Jesucristo xchiʼuk li yaʼyej ti pukem ta spʼejel Balumile

«Li pʼijil vinik ta Capernaumea stuk xa noʼox jech ta skoj ti yakʼoj lek yibel ta sjol ta yoʼonton krixchanoetik avi kʼakʼal li chanubtaseletik yuʼune.» (GREGG EASTERBROOK, JTSʼIBAJOM)

JAMAL ta aʼyel chaʼa ti ep sbaliltak li kʼusitik chichʼ alele. Ti mi lek nopbil li kʼusitik chkaltike xuʼ tstij oʼontonal, tspat oʼontonal xchiʼuk xuʼ sjelbe xkuxlejal li krixchanoe. Pe stuk noʼox Jesucristo tojob stunesel. Jaʼ jech chakʼ ta ilel kʼusi laj yal jun buchʼu ti laj yaʼi li Mantaletik ta Vits laj yal Jesuse. «Cʼalal ilaj yoʼnton ta loʼil li Jesuse —xi la stsʼiba ta tsʼakal—, ichʼay yoʼnton li cristianoetique, yuʼun laj yaʼyic cʼu xʼelan ichanubtasvan li Jesuse.» (Mateo 7:28.)

Li krixchanoetik ta spʼejel Balumil avie xojtikinik junantik li chanubtaseletik ti toj tsotsik skʼoplal laj yal Jesuse. Jech kʼuchaʼal liʼe:

«Mu xuʼ chatunic yuʼun Dios me jaʼ batem avoʼntonic yuʼun acʼulejalique.» (Mateo 6:24.)

«Ti cʼu xʼelan chacʼan chaspasboxuc li cristianoetique, jaʼ jech xapasbeic ec.» (Mateo 7:12.)

«Acʼbeic cʼusi jaʼ yuʼun li Cesare; acʼbeic noxtoc cʼusi jaʼ yuʼun li Diose.» (Mateo 22:21.)

«Jaʼ toj echʼem xcuxet yoʼnton li bochʼo ta xaqʼue; jaʼ mu sta jech li bochʼo ta xichʼe.» (Hechos 20:35.)

Akʼo mi jech, li Jesuse maʼuk noʼox ti mu xchʼay ta sjol krixchanoetik li kʼusitik laj yale. Li aʼyejetik laj yale toj tsotsik skʼoplal, yuʼun chal li kʼusi melel sventa Diose, chakʼbe sbalil xkuxlejal li jun krixchanoe xchiʼuk jamal laj yal buchʼu tslajes li vokolile, ti jaʼ li Ajvalilal yuʼun Diose. Li avie ta jkʼelbetik batel skʼoplal li kʼusitik laj yale. Jaʼ jech chkaʼibetik smelolal ti kʼu yuʼun ta smiyonal noʼox «yakʼoj lek yibel ta sjol ta yoʼonton krixchanoetik avi kʼakʼal li chanubtaseletik yuʼune».

[Tsʼib ta yok vun]