¿Mi chapalot xa sventa li jun kʼakʼal ti toj tsots skʼoplal li jabil liʼe?

KʼALAL slajeb xaʼox akʼobal kuxul liʼ ta Balumil li Jesuse la slikesbe jun skʼakʼalil sventa jvules ta joltik li slajele. Li kʼusi chichʼ pasel taje ojtikinbil kʼuchaʼal «snaʼubil Cajvalti[k]» (1 Corintios 11:20). Kʼalal laj yoʼontone, li Jesuse xi laj yalbe li yajtsʼaklomtake: «Jech me xapasilanic, yuʼun jech chanaʼilanicun o» (Lucas 22:19). Li buchʼutik tskʼan chchʼunbeik smantaltak avie tsots skʼoplal chilik ti tstsob sbaik sventa tsvules ta sjolik li slajel Cristoe.

Pe, ¿kʼusi van kʼakʼalil chichʼ pasel taje? ¿Mi oy van kʼusi baʼyel xuʼ jpastik sventa jchapan jbatik? Lek ti jchanbetik skʼoplal jkotoltik taje.

Svulesel ta joltik jujun jabil

Li ta jkʼakʼaliltike, li kʼusitik tsots skʼoplal chkʼotanuk ta pasele nopem xaʼiik tsvules ta sjolik jujun jabil li krixchanoetike. Jun skʼelobile jaʼ ti jujun jabil oy kʼusi tspasik li krixchanoetik sventa tsvules ta sjolik kʼalal jin ta avion ta 11 yuʼun septiembre ta 2001 li torres gemelas ti World Trade Center sbie. Akʼo mi te ta sjolik jujun kʼakʼal li buchʼutik te laj yamigoik o yutsʼ yalalik li kʼusi kʼot ta pasele, tsots skʼoplal chaʼiik li kʼakʼal taje.

Li ta voʼne eke jech toʼox chkʼot ta pasel (Ester 9:21, 27). Li Jeovae laj yalbe j-israeletik ti akʼo spasilanik li kʼin Koltaele, jun kʼin ti chvulesbat ta sjolik kʼalal labal sba lokʼesatik yuʼun Dios ta Egipto ta skoj ti mosoinbilik toʼox tee. Jujun jabil tspasik li kʼin taje, jaʼo skʼakʼalil yuʼunik kʼalal lokʼik ta Egiptoe (Éxodo 12:24-27; 13:10).

Li Jesús xchiʼuk yajtsʼaklomtake naka toʼox laj yoʼontonik spasel kʼin Koltael kʼalal la spas ta sba velta li jun veʼel ti jaʼ chtun ta tsʼakal sventa li snaʼobil slajele (Lucas 22:7-20). Li kʼin Koltaele laj skʼoplal, jaʼ xa kʼot ta xkʼexol li «snaʼubil Cajvaltique», ta skoj ti jun velta ta jabil chichʼ toʼox pasel li kʼin taje, jaʼ jech chichʼ pasel ek li snaʼobil Kajvaltike. Pe ¿kʼusi ora taje?

Skʼakʼalil sNaʼobil slajel Cristo

Sventa jnaʼtik bakʼin ta jvules ta joltik li slajel Cristoe, oy chaʼtos kʼusi skʼan jtsaktik ta venta. Baʼyel, li kʼakʼaletik ta skalendario judioetike maʼuk ta oʼlol akʼobal chlik xchapel kʼuchaʼal avie, moʼoj, yuʼun chlik xchapel ta bat kʼakʼal kʼalal mi chʼay xaʼox batel li Kʼakʼale xchiʼuk jaʼ to tstsuts ta yokʼomal kʼalal chchʼay xaʼox batel xtok li Kʼakʼale (Levítico 23:32).

Xchibal, li uetik tstunes li judioetike maʼuk jech toʼox chichʼ chapel kʼuchaʼal li avie, chlik xchapik toʼox ta yunenal U kʼalal ta yan yunenal U. Yan toʼox li sbiik xtoke, jech kʼuchaʼal adar xchiʼuk nisán (Ester 3:7). Li kʼin Koltaele ta toʼox spasik ta 14 yuʼun nisán li ta baʼyel yual ta skalendario judioetike (Levítico 23:5; Números 28:16). Li vaʼ kʼakʼal taje, ta sjabilal 33 ta jkʼakʼaliltike li jromaetike la sjokʼanik ta jtel teʼ li Jesuse, taje jech kʼot ta pasel kʼalal echʼ xaʼox 1,545 jabil ti lik spasik ta sba velta li kʼin Koltaele. Ta melel, jaʼ jun kʼakʼal ti toj tsots skʼoplal sventa li yajtsʼaklomtak Cristoe.

Ta skoj ti yan-o li kalendario ta jtunestik avie, ¿kʼuxi xuʼ jnaʼtik kʼusi kʼakʼalil chkʼot li 14 yuʼun nisane? Li buchʼutik chchapike baʼyel tstsakik tal ta venta jun kʼakʼal ti jaʼo lajcheb ora sak osil xchiʼuk lajcheb ora ikʼ osile, ti jechtik chkʼot ta pasel li ta 21 yuʼun marso kʼalal chlik primavera ta hemisferio norte. Ta tsʼakale jaʼ xa noʼox smalaojik chlik vinajuk ta sba velta achʼ U ta Jerusalén sventa chlik xchapik talel li baʼyel yuʼun nisane. Mi chlik jchaptik chanlajuneb kʼakʼal kʼalal jech taje ta jnabetik li yorail sNaʼobil slajel Cristoe. Li ta akʼobaltik taje jaʼo chyijub li Ue. Mi jech ta jchaptik batel kʼuchaʼal chal li Vivliae, li 14 yuʼun nisán li jabil liʼe jaʼo chkʼot ta 17 yuʼun avril kʼalal mi chʼayem xaʼox batel li Kʼakʼale.a

Li yajrextikotak Jeovae yakal xa chchapan sbaik sventa tstsob sbaik li ta sNaʼobil slajel Cristo li jabil liʼe. Takbilik ta ikʼel skotol li buchʼutik tskʼan chbatike. Sventa xa naʼ bu xchiʼuk ta jayib ora chichʼ pasele, jakʼbo li yajrextikotak Jeova bu nakalote. Vuleso ta ajol ti maʼuk ta kʼakʼaltik chichʼ pasele, ti jaʼ kʼalal mi chʼay xaʼox batel li Kʼakʼale. Yuʼun jaʼ jech la spas Jesús xchiʼuk li yajchankʼoptake (1 Corintios 11:25, NM]). Li ta akʼobal ta domingo 17 yuʼun avril ta 2011 jaʼo yorail chichʼ pasel li «snaʼubil Cajvaltique», ti oy xa ta 1,978 jabil jech chichʼ pasel talele. Jech noxtok, li Jesuse cham ta slikeb 14 yuʼun nisán. ¡Jaʼ jun kʼakʼal ti toj lek ti jvules ta joltik ti laj yakʼ sba ta matanal li Jesuse!

¿Mi chapalot xa?

¿Mi oy van kʼusi xuʼ xa pas sventa xa chapan aba sventa li kʼakʼal taje? Veno, xuʼ xa nopilan ta sventa li kʼusi spasoj ta jtojolaltik li Jesuse. Li livro ¿Kʼusi chchanubtasvan ta melel li Vivliae?b skoltaoj epal miyon krixchanoetik sventa mas jamal xaʼibeik smelol kʼu to yepal sbalil xchiʼuk kʼusi svinajeb li slajel Jesuse (Mateo 20:28).

Yan xtok ti kʼuxi xuʼ jchapan li koʼontontik xchiʼuk li jnopbetik ta sventa li jun kʼakʼal ti toj tsots skʼoplal taje, jaʼ ti jvules ta joltik kʼusitik kʼot ta pasel kʼalal jutuk xaʼox skʼan xcham Jesús liʼ ta Balumile. Li ta pajinaetik chtale te cha ta jun rekuadro ti chʼakbil ta oxpole: li ta oʼlole te chalbe skʼoplal li kʼusitik kʼot ta pasel li ta kʼakʼaletik taje, ta tsʼetkʼobe te tsakal talel li kʼusitik ora kʼot ta pasele —ta skalendario judioetik xchiʼuk li ta kalendario avie—, ta batsʼikʼobe te cha ta li tekstoetik chalbe skʼoplal taje. Jech noxtok, te tsakal tal li kapituloetik ta livro El hombre más grande de todos los tiempos ti bu chalbe skʼoplal li loʼiletik taje.c

Chkalbotkutik ti xa kʼel jujun kʼakʼal li loʼiletik ti chalbe skʼoplal Jesucristo kʼalal nopol xaʼox li snaʼobil slajele. Mi jech la apase mas me chapalot kʼalal chkʼot yorail li sNaʼobil slajel Cristo li jabil liʼe, ti jaʼ jun kʼakʼal ti toj tsots skʼoplale.

[Tsʼibetik ta yok vun]

[Tsʼib ti mukʼtik sletraile ta pajina 22]

Snaʼobil slajel Cristo: Domingo 17 yuʼun avril ta 2011

[Tavla ta pajina 23]

TA SLAJEBAL XEMANA

2011: martes 12 yuʼun avril

2012:

2013:

▪ Sabado (chʼul kʼakʼal sventa kuxob oʼontonal)

9 YUʼUN NISÁN (chlik mi chʼay xaʼox batel li Kʼakʼale)

Pʼijan me ta sventa liʼe: Li ta skalendario judioetike, li kʼakʼale chlik xchapik ta bat kʼakʼal kʼalal mi chʼay xaʼox batel li Kʼakʼale xchiʼuk jaʼ to tstsuts ta yokʼomal kʼalal chchʼay xaʼox batel xtok li Kʼakʼale

▪ Mukʼta veʼel ta sna Simón ti tsakbil toʼox ta kʼaʼemal chamele

▪ Li Mariae la smalbe ta sjol Jesús jun muil poxil ti batsʼi toyol stojole

▪ Epal judioetik tal skʼelik Jesús xchiʼuk li Lazaroe

2011: mierkoles 13 yuʼun avril

2012:

2013:

▪ Och batel ta Jerusalén li Jesuse

▪ Chchanubtasvan ta chʼulna

10 YUʼUN NISÁN (chlik mi chʼay xaʼox batel li Kʼakʼale)

▪ Te ch-echʼ yuʼun akʼobal ta Betania

2011: jueves 14 yuʼun avril

2012:

2013:

▪ Sob ibat ta Jerusalén

▪ Lik slokʼes li buchʼutik ta xchonolajik xchiʼuk ta xmanolajik te ta chʼulnae

▪ Kʼopoj tal ta vinajel li Jeovae

11 YUʼUN NISÁN (chlik mi chʼay xaʼox batel li Kʼakʼale)

2011: viernes 15 yuʼun avril

2012:

2013:

▪ Chanubtasvan ta chʼulna li Jesuse, la stunes lokʼolkʼopetik

▪ Jamal laj yalbe smul li fariseoetike

▪ Laj yalbe skʼoplal li meʼonal ants ti laj yakʼ matanal takʼine

▪ Laj yal ti chlaj li Jerusalene

▪ Laj yal kʼusitik chkʼot ta pasel kʼalal liʼ xaʼox oy li Jesuse

12 YUʼUN NISÁN (chlik mi chʼay xaʼox batel li Kʼakʼale)

2011: sabado 16 yuʼun avril

2012:

2013:

▪ Te echʼ yuʼunik kʼakʼal xchiʼuk yajtsʼaklomtak ta Betania

▪ Li Judase la snop kʼuyelan chakʼ ta kʼabal li Jesuse

13 YUʼUN NISÁN (chlik mi chʼay xaʼox batel li Kʼakʼale)

2011: domingo 17 yuʼun avril

2012:

2013:

▪ Chchapanik bu tsmeltsanik veʼlil sventa kʼin Koltael li Pedro xchiʼuk Juane

▪ Ta bat kʼakʼal to kʼotik Jesús xchiʼuk li lajunvoʼ yajtsʼaklomtake

14 YUʼUN NISÁN (chlik mi chʼay xaʼox batel li Kʼakʼale)

▪ La spas kʼin Koltael li Jesuse

▪ La spokbe yok yajtakboltak

▪ La stak lokʼel Judas

▪ La slikes li sNaʼobil slajele

oʼlol akʼobal

2011: lunes 18 yuʼun avril

2012:

2013:

▪ Akʼat ta kʼabal Jesús kʼalal te oy ta Getsemanie xchiʼuk chukat batel

▪ Jatavik batel li jtakboletike

▪ Chchapanat yuʼun Sanedrín

▪ La smuk ta yoʼonton Jesús li Pedroe

▪ Bat yan velta ta stojolal Sanedrín

▪ Laj yikʼik batel ta stojolal Pilato, ta tsʼakale ta stojolal Herodes xchiʼuk chaʼsut ta stojolal Pilato

▪ Albat skʼoplal ti chichʼ milele, la sjokʼanik ta jtel teʼ

▪ Ta oxibtik ora ta bat kʼakʼal icham

▪ La syalesik li ta jtel teʼe xchiʼuk la smukik

15 YUʼUN NISÁN (chlik mi chʼay xaʼox batel li Kʼakʼale)

▪ Sabado (chʼul kʼakʼal sventa kuxob oʼontonal)

2011: martes 19 yuʼun avril

2012:

2013:

▪ Laj yal Pilato ti akʼo xchabiik lek li smukinal Jesuse

16 YUʼUN NISÁN (chlik mi chʼay xaʼox batel li Kʼakʼale)

2011: mierkoles 20 de avril

2012:

2013:

▪ Chaʼkuxi li Jesuse

▪ Laj yakʼ sba ta ilel Jesús ta stojolal li yajtsʼaklomtake

TE TO STSʼAK TA JOT PAJINA

TUKʼ XA SET BATEL BU XCHOLET CHBAT LI PUNTOETIKE