Jesucristo: kʼusi tstij avoʼonton spasel li kʼusitik laj yale

«Ti vuʼune lital ta yacʼbel xcuxlejal ti jaʼ batsʼi xcuxlejal ta jʼechʼel [li krixchanoetike].» (JUAN 10:10, Ch)

KʼALAL tal ta Balumil li Jesucristoe tal tunuk, mu jaʼuk tal sventa tspasvan ta mantal. Li aʼyejetik la xchole jaʼ jun matanal ep sbalil sventa li krixchanoetike, yuʼun laj yakʼ ta ojtikinel li melel ta sventa Diose xchiʼuk li kʼusi tskʼan yoʼontone. Koliyal li chanubtaseletik yuʼune, ep miyon melel yajtsʼaklomtak mas xa jun yoʼonton ta xkuxlejalik.a Jech noxtok, ta skoj li aʼyej la xchole chakʼ kiltik li mukʼta matanal jtaojtike: jaʼ ti laj yakʼ stukʼil kuxlejal li Jesuse. Mi ta jkʼantik oyuk-o jlekilaltik sbatel osile oy kʼusi skʼan jpas ta jkuxlejaltik ta sventa li aʼyej la xchole.

Matanal laj yakʼ Dios xchiʼuk Cristo Li Jesuse snaʼoj onoʼox ti ch-akʼbat svokol yuʼun yajkontratak jaʼ to mi cham yuʼunike (Mateo 20:17-19). Manchuk mi jech, tal onoʼox ta Balumil. Jech kʼuchaʼal laj yal ta Juan 3:16, jun teksto ti lek ojtikinbile, «toj ep la xcʼuxubin scotol cristianoetic ta banamil li Diose, jech laj yacʼ li jun noʼox Xnichʼon oye, yuʼun jech mu chʼayeluc chbat li bochʼotic ta xchʼunic ti jaʼ Jcoltavanej yuʼunique; jaʼ ta xcuxiic o sbatel osil». Li Jesuse laj yal stuk ta mas tsʼakal ti «tal [y]acʼ [s]ba ta milel yoʼ ta [s]tojbe scolelic ti mu albajuc yepal» krixchanoetike (Mateo 20:28, Ch). Tana un, ¿kʼu yuʼun laj yal ti chakʼ li xkuxlejale, ti jaʼ muʼyuk laj yal ti chpojbate?

Ta skoj ti ep tajek skʼanoj krixchanoetik li Diose, kʼot ta yoʼonton tskʼan tspoj o tskolta li ta kʼusitik chopol laj yuʼuninbeik ta stot smeʼik li krixchanoetike, jaʼ xkaltik ti lik pasikuk ta jpas mulil xchiʼuk ti chchamike. Taje jaʼ ta skoj ti kʼu yuʼun la stak tal xNichʼon ta Balumil sventa chakʼ ta jpojobbailtik li stukʼil kuxlejale. Jech ek un, li Jesuse muʼyuk la sjalan li xkuxlejale. Li pojelal laj stoj Dios taje, muʼyuk yan buchʼu jech smoton yakʼojbe li krixchanoetike, stuk xa noʼox jech, yuʼun chakʼ jtatik kuxlejal sbatel osil.b

Kʼuxi xuʼ cha tabe sbalil Li matanale, te xa oy. ¿Pe mi cha tabe van sbalil li voʼote? Nopo ta sventa liʼe: ti oyuk buchʼu cha yakʼbot junuk amoton ti lek xa pixbile, ¿kʼusi skʼan cha pas? «Ta jyeʼ li kʼobe, ta jchʼam xchiʼuk kolaval xi chi», xa chi van ta anil. Taje koʼol tajek jech chkʼot ta pasel xchiʼuk li matanal chakʼbe krixchanoetik li Diose. Skotol li buchʼutik tskʼan stabeik sbalile, skʼan chakʼik ta ilel ti tskʼan chchʼamike. ¿Kʼuxi?

Laj xa jchantik tal, jech kʼuchaʼal laj yal li Jesuse, ti jaʼ noʼox ta sta xkuxlejalik sbatel osil li buchʼutik chakʼ xchʼunel yoʼontonik ta stojolale. Li vaʼ xchʼunel oʼontonale, ta melel chvinaj li ta xkuxlejal jujun krixchanoe (Santiago 2:26). Jaʼ yuʼun chaʼa, mi chkaltik ti oy xchʼunel koʼontontik ta stojolal Jesuse skʼan jechuk jkuxlejaltik kʼuchaʼal ichanubtasvane xchiʼuk ti kʼuchaʼal la spase. Sventa taje skʼan lek xkojtikintik li stuke xchiʼuk li sTote. Jech laj yal li Jesuse: «Ti jech ta xcuxiic sbatel osile, yuʼun xayotquinicot ti atuc noʼox batsʼi cuxul Diosote, xchiʼuc xotquinic noxtoc li Jesucristo laj atac tale» (Juan 17:3).

Leʼ xa ta chaʼmil jabile, li Jesuse la xchol jun aʼyej ti sjelojbe xkuxlejal epal miyon krixchanoetik ta spʼejel Balumile. ¿Mi cha kʼan cha chan mas ta sventa li aʼyej taje? ¿Mi cha kʼan cha naʼ kʼuxi cha tabe sbalil xchiʼuk avutsʼ avalal li avie xchiʼuk li ta sbatel osile? Saʼo li yajrextikotak Jeovae, ta slekil yoʼontonik cha skoltaikot ta stael li stakʼobiltake.

Cha ta yan mantaletik ta jelavel ta sventa Jesucristo, li vinik ti la xchol jun aʼyej ti xuʼ sjelbot akuxlejal sbatel osile.

[Tsʼibetik ta yok vun]