¿Kʼusitik chkʼot ta pasel li ta Skʼakʼalil Chapanele?

1. ¿Kʼusi jaʼ li Skʼakʼalil Chapanele?

Ep krixchanoetike tsnopik ti Skʼakʼalil Chapanel chalbe skʼoplal ta Vivliae jaʼ jech kʼuchaʼal xvinaj li ta lokʼol ta batsʼikʼobe. Tsnopik ti ta smiyonal xa noʼox chʼulelal tstsob sbaik ta yeloval xchotleb li Diose sventa xichʼik chapanel ta skoj li kʼusitik la spasike: junantike ch˗akʼbatik kuxlejal ta vinajel, yantike chtakatik batel ta kʼatinbak o ta infierno. Pe li Vivliae mu jechuk chal, yuʼun chal ti jaʼo chichʼ chʼaybel skʼoplal choplejal li ta Skʼakʼalil Chapanele (Salmo 96:13). Li Jesuse jaʼ vaʼanbil ta Jchapanvanej yuʼun Dios sventa xchapan li krixchanoetike xchiʼuk ti xichʼ tal lekilale (kʼelo Isaias 11:​1-5 xchiʼuk Echos 17:31).

2. ¿Kʼusitik lekik chichʼ pasel li ta Skʼakʼalil Chapanele?

Li baʼyel vinik ti jaʼ li Adane, la stoy sba ta stojolal li Jeova Diose. Ta skoj taje, skotol li snitilulale jpasmuliletik, chil svokolik xchiʼuk chchamik (Romanos 5:12). Sventa xlekub yan veltae, li Jesuse ta xchaʼkuxes ta smiyonal xa noʼox krixchanoetik. Li Vivliae chal ti jaʼo chchaʼkuxi li krixchanoetik kʼalal jaʼo ochem ta ajvalil ta jmil jabil li Jesukristoe (kʼelo Apokalipsis 20:​4, 11, 12).

Li buchʼutik chichʼ chaʼkuxesele ta xichʼik chapanel, pe maʼuk ta skoj li kʼusitik la spasik kʼalal muʼyuk toʼox chamemike, yuʼun jaʼ chichʼik˗o chapanel li kʼusi tspasik kʼalal mi chaʼkuxiemik xa oxe. Skʼan xchʼunik li kʼusi chal li ta achʼ balbalvunetik ti te chalbe skʼoplal ta Apokalipsis 20 (Romanos 6:⁠7). Li jtakbol Pabloe laj yal ti «chchaʼkuxiik li buchʼutik tukʼike xchiʼuk li buchʼutik muʼyuk [tukʼik]» sventa xuʼuk xojtikinik li Diose (kʼelo Echos 24:15).

3. ¿Kʼusi to mas chkʼot ta pasel li ta Skʼakʼalil Chapanele?

Li buchʼutik muʼyuk laj yojtikinik Jeova xchiʼuk ti muʼyuk tunik ta stojolal k’alal kuxulik toʼoxe, xuʼ to xlik spasik li k’usi tskʼan yoʼonton Jeova k’alal mi chaʼkuxiike. Pe li buchʼutik chkuxiik ti mu skʼan xchʼunbeik smantal Diose, ta xichʼik «chapanel» (kʼelo Juan 5:​28, 29 xchiʼuk Isaias 26:​10; 65:20).

Kʼalal mi tsuts xa ox li Skʼakʼalil Chapanel ti chjalij jmil jabile, staoj xa ox yav yuʼun Jeova ti kʼu yelan la spas ta slikebal li krixchanoetik ti tukʼik xae (1 Korintios 15:​24-​28). ¡Kʼupil sba kʼusi tstaik li buchʼutik chchʼunik mantale! Li Diabloe chichʼ chukel jmil jabil ta xab, pe chichʼ koltael lokʼel yuʼun Dios sventa x˗akʼvan ta preva slajeb velta. Li Satanase tspas ti bu kʼalal xuʼ yuʼun sventa mu xchʼunbeik smantal Dios li krixchanoetike, pe li buchʼutik tukʼ chakʼ sbaik ta stojolal Diose chkuxiik ta sbatel osil (kʼelo Isaias 25:8 xchiʼuk Apokalipsis 20:​1, 7-9).

4. ¿Mi oy to yan Skʼakʼalil Chapanel ti xuʼ sta˗o bendision li krixchanoetike?

Li Vivliae chalbe skʼoplal yan skʼakʼalil chapanel. Jaʼ chakʼbe slajeb li choplejal ta balumile. Ta anil noʼox chvul li skʼakʼalil taje, jech kʼuchaʼal ta anil noʼox tal li Nojelal ta voʼ ta skʼakʼalil Noe ti la smil skotol li chopol krixchanoetike. Xuʼ me xijmuyubajutik ti jutuk xa skʼan xichʼ lajesbel skʼoplal li chopol krixchanoetike xchiʼuk ti xuʼ xijkuxi ta sbatel osil ta jun balumil ti oy xa tukʼilale (kʼelo 2 Pedro 3:​6, 7, 13).