Oy kʼusi ti muʼyuk toʼox buchʼu snaʼe

¿MI OY kʼusi yalojboxuk ti muʼyuk toʼox buchʼu snaʼe?a... Oy jtos kʼusi ta jkʼan ta jloʼiltabot. Taje jaʼ jun chʼul loʼil, li Vivliae chal ti «jech onoʼox chapal yuʼun Dios ta sliquebal ti muʼyuc toʼox bochʼo la snaʼe» (Romanos 16:25). Ta slikebe jaʼ noʼox snaʼoj stuk Jeova li loʼil taje. Tana un jkʼeltik batel kʼuxi laj yut sventa snaʼ yuʼun skotol li krixchanoetike.

Baʼyel, ¿mi xa naʼ kʼusi skʼan xal li jpʼel kʼop chʼul, xie?... Li kʼusi chʼule toj tsots skʼoplal, lek sak xchiʼuk muʼyuk xchopolil. Ta skoj ti chʼul xchiʼuk chʼabal xchopolil li Diose, chʼul li loʼil ti «muʼyuc toʼox bochʼo la snaʼe» xchiʼuk ti jaʼ noʼox stuk xojtikin li Diose. Pe li loʼil ti tsots skʼoplal taje oy buchʼutik tskʼan tsnaʼik, ¿mi xa naʼ buchʼutik?... ¡Jaʼ li anjeletike! Yuʼun li Vivliae xi chale: «Li jʼalmantaletique toj chac ox sqʼuel yaʼyic ec ti jech chcʼot ta pasele» (1 Pedro 1:12).

Li Jesús eke snaʼoj li loʼil ti muʼyuk toʼox buchʼu snaʼe xchiʼuk jaʼ li buchʼu baʼyel laj yakʼ ta naʼele. Kʼalal tal ta Balumile laj yalanbe li yajtsʼaklomtake. Xi laj yale: «Li voʼoxuque acʼbiloxuc xa anaʼic cʼu xʼelan chventainvan li Diose, jaʼ ti muʼyuc toʼox bochʼo la snaʼe» (Marcos 4:11). ¿Mi la avakʼ venta kʼusi skʼoplal li loʼil ti muʼyuk toʼox buchʼu snaʼe?... Jech, jaʼ skʼoplal ti kʼuyelan chventainvan li Diose, jaʼ li ajvalilal laj yal Jesús akʼo jkʼanbetik ta orasion li Jeovae (Mateo 6:9, 10).

Kʼuchaʼal laj xa kiltike, li Ajvalilal yuʼun Diose toj jal toʼox muʼyuk buchʼu snabe skʼoplal. Jech, kʼalal lokʼesatik yuʼun Jeova ta nichimaltik Edén li Adán xchiʼuk Evae, li yajtuneltak Diose mu toʼox snaʼik lek ta sventa li Ajvalilal taje, jaʼ to laj yal skotol Jesús kʼalal tal ta Balumile. Jaʼ noʼox snaʼojik toʼox ti oy ta yoʼonton Dios ti tskʼatajes ta paraiso li Balumile (Génesis 1:26-28; 2:8, 9; Isaías 45:18). Junantik yajtuneltak Dios taje laj yalik ti toj kʼupil sba li kuxlejal liʼ ta Balumil kʼalal mi lik spas mantal li Ajvalilal yuʼun Diose (Salmo 37:11, 29; Isaías 11:6-9; 25:8; 33:24; 65:21-24).

Pe ¿buchʼu la stʼuj Dios sventa x-ajvalilaj li ta Ajvalilal taje? ¿Mi cha kʼan cha naʼ?... Jaʼ li xNichʼon ti Jesucristo sbie. Li Vivliae chal ti chichʼ yabtel sventa ch-ajvalilaj kʼuchaʼal jun «Jʼacʼ-Jun-Oʼntonal» (Isaías 9:6, 7). Jaʼ yuʼun li voʼone xchiʼuk voʼote tsots skʼoplal ti xkojtikintik «lec cʼusi snopoj li Dios Totil ti muʼyuc toʼox vinajeme, jaʼ li scʼoplal Cristoe» (Colosenses 2:2). ¿Kʼusi skʼan xkojtikintik ta sventa li Cristoe? Baʼyel, li Jeovae la sjelubtasbe xkuxlejal xNichʼon ta yalajeb María sventa xvokʼ kʼuchaʼal jun krixchano, ti jaʼ li baʼyel anjel la spas te ta vinajele. Ta tsʼakale, li xNichʼon taje laj yakʼ ta matanal xkuxlejal sventa xuʼ jta jkuxlejaltik sbatel osil (Mateo 20:28; Juan 3:16; 17:3).

Avie ta xkalbot yan smelolal xtok li chʼul loʼil ti jal toʼox muʼyuk buchʼu snaʼe. Li Diose laj yal ti chbatik ta vinajel ep viniketik xchiʼuk antsetik sventa chbat xchiʼinik li Jesuse. ¿Kʼusi van tspasik te xa naʼ?... Jaʼ ti ch-ajvalilajik xchiʼuk li Cristoe (Efesios 1:8-12).

¿Mi cha kʼan cha naʼ buchʼutik junantik ti ch-ajvalilajik xchiʼuk Jesuse?... Junantik taje jaʼik li tukʼil jtakboletike, yuʼun li Jesuse laj yalanbe ti chbat xchapan bu chkʼotik li ta vinajele (Juan 14:2, 3). Li ta Mateo 10:2-4, Marcos 15:39-41 xchiʼuk Juan 19:25 te cha tabe sbi junantik li buchʼutik chbat spasik mantal ta vinajel xchiʼuk Jesuse.

¿Jayvoʼ van chbatik te? Taje jaʼ te smakoj li chʼul loʼil ti muʼyuk toʼox buchʼu snaʼ xtoke, ti jech jelav ep jabiletike. Pe avie jnaʼojtik xa. Li Vivliae chal ti jaʼik 144,000 krixchanoetike (Apocalipsis 14:1, 4).

¿Kʼu yelan la avil li chʼul loʼil ta sventa ti «cʼu xʼelan chventainvan li Diose, jaʼ [li loʼil] ti muʼyuc toʼox bochʼo la snaʼe»? ¿Mi mu jechuk ti toj kʼupil sbae?... Jech oxal, ¿kʼu yuʼun mu xlik achan ta sventa taje? Mi jech cha pase, jaʼ jech cha koltaun ta yalbel batel epal krixchanoetik.