaklomutik Cristo li avie, yuʼun yantik stsatsaj li vokolil tsnuptan steklumal Diose. Mu me stakʼ jpat-o koʼontontik jtosuk li kʼusitik oy avi ti poʼot xa xlaje, jech kʼuchaʼal jamal chakʼ kiltik ti toj tsots xa vokolil ta takʼine (kʼelo 1 Juan 2:15-17). Ta skoj ti poʼot xa xlaj skotol li kʼusitike, skʼan me xi jnopaj mas ta stojolal Jeova. Jech xtok skʼan xi jnopaj mas ta stojolal li kermanotaktike xchiʼuk ti xkamigoin jbatik mas xchiʼukike. Xi laj yal li Pabloe: «Talbat xacʼan abaic ta sventa ti coʼol achʼunojique. Talbat chavichʼ abaic ta mucʼ» (Rom. 12:10). Li Pedro eke laj yalbe mas skʼoplal kaʼitik kʼalal xi laj yale: «Jaʼ tsots scʼoplal ti echʼem to acʼo acʼan abaic li voʼoxuque. Yuʼun li cʼanvaneje ta xacʼ chʼayuc ep mulil» (1 Ped. 4:8).

13-15. ¿Kʼuxi kʼanvanemik ep ermanoetik kʼalal chkʼot ta pasel vokoliletik jech kʼuchaʼal nikel, nojelal ta voʼ o yantik?

¹³ Ojtikinbil ta spʼejel Balumil li yajrextikotak Jeova ta skoj ti chakʼik ta ilel ti oy kʼanbail yuʼunike. Jech kʼuchaʼal liʼe, li ta 2005 ep abtejik ta skoltael ermanoetik ti chil svokolike, jaʼo laj yichʼ pasel kʼalal echʼem xaʼox li tsatsal ikʼal voʼetik ti ep kʼusitik la sjines ta sur ta Estados Unidose. Jaʼ tijbat-o yoʼontonik li stalelal Jesuse, jaʼ yuʼun mas ta 20.000 yajrextikotak Jeova ti lokʼ ta yoʼonton chkoltavanike. Ep laj yikta snaik xchiʼuk yabtelik sventa bat skolta li yermanotakik ti skʼanik koltaele.

¹⁴ Ta jun lum ti nopol yiloj nabe, tal jun tsatsal ikʼal voʼ ti lajuneb to metro muy staylej kʼalal la syukʼilan sba li nabe. Ta skoj taje, 80 kilometro to bat yoʼ bu nakal li krixchanoetike, jaʼ yuʼun laj yilik nojelal ta voʼ. Jutuk xa mu j-oʼloluk ti batsʼi jin li naetik ti bu echʼ li tsatsal ikʼal voʼe. Ep tal jkoltavanejetik ta epal balumiletik ti yichʼoj tal yabtejebik xchiʼuk yichʼojik tal jlom ti kʼusitik xuʼ chtun sventa xchaʼmeltsanik li naetike. Chaʼvoʼ meʼonal ermanaetik ti smuk xvix sbaike la xchapan sbaik sventa batik ti bu echʼ tsatsal ikʼal voʼe, vaʼun xanavik oxmil kilometro ta jkot kamioneta. June te xa kom nakluk-o, te xa chtun ta prekursora regular xchiʼuk yakal tskolta-o li Komite ti chtun ta skoltael ermanoetik ti chil svokolike.

¹⁵ Laj xa yichʼ vaʼanel ta achʼ o naka noʼox laj yichʼ meltsanel mas ta 5,600 sna ermanoetik xchiʼuk yan sna krixchanoetik li ta lum taje. ¿Kʼu yelan chaʼi sbaik li ermanoetik ti staojik ep koltaele? Jun ermana ti jin ta jyalel li snae, te bat nakluk ta jun bikʼit na ti stakʼ jochel echʼele xchiʼuk ti ch-och xa voʼ ta yute xchiʼuk oy jun estufa te ti mu xa xtune. Kʼalal laj yakʼbeik li na ti la smeltsanik li ermanoetike, ti lek noʼox sbae, pe ti lek ta naklebinele, li antse muʼyuk tsʼik yuʼun li okʼele. ¡La stojbe tajek ta vokol Jeova xchiʼuk ermanoetik ta skoj ti oy xa achʼ snae! Akʼo mi oy xa mas ta jun jabil chaʼvaʼanbil snaik li epal yajrextikotak Jeova ti lokʼem ta snaike, te to komik ti bu akʼbat xchʼamun snailik kʼuk sjalile. ¿Kʼu yuʼun muʼyuk xbat nakiikuk te? Jaʼ sventa ti oyuk bu xkomik li buchʼutik tskoltaik ermanoetik ti chil svokolike. Ta melel, jaʼ jech snopbenik kʼuchaʼal Cristo li ermanoetik taje.

Jechuk jtalelaltik kʼuchaʼal Jesús ta stojolal li jchameletike

16, 17. ¿Kʼuxi xuʼ jchanbetik stalelal Jesús kʼalal ta jkoltatik li ermanoetik ti ipike?

¹⁶ Akʼo mi mu jkotoltikuk kiloj jvokoltik ta nojelal ta voʼ o ta yan kʼusitik, jutuk mu jkotoltikuk chkil jvokoltik ta chamel o ti ip kutsʼ kalaltike. Ti kʼuyelan laj yakʼ ta ilel stalelal Jesús ta stojolal li buchʼutik ipike jaʼ me tskoltautik ti jechuk jpastik eke. Kʼalal laj yikʼbeik tal li buchʼutik ipike, ta skoj ti oy kʼanelal yuʼune jaʼ tijbat-o yoʼonton ta xkʼuxubinel xchiʼuk ta xpoxtael «li jchameleti[ke]» (Mat. 8:16; 14:14).

¹⁷ Li avie, mu xpoxtaj kuʼuntik ta skʼelobil juʼelal li buchʼutik ip jech kʼuchaʼal la spas Jesuse, pe xuʼ jech xkichʼtik ta kʼux li buchʼutik ipik kʼuchaʼal la spase. Jech kʼuchaʼal liʼe, chchanbeik me stalelal Jesús li moletik mi chchapanik lek xchiʼuk tskʼelik lek kʼuxi tskoltaik li ermanoetik ta tsobobbail ti ipike, jech kʼuchaʼal chal li beiltasel ta Mateo 25:39, 40 (kʼelo).a

18. ¿Kʼuxi laj yakʼ ta ilel xkʼuxul yoʼonton chaʼvoʼ ermanaetik ta stojolal jun ermana ti ipe, xchiʼuk kʼusitik kʼot ta pasel ta skoj?

¹⁸ Melel onoʼox, mu persauk molutik ta tsobobbail sventa jkoltatik li yantike. Jkʼeltik kʼusi kʼot ta pasel ta stojolal Charlene ti 44 jabil yichʼoje, jun ermana ti ip ta kanser chamel ti kʼajomal xa noʼox la lajuneb kʼakʼal chkuxi laj yal doktoretike. Chaʼvoʼ ermanaetik ta tsobobbail ti Sharon xchiʼuk Nicolette sbie, laj yakʼik venta ti chlubtsaj tajek ta xchabiel yajnil li ermanoe, jaʼ yuʼun laj yalik ti tskolta sbaik ta kʼakʼal-akʼobal ti kʼu to sjalil kuxul li ermanae. Pe maʼuk noʼox lajuneb kʼakʼal, yuʼun pas ta vakib xemana. Akʼo mi jech, laj yakʼ ta ilel xkʼuxul yoʼontonik jaʼ to ti kʼalal cham li ermanae. «Toj echʼ noʼox kʼux laj kaʼikutik ti muʼyuk bu ch-echʼ yuʼun li Charlene —xi li Sharone—, pe li Jeovae laj yakʼ kipalkutik. Li kʼusi la jnuptankutike jaʼ la snopajesunkutik mas ta stojolal Jeova xchiʼuk mas to laj kamigain jbakutik.» Xi chal li smalal Charlene: «Muʼyuk ta jchʼay ta jol li slekil yoʼontonik xchiʼuk ti la skoltaikun li chaʼvoʼ tukʼil ermanaetike. Ti ta sjunul yoʼonton la skoltaikun xchiʼuk ti xmuyubajik noʼoxe, jaʼ koltavan sventa mu masuk toj vokol laj yaʼi ti kʼu to sjalil kuxi li kuni Charlene xchiʼuk jaʼ laj yakʼbeikun jtsatsal xchiʼuk xkuxetel koʼonton ti chtun tajek kuʼune. Ta jtojbeik-o ta vokol. Ti laj yakʼ svokolik ta spasel taje jaʼ la stsatsubtas li xchʼunel koʼonton ta stojolal Jeovae xchiʼuk jaʼ la jkʼan-o mas skotol li ermanoetike».

19, 20. 1) ¿Kʼusitik stalelaltak Cristo la jkʼeltik li ta oxib xchanobiltak liʼe? 2) ¿Kʼusi oy ta avoʼonton spasel?

¹⁹ Li ta oxib xchanobil liʼe te la jkʼelbetik voʼtos stalelaltak Jesús, xchiʼuk te laj kiltik ep ta tos kʼuxi xuʼ jchanbetik snopben li Jesús xchiʼuk li stalelale. «Mu jnaʼ jtoy jba, manxuun», xi, jaʼuk me jech jtalelaltik kʼuchaʼal taje (Mat. 11:29). Kakʼ me kiptik ta yichʼel ta kʼux li yantik eke, akʼo mi jpas muliletik. Oyuk me stsatsal koʼontontik xchʼunbel smantal Jeova akʼo mi chkil jvokoltik.

²⁰ Xchiʼuk jechuk jkʼan li kermanotaktik jech kʼuchaʼal la skʼan Cristoe, «cʼalal ta slajeb». Taje jaʼ me chakʼutik ta ojtikinel ti jaʼutik melel yajtsʼaklom Cristoe (Juan 13:1, 34, 35). Jaʼ yuʼun chaʼa, jchʼuntik me li mantal liʼe: «Jechuc me avoʼnton chacʼan abaic o ta sventa ti coʼol achʼunojique», xchiʼuk jpʼeluk me koʼontontik jech jpastik: jtunes jkuxlejaltik sventa jmuyubtatik li Diose xchiʼuk sventa jkoltatik li yantike (Heb. 13:1). Li Jeovae ta me xakʼbutik bendision ti tsots chkakʼ kipaltike.

[Tsʼib ta yok vun]

¿Mi xuʼ xavalbe smelolal?

• ¿Kʼuxi xuʼ xchanbeik stalelal Cristo li moletik kʼalal tskoltaik jun jpas mulile?

• ¿Kʼu yuʼun toj tsots skʼoplal ti jechuk xi jkʼanvan kʼuchaʼal Jesús li ta slajebal kʼakʼal liʼe?

• ¿Kʼuxi xuʼ jchanbetik stalelal li Jesús kʼalal ta jkoltatik li ermanoetik ti ipike?

[Lokʼol ta pajina 17]

Li moletike tskʼanik ti akʼo sutik tal ta stojolal Jeova li buchʼutik spasoj smule

[Lokʼol ta pajina 18]

¿Kʼuxi laj yakʼ ta ilel ti jech snopbenik kʼuchaʼal Jesús li yajtsʼaklomtak ti jatavik lokʼel ta Jerusalene?

[Lokʼol ta pajina 19]

Li yajrextikotak Jeovae jaʼ ojtikinbilik-o ti chakʼik ta ilel ti oy kʼanbail yuʼunike