Nopajan ta stojolal Dios
¿Mi chopol van chaʼi Jeova kʼalal oy kʼusi chopol ta jpastike?
MI JAʼ jeche, ¿mi chopol van chaʼi kʼalal chopol jtalelal ta jpastike? ¿Mi xuʼ van xmuyubaj-o o chat-o yoʼonton ta skoj li kʼusitik ta jpastike? Jech kʼuchaʼal chal jlom filosofoetik ta voʼnee, muʼyuk la buchʼu xuʼ syayijesbe yoʼonton li Diose, jaʼ yuʼun xuʼ la jnoptik ti muʼyuk kʼusi chaʼi ta yoʼontone. Pe li Vivlia mu jechuk chal, yuʼun chchanubtasvan ti oy ta yoʼonton li kʼusi ta jpastike xchiʼuk ti chopol chaʼi sba kʼalal oy kʼusi chopol ta jpastik li Jeovae. Jkʼeltik batel li kʼusi chal li versikulo 40 xchiʼuk 41 li ta Salmo 78.
Li Salmoe liʼe chakʼ ta ilel kʼuyelan laj yaʼi sba Jeova kʼalal chopol la spas sbaik li voʼneal j-israeletike. Kʼalal laj xaʼox yichʼik koltael lokʼel ta mosoil ta Egiptoe, li Jeovae laj yalbe ti ta xkomik li ta trato la spas xchiʼuk li j-israeletike xchiʼuk ti jaʼ noʼox lek ta xil sbaike. Mi la xchʼunbeik li smantaltake jaʼ noʼox stuk lek ch-ilatik, vaʼun chtunesatik sventa chkʼot ta pasel li kʼusi tskʼan tspase. Li stukike laj yalik ti jech tspasike, pe ¿mi la spasik li kʼusi laj yalike? (Éxodo 19:3-8.)
Li jtsʼibajom yuʼun Salmoe xi chale: «Toj ep ta velta la stoy sbaic ta stojol te ta xocol banamil» (versikulo 40). Xi to chal xtoke: «La saʼbeic scʼacʼal yoʼnton yan velta noxtoc» (versikulo 41). Jech kʼuchaʼal chakʼ ta ilel li jtsʼibajome li jteklum taje nopajtik noʼox tstoy sbaik. Ti kʼuyelan mu xichʼik ta mukʼ li Jeovae te ilik ta taki xokol balumil, jaʼo kʼalal mu toʼox jaluk slokʼelik ta mosoil li ta Egiptoe. Te «lic chopol cʼopojicuc ta stojol» li Diose xchiʼuk la xchibal kʼoptaik ti xuʼ yuʼun xchiʼuk ti mi melel oy ta yoʼonton chkoltavane (Números 14:1-4). Jlik livro sventa li buchʼutik tsjelubtasik ta yan kʼop li Vivliae chal ti jpʼel kʼop «la stoy sbaic ta stojol» xie, xuʼ la xi xichʼ alel «la stsatsubtas yoʼontonik ta stojolal Dios» o «laj yalbeik Dios ti moʼoje». Manchuk mi jech, ta skoj ti oy slekil yoʼonton li Jeovae kʼalal mi la sutes yoʼontonike chakʼbe perton. Pe akʼo mi jech, kʼalal mi echʼ xaʼox kʼuk sjalile chchaʼ pasik jech xtok. Jaʼ yuʼun jech-o la spasilanik (Salmo 78:10-19, 38).
¿Kʼu van yelan laj yaʼi sba Jeova kʼalal ep ta velta valopatinat yuʼun li jteklum taje? Li versikulo 40 chal ti «ep laj yacʼbeic yat yoʼnton[e]». Ta yan Vivliae chal ti «laj soquesbeic yoʼnton» li Diose. Ta sventa li versikulo liʼe jlik livroe xi chale: «Li kʼusi skʼan xale jaʼ ti ta xchopol talelik li j-hebreoetike chakʼ-o at-oʼonton, jech kʼuchaʼal chaʼi sba jun totil kʼalal tstoy sba xnichʼone». Jech kʼuchaʼal chakʼbe yat yoʼonton stot smeʼ li jun nichʼonil ti tstoy sbae, li jtoyba israeletike laj «yacʼbeic yat yoʼnton li Chʼul Dios yuʼun Israele» (versikulo 41).
¿Kʼusi chakʼ jchantik li salmo liʼe? Jaʼ ti toj echʼ noʼox oy ta yoʼonton yajtuneltak li Jeovae xchiʼuk ti muʼyuk tsnop ta anil ti ta chʼayel xa chbatike. Ti te oy ta joltik taje, tspat koʼontontik ta melel. Pe akʼo mi jech, laj xa kiltik ti kʼux chaʼi xchiʼuk tsyayijesbe yoʼonton Jeova li kʼusi ta jpastike. ¿Mi mu jaʼuk tstij koʼontontik ti akʼo jaʼuk jpastik li kʼusi leke?
Jaʼ yuʼun chaʼa, mu me jaʼuk jpastik li kʼusi tsyayijesbe yoʼonton li Diose, jaʼ jpastik batel li kʼusi lek sventa xmuyubaj-o yoʼonton kuʼuntike. Taje jaʼ li kʼusi tskʼanbutike. Li ta Proverbios 27:11, xi chalbutike: «Jnichʼon, bijan me, jech xcuxet noʼox coʼnton avuʼun». Jaʼ jech, mi ta jchʼunbetik smantal ta skoj ti ta jkʼantik xmuyubaje, jaʼ me jun mukʼta matanal ti mu kʼusi xkoʼolaj-o chil li Jeovae.
Ti bu kʼalal xuʼ jkʼeltik Vivlia li u liʼe:
[Lokʼol ta pajina 27]
Mi ta jchʼunbetik smantal ta skoj ti ta jkʼantik xmuyubaje, jaʼ me jun mukʼta matanal ti mu kʼusi xkoʼolaj-o chil li Jeovae