«Jaʼ jun ermano ti toj lek yoʼonton xchiʼuk jaʼ jun lekil amigo ti kʼanbil tajeke»

LI JOHN BARR —ti Jack ch-albat yuʼun yamigotake— itsuts yabtel ta stojolal Jeova ta Balumil ta sob sabado 4 yuʼun disiembre ta 2010 kʼalal yichʼoj xaʼox 97 jabile. Li ermanoe jaʼ toʼox jun li ta Jtsop Jbeiltasvanej yuʼun yajRextikotak Jeovae. Xi ch-albat skʼoplal li ermanoe: «Jaʼ jun ermano ti toj lek yoʼonton xchiʼuk jaʼ jun lekil amigo ti kʼanbil tajeke».

Li ermano Jack Barr ivokʼ ta Aberdeen (Escocia), jaʼ mas bikʼit li ta yoxvoʼal xchiʼiltak ta vokʼele. Li stot smeʼe tʼujbil chbatik ta vinajel. Nopem xaʼi xmuyubaj chalbe skʼoplal ti kʼuyelan ichʼi tal ta sbikʼtal li ta snaike xchiʼuk koliyal tajek chal ti lek kʼusi i-akʼbat yil yuʼun stot smeʼ ta sbikʼtale.

Toj lek snaʼ xkʼexav kʼalal chex jchʼiel toʼoxe. Jaʼ yuʼun, toj ep laj yakʼ yipal sventa stsal yuʼun li xiʼel chaʼi kʼalal tskʼopon krixchanoetike. Pe itsal onoʼox yuʼun un. Oy jun bat kʼakʼal ta domingo ta 1927, kʼalal chanlajuneb xaʼox jabil yichʼoje, laj yalbe stot ti chapal xa la lek sventa chbat xchiʼin ta chol mantal ta naetike. Vaʼun jaʼ jech ilik tunuk tal ta stojolal Jeova. Ta sjunul-o yoʼonton chchol mantal jaʼ to ti kʼalal ichame.

Oy kʼusi toj tsots la snuptan smeʼ li Jacke ti jutuk xaʼox mu teuk ichame. Ta skoj taje jaʼ te ilik snop tal lek kʼusi tspas ta xkuxlejal, jech oxal laj yakʼ sba ta stojolal Jeova ta sjabilal 1929. Akʼo mi jech, jaʼ to laj yakʼ ta ilel ti yakʼoj sba ta stojolal Jeova kʼalal laj yichʼ voʼ ta 1934. Kʼalal ilokʼ voʼob jabile ibat tunuk ta Betel ta Londres, Inglaterra. Vaʼun jaʼ te ilik tal ti chtun ta tsʼakal ora ta stojolal Jeova ti ijalij 71 jabile.

Kʼalal inupun xchiʼuk Mildred Willett ta 29 yuʼun oktuvre ta 1960 li ermano Barre laj yal ti te la slikes «jun kuxlejal ti stuk xa noʼox jeche». Li ermanae jaʼ jun baxbol jcholmantal ti chanem lek ta prekursoral xchiʼuk ta misioneroale. Toj lek ta chanbel stalelalik ta sventa ti jmoj noʼox oyik xchiʼuk ti kʼuyelan oyik ta mantale, jech-o la spasik jaʼ to ti itsuts yabtel ta stojolal Jeova ta Balumil ta oktuvre ta 2004 li Mildrede. Skotol kʼakʼal la skʼelik Vivlia ti kʼu sjalil yikʼoj sbaike.

Kʼalal chaʼiik Jack Barr li buchʼu laj yojtikinike, jaʼ chvul ta sjolik ti lek snaʼ xtojobtasvane, ti snaʼ snopele, ti lek yoʼontone xchiʼuk ti jech tspas kʼuchaʼal chal Vivliae. Lek tsots snaʼ x-abtej i-echʼ ta Balumil, jaʼ jun ermano ti toj lek yoʼontone xchiʼuk ti jaʼ jun lekil amigo i-echʼe. Li ta sloʼil, li ta mantaletik laj yetʼes xchiʼuk li ta orasionetik la spase, jaʼ te laj yakʼ ta ilel ti lek yij ta mantale xchiʼuk ti lek tajek xil sba xchiʼuk Jeovae.

Ta melel, ta jnaʼtik tajek li kermanotik Barr ti jkʼanojtik tajeke. Pe xijmuyubaj tajek ti jnaʼojtik ti laj xa sta li matanal kuxlejal ti mu snaʼ xlaj skʼoplale, jun matanal ti ta sjunul yoʼonton la smalae xchiʼuk ti nopajtik noʼox laj yalbe skʼoplale. Jaʼ onoʼox oy tajek ta yoʼonton taje (1 Cor. 15:53, 54).a

[Tsʼib ta yok vun]