¿Mi tsots van skʼoplal li kʼusi chal Vivliae?

«Lik jchiʼin ta xanbal keremetik kʼalal lajuneb toʼox jabilale. Ta slikebale naka noʼox ta jtsakbe jba jkʼobkutik xchiʼuk ta jtsʼutsʼ jbakutik, pe mu toʼox jaluk yechʼele ta xa jpikbe jba jbekʼtalkutik. Voʼlajuneb jabil kichʼoj kʼalal lik abtejkune, pe li viniketike chalbeikun xa onoʼox ti akʼo jchiʼinik ta vayele. Ta jkʼan chkakʼ ta ilel ti muʼyuk chixiʼe xchiʼuk ti ta jpas skotol li kʼusi tspasik li jchiʼiltak ta abtele. Jaʼ yuʼun, sventa lek xilikune, la jchiʼinanik-o ta vayel.» (SARA, AUSTRALIA)a

¿MI LABAL van chavaʼi ti oy srelijion yutsʼ yalal kʼalal laj yichʼ tsʼitesel li Sarae? Akʼo mi laj yakʼik persa li stot smeʼ Sara ti xchanubtasik ta sventa lekil talelaletik jech kʼuchaʼal chal li Vivliae, li stuke maʼuk jech la spas.

Xuʼ van ep buchʼutik tsnopik jech kʼuchaʼal li Sarae, yuʼun chʼabal xa sbalil chilik li kʼusi chal Vivlia ta sventa li chiʼinejbail ta vayele. Yantik xtoke tsnopik ti manchuk mi oy srelijionike xuʼ kolem noʼox chaʼi ta xkuxlejalik sventa buchʼuuk noʼox xchiʼinik ta vayel.

Pe, ¿mi tsots van skʼoplal ti jnaʼtik xchiʼuk ti jpastik li kʼusi chal Vivlia ta sventa li chiʼinejbail ta vayele? Li Vivliae «jaʼ laj yacʼ ta naʼel ta sventa svuʼel stuc li Diose. Jech lec chtun ta sventa chanubtasel» (2 Timoteo 3:16). Jaʼ yuʼun, mi jchʼunojtik ti jaʼ Jpasvanej kuʼuntik li Diose xchiʼuk ti jaʼ yakʼoj ta naʼel li Vivliae, tsots me skʼoplal skʼan xkiltik li kʼusi chale.

Kʼux ta alel, pe ep krixchanoetike mu snaʼik kʼusi chchanubtasvan Vivlia ta sventa li chiʼinejbail ta vayele. Akʼo mi chalik ti stsakojik ta mukʼ li jnitvanejetik ta relijion eke, tskontrain sba li kʼusi chalike. Ta skoj taje oy chʼakbail li ta relijionetik mas ojtikinbilike.

Sventa mu jpastik li kʼusi chalik yantike, ¿mi mu jaʼuk lek xanaʼ ti jsabetik mas skʼoplal jtuktike? Li ta yan mantal chtale chalbe smelolal lajuneb sjakʼobiltak ti ta onoʼox jakʼbe jbatik ta sventa li chiʼinejbail ta vayele xchiʼuk tstakʼ ta Vivlia. Li ta yoxibal mantal liʼe, te chalbe smelolal ti kʼu yuʼun toj jtunel li kʼusi ta jnop ta jpastik ta jujuntal ta tsʼakale.

[Tsʼib ta yok vun]