Li kʼusitik tsjakʼ jkʼelvunetike

Kʼalal laj yal Jesús li teksto ta Mateo 19:10 kʼalal ta 12, ¿mi jaʼ la skʼan laj yal ti yuʼun staojik matanal ti jech akʼbilik-o yuʼun Dios li buchʼu muʼyuk tsnop chnupune?

▪ Jkʼeltik kʼu yuʼun jech laj yal Jesús ta sventa li buchʼu muʼyuk snup xchiʼile. Kʼalal la sjakʼbeik Jesús ta sventa li xtuchʼel nupunel ta registro civil li fariseoetike, li Jesuse jamal laj yal kʼusi chal smantal Dios ta sventa li nupultsʼakale. Akʼo mi chal ta Smantal Moisés ti xuʼ xakʼbe svunal ta sventa ti maʼuk xa yajnil ta skoj ti «oy cʼusi chopol la stabee» ta slikebale mu jechuk toʼox (Deut. 24:1, 2). Jaʼ yuʼun li Jesuse xi jamal laj yale: «Li bochʼo ta xicta yajnile, me muc ta scojuc yuʼun imulivaje, me ta xicʼ yan ants, jaʼ noʼox ta xmulivaj xchiʼuc» (Mat. 19:3-9).

Kʼalal jech laj yaʼiik li yajtsʼaklomtake, xi laj yalike: «Me jech oy scʼoplal li vinic xchiʼuc yajnile, jaʼ lec ti mu xinupincutique». Xi la stakʼ li Jesuse: «Mu acotolicuc xuʼ avuʼunic jech. Jaʼ noʼox xuʼ yuʼunic li bochʼo jech acʼbilic yuʼun Diose. Oy viniquetic ti mu xnupinic oe, yuʼun jech ivoqʼuic o ta smeʼic. Oy viniquetic noxtoc ti jaʼ to tspasatic ta kapon yuʼun yan viniquetique. Oy viniquetic stuc tsnopic ti mu xnupinic oe, yuʼun jech xuʼ lec chtunic yuʼun li Diose. Li bochʼotic xuʼ chaʼyic jeche, acʼo spas» (Mat. 19:10-12).

Oy viniketik ti mu xnupunike jaʼ ta skoj ti jech vokʼike, li yantik xtoke oy kʼusi tsots la snuptanik o laj yichʼik pasel ta kapon. Pe oy junantik xtoke yalel spasoj sbaik ta kapon, jaʼ xkaltik, ti spajtsaj yuʼun sbaike, ti xuʼ yuʼun stuk chkomik ti muʼyuk snopoj chnupunike, «yuʼun jaʼ jech xuʼ lec chtunic yuʼun li Diose». Jech kʼuchaʼal la spas Jesuse, li buchʼutik muʼyuk tsnop chnupunike jaʼ ta skoj ti tskʼan chtunik mas ta stojolal li Ajvalilal yuʼun Diose. Muʼyuk staoj smotonik ti jech-o akʼbilik yuʼun Dios kʼalal vokʼike, mi jaʼuk bu ta jotukal la staik. Ta melel, li buchʼutik xuʼ chaʼiik jeche, lokʼ ta yoʼonton stukik stael li matanal taje, jaʼ xkaltik, ti muʼyuk chnupunike.

Jech kʼuchaʼal laj yal Jesuse, li jtakbol Pabloe laj yalbe smelolal ti skotol yajtsʼaklom Cristoe xuʼ xtunik ta stojolal Dios akʼo mi nupunemik o mi muʼyuk, pe li buchʼu «jech icʼot ta yoʼnton» muʼyuk chnupune jaʼ mas «lec me jech tspase». ¿Kʼu yuʼun ti jaʼ mas leke? Yuʼun li buchʼu nupunemike skʼan xchʼak yipik, skʼakʼalik sventa xchabi xchiʼuk chakʼbe li kʼusi chtun yuʼun li snup xchiʼilike, pe li buchʼutik muʼyuk snup xchiʼilike muʼyuk kʼusi mas sbainojik, jaʼ yuʼun xuʼ mas xtunik ta spasbel yabtel li Diose. Ti jech xuʼ yuʼunik ti muʼyuk chnupunike, jaʼ jun matanal yakʼoj Dios chaʼiik (1 Cor. 7:7, 32-38).

Jaʼ yuʼun chaʼa, li Vivliae chal ti buchʼu muʼyuk chnupune staoj jun matanal, jaʼ xkaltik, ti xmuyubaj ti xuʼ yuʼun stuk chkome, taje maʼuk ti yuʼun jech xa akʼbil yuʼun Diose, moʼoj, yuʼun jaʼ to chakʼ persa sventa jaʼ xbat ta yoʼonton spasel li kʼusitik ta sventa Ajvalilal yuʼun Diose. Jaʼ yuʼun ep yajtsʼaklom Cristoe jaʼ jech lokʼem ta yoʼontonik ti muʼyuk chnupunike, jech oxal lek ti jkʼupil kʼoptatike.

[Lokʼol ta pajina 20]