¿Mi jpʼisoj ta jTotik li Jeovae?

JUN veltae xi kʼanbat vokol yuʼun jun yajtsʼaklom li Mukʼta Jchanubtasvaneje: «Cajval, chanubtasuncutic ta scʼopanel Dios». Vaʼun xi la stakʼe: «Cʼalal cha cʼopanic Diose, jech xavalic: “Jtotic Dios, ichʼbiluc ta mucʼ li abie”» (Luc. 11:1, 2). Xuʼ xi toj tsots skʼoplal la sbiiltas Jeova jechuk li Jesuse: «Li Dios ti echʼem stsatsale», «jchanubtasvanej», Jpasvanej, «li Bochʼo mu snaʼ xlaj yoraile» xchiʼuk «li Mucʼta Ajvalil cuʼuntic ta sbatel osile» (Gén. 49:25; Isa. 30:20; 40:28; Dan. 7:9; 1 Tim. 1:17). Mu jechuk laj yal taje, yuʼun xi la sbiiltase: «Jtotic». ¿Kʼu yuʼun? Jaʼ van ta skoj ti tskʼan akʼo xi jnopaj ta stojolal li Buchʼu mas mukʼ ta sjunul vinajel-balumil jech kʼuchaʼal chnopaj ta stojolal stot jun olol ti bikʼit chakʼ sbae.

Pe oy krixchanoetik ti vokol chaʼiik ti tspʼis ta sTotik li Diose. Jun ants yajtsʼaklom Cristo ti Atsukoa sbie chal kaʼitik ti jaʼ jech kʼot ta stojolale: «Akʼo mi kichʼoj xaʼox voʼ, oy jayibuk jabil ti vokol laj kaʼi ti xi nopaj ta stojolal Jeovae xchiʼuk ti “jTot” xkute». Laje laj yal ti kʼu yuʼun jech nom oy ta stojolal chaʼie: «Mu xvul ta jol junuk velta chkaʼi ti lek kʼusi la spas ta jtojolal li jbatsʼi tote».

Li ta slajeb kʼakʼal avie toj vokol li kuxlejale, ep krixchanoetik ti «muʼyuc slequil yoʼntonic» ta stojolal li xnichʼnabike (2 Tim. 3:1, 3). Jaʼ yuʼun mu labaluk chkaʼitik ti ep krixchanoetik jech chaʼi sbaik kʼuchaʼal Atsukoe. Pe tspat koʼontontik ti ep srasonal kuʼuntik sventa jechuk xkiltik kʼuchaʼal jkʼanvanej Totil kuʼuntik li Jeovae.

Chakʼ kʼusitik chtun kuʼuntik li Jeovae

Skʼan jnaʼtik baʼyuk kʼuyelan stalelal li Jeova sventa jpʼis ta jTotike. Pe ¿kʼu yelan xuʼ jnaʼtik taje? Xi laj yal li Jesuse: «Muʼyuc bochʼo yan snaʼbe cʼu xʼelan yoʼnton li Nichʼonile, jaʼ noʼox snaʼ stuc li Totile. Jaʼ noʼox jech ec li Totile, muʼyuc yan bochʼo snaʼbe cʼu xʼelan yoʼnton, jaʼ noʼox snaʼ li Nichʼonile, xchiʼuc jaʼ noʼox tsnaʼic ec li bochʼotic ta xʼacʼbat snaʼic yuʼun li Nichʼonile» (Mat. 11:27). Jech oxal chaʼa, sventa chkojtikintik kʼuyelan li jTotik ta vinajele skʼan me jnopbetik lek skʼoplal li kʼusi laj yakʼ ta chanel Jesús ta stojolale. Veno, pe ¿kʼusitik laj yal ta stojolal Jeova un?

Baʼyel, laj yakʼ venta Jesús ti ta stojolal Dios likem tal xkuxlejal kʼalal xi laj yale: «Li vuʼune cuxulun o sbatel osil ta sventa li Jtote» (Juan 6:57). Jaʼ jech xuʼ xkaltik ta jtojolaltik ek (Sal. 36:9; Hech. 17:28). ¿Kʼu yuʼun laj yakʼ jkuxlejaltik li Jeovae? Jaʼ ti skʼanojutike. Jech ta melel, jaʼ jech skʼan jkʼantik ek.

Ti bu mas laj yakʼ ta ilel Jeova ti skʼanoj li krixchanoetike jaʼ ti kʼalal laj yakʼ ta matanal li skʼanbil Nichʼon sventa tspojutike. Jaʼ yuʼun xuʼ xkamigointik akʼo mi jpas mulilutik (Rom. 5:12; 1 Juan 4:9, 10). Jech xtok, ta skoj ti skotol chkʼot ta pasel yuʼun jTotik ta vinajel li kʼusi chale, xuʼ jpat lek koʼontontik ti ta jkʼupintik ta jelavel ti kʼalal «tsta slequilal yutsilalic [...] li xnichʼnab [Dios]» mi ta jchʼunbetik smantal xchiʼuk mi jkʼanojtike (Rom. 8:21).

Yan svinajeb ti skʼanojutik li Jeovae jaʼ ti «ta xacʼbe talel xojobal cʼacʼal» skotol krixchanoetike (Mat. 5:45, Ch). Muʼyuk onoʼox van bu ta jnoptik ta jpastik orasion sventa xlokʼ tal li Kʼakʼale. Pe ¡toj alakʼ xa noʼox sba xchiʼuk toj jtunel li xojobale! Toj labal xa noʼox sba ti kʼuyelan chakʼ kʼusitik chtun kuʼuntik li jTotik ta vinajele, snaʼoj xa onoʼox kʼusitik chtun kuʼuntik akʼo mi muʼyuk to bu jkʼanojbetik. ¿Mi mu jechuk ti skʼan jnopbetik lek skʼoplal li kʼusitik spasoj Jeova xchiʼuk ti jnopbetik skʼoplal ti kʼuyelan ta slekil yoʼonton chchabiutike? (Mat. 6:8, 26.)

Chchabiutik li jTotike

Xi jamal laj yalbe steklumal ta voʼne li Jeova ta stojolal j-alkʼop Isaiase: «”Acʼo me tsta yorail chlaj li vitsetique, acʼo me snaʼ soc li bicʼtal vitsetique, pero li cʼuxubinel cuʼun ta atojole mu xlaj o; li cʼusi chapal cuʼun ta atojole, mu soc o”, xi li Mucʼul Dios ti ep cʼuxot ta yoʼntone» (Isa. 54:10). Kʼalal jun xaʼox akʼobal skʼan xcham li Jesuse te laj yakʼ ta ilel ta jun orasion ti ta xkʼuxul yoʼonton chchabiutik li Diose. Xi la spas orasion ta sventa li yajtsʼaklomtake: «Ti stuquique liʼ ta xcomic ta banamil. Li vuʼune ta xa xisut tal te ta atojol. Tati, Chʼul Dios, chabio me ta sventa avuʼel» (Juan 17:11, 14). La stakʼ Jeova li orasion taje, yuʼun xchabioj li yajtsʼaklomtak Cristoe.

Jtos ti kʼusi tspas sventa tskoltautik lokʼel li ta kʼusitik tspasbutik Satanase jaʼ ti chakʼbutik li jtunel veʼlil ta mantal ta stojolal li «jʼabtel ti jun [«tukʼ», NM] yoʼnton [...], ti lec bije» (Mat. 24:45). Mi nopajtik noʼox ta jlajestike mas me kʼun chkaʼitik spasel liʼe: «Lapic me scotol li amaquic, li avabtejebic yacʼoj Diose». Jkʼelbetik skʼoplal junuk li abtejebal taje: «Tsaquic me lec li amaquique, jaʼ li xchʼunojel avoʼntonique, yuʼun jaʼ sventa chamacbeic o yabtejeb li pucuj ti tsanajtic sniʼ tsjip tal ta atojolique» (Efe. 6:11, 16). Ta melel, li xchʼunel koʼontontike jaʼ me chchabiutik ta skoj li kʼusitik xibal sba tsokesutik ta mantale xchiʼuk jaʼ me svinajeb ti xchabiojutik li jTotike.

Mas to me chkaʼibetik smelolal kʼu to yepal skʼanojutik jTotik ta vinajel mi ta jnopbetik lek skʼoplal kʼuyelan laj yakʼ ta ilel stalelal Cristo kʼalal ay ta Balumile. Xi laj yalbe yajtsʼaklomtak li Jesús ta Marcos 10:13-16: «Acʼo talicuc ta jtojol li ololetique». Vaʼun kʼalal la stsob sbaik tal ta stojolal Jesús li ololetike, akʼbatik bendision xchiʼuk petatik. ¡Xmuyubajik van tajek! Jaʼ jech yelan stalelal kʼuchaʼal xNichʼon li Jeovae. Jaʼ jech syeʼoj skʼob tsmala krixchanoetik ek li Jeovae. ¿Kʼuxi jnaʼojtik? Yuʼun xi laj yal li Jesuse: «Li bochʼotic laj xa yilicune laj xa yilic o li Jtote» (Juan 14:9).

Mu x-echʼ yoʼonton chkʼanvan li Jeovae. Chakʼbutik skotol li kʼusitik chtun kuʼuntike, mu buchʼu xkoʼolaj-o ti kʼuyelan chchabiutike xchiʼuk tskʼan ti xi jnopaj ta stojolale (Sant. 4:8). ¡Muʼyuk jech yan totil kʼuchaʼal taje!

Epal bendision

Toj ep me bendision ta jtatik mi ta jpat koʼontontik ta stojolal Jeova kʼuchaʼal jTotik ti mu x-echʼ yoʼonton chkʼanvane (Pro. 3:5, 6). Toj ep bendision la sta Jesús ta skoj ti ta sjunul yoʼonton la spat yoʼonton ta stojolal li Diose. Jaʼ yuʼun xi laj yalbe li yajtsʼaklomtake: «Mu jtucuc noʼox ti ta xichapanvane, jaʼ tacbilun talel yuʼun ti Jtote, xchiʼinojun ta xchapanel» (Juan 8:16, Ch). Oy onoʼox ta sjol ti chkoltaat yuʼun li sTote. Jech kʼuchaʼal liʼe, kʼalal laj yichʼ voʼe xi oy kʼusi laj yaʼi ti patbat yoʼontone: «Liʼi jaʼ Jnichʼon; lec jcʼanoj, lec jpatoj coʼnton yuʼun» (Mat. 3:15-17). Xchiʼuk xi laj yal kʼalal jutuk xaʼox skʼan xchame: «Tati, chcacʼ ta acʼob li jchʼulele» (Luc. 23:46). Muʼyuk bu xkʼunib jutuk xchʼunel yoʼonton akʼo mi jech la snuptan kʼuchaʼal taje.

Jaʼ me jech skʼan jpastik ek. Muʼyuk me kʼusi chi jxiʼo, yuʼun te oy ta jtojolaltik li Jeovae (Sal. 118:6). Li Atsuko ti laj xa kalbetik skʼoplale nopem xaʼi ti tskʼan tstsal ta yipal stuk li kʼusitik tsnuptane. Pe la xchanbe lek skʼoplal li xkuxlejal xchiʼuk chol mantal la spas Jesuse, xchiʼuk mas to la skʼelbe skʼoplal ti kʼuyelan lek laj yil sba xchiʼuk sTote. ¿Kʼusi kʼot ta pasel un? Xi chale: «Laj kaʼibe lek smelolal kʼusi skʼan xal ti oy jun jTotike xchiʼuk ti jpat koʼontontik ta stojolale. Muʼyuk xa noʼox kʼusi xkoʼolaj-o laj kaʼi ti xkuxet koʼonton yuʼune xchiʼuk ti xi muyubaje. Ta batsʼi melel, muʼyuk srasonal ti xkakʼ akʼo stsalutik li at-oʼontone».

¿Kʼusi yan bendision ta jtatik kʼalal ta jpʼis ta jTotik li Jeovae? Li batsʼi alab-nichʼnabiletike skʼanoj li stot smeʼike xchiʼuk tskʼan ti xmuyubaj noʼox yuʼunike. Skʼanoj tajek sTot li Jesuse, jaʼ yuʼun xi laj yale: «Jaʼ ta jpasbe scotol cʼacʼal li cʼusi lec chile» (Juan 8:29). Mi jaʼ jech jkʼanojtik li Dios eke, lek me kʼusitik ta jpastik xchiʼuk ta me jkʼupil kʼoptatik ta stojolal krixchanoetik (Mat. 11:25, NM; Juan 5:19).

«La jtsacbot lec ta abatsʼicʼob»

Oy kʼusi yakʼojbutik li jTotik ta vinajel sventa «chtal scolta[utike]», jaʼ li chʼul espiritu ti laj yalbe skʼoplal Jesús ti «jaʼ [tstojobtasutik] batel ta sventa scotol li cʼusi melele» (Juan 14:15-17, Achʼ Testamento, ta skʼop San Andrés; 16:12, 13). Ta melel, jaʼ tskoltautik ta yojtikinel mas li jTotike. Jech xtok, ta me skoltautik sventa «jlilin[tik], ta jlajesbe[tik] scʼoplal sbijilic, srazonic li bochʼotic bij scuyoj sbai[k]» ti oy kʼusi stikʼoj ta koʼontontike, jaʼ xkaltik, skotol li kʼusitik chopole xchiʼuk sventa «jlajesbe[tik] yip scotol li cʼusi tsnopique, yuʼun jech xuʼ chlic xchʼunic li Cristoe» (2 Cor. 10:4, 5). Jaʼ yuʼun ta sjunul me koʼonton jkʼanbetik Jeova li jkoltavanej taje, yuʼun xi laj yal li Jesuse: «Li Atotic te oy ta vinajele Chʼul Espíritu chacʼbe li bochʼotic ta scʼanique» (Luc. 11:13). Jkʼanbetik xtok ti akʼo skoltautik ta xchʼul espiritu sventa mas lek xkil jbatik xchiʼuke.

Chʼabal xiʼel xchiʼuk lek chabibil chaʼiik li ololetik kʼalal nitbil yuʼun stotike. Mi ta jpʼis ta jTotik li Jeovae ta me jpat-o lek koʼontontik yuʼun liʼe: «”Vuʼun li Mucʼul Diosun avuʼune; la jtsacbot lec ta abatsʼicʼob, jech laj calbot: «Mu xaxiʼ, vuʼun chajcoltaot», xacutot”, xi li Mucʼul Diose» (Isa. 41:13). Kʼuchaʼal chkiltike jtaoj mukʼ jmotontik, jaʼ ti ta jchiʼintik ta xanbal sbatel osil li Diose (Miq. 6:8, NM). Mi ta jpasbetik-o batel li kʼusi tskʼan yoʼontone ta me skʼanutik-o, xi jmuyubaj noʼox me xchiʼuk chabibil me chkaʼi jbatik ta stojolal li jTotik Jeovae.

[Tsʼib ta yok vun]