«Ch-acʼbat smoton li bochʼo ta saʼe»

¿Mi oy van sbalil chil Jeova ti chakʼik persa chlekubtasbat yoʼonton yuʼun yajtuneltake? Xuʼ van oy buchʼu ta xal ti moʼoje, yuʼun chalik ti muʼyuk oyutik ta yoʼonton li Diose. Ti jech chalike oy kʼusi chopol chakʼik ta aʼiel ta stojolal ti mu meleluke. Li Vivliae, te chal ti mu jechuk taje. Jamal chal ti ep sbalil chil Jeova kʼalal chakʼik persa li tukʼil yajtuneltake. Jchanbetik skʼoplal kʼusi laj yal jtakbol Pablo ta Hebreos 11:6.

¿Kʼusi skʼan jpastik sventa lek chilutik li Jeovae? Xi la stsʼiba li Pabloe: «Me muʼyuc xchʼunojel coʼntontique, mu xuʼ lec chijyilutic li Diose». Li Pabloe muʼyuk laj yal ti vokol sventa lek xilutik Dios mi muʼyuk xchʼunel koʼontontike, moʼoj, yuʼun laj yal ti mu xuʼ lek chilutike. Jaʼ xkaltik, li xchʼunel koʼontontike toj tsots skʼoplal sventa jlekubtasbetik yoʼonton li Diose.

¿Kʼu yelan li xchʼunel oʼontonal ti lek chil li Jeovae? Oy chaʼtos kʼusi smakoj. Baʼyel, li jun krixchanoe «persa chchʼun ti oy li Diose». Yan Vivliae chal ti «scʼan chʼunel ti cuxul ti Diose». ¿Kʼuxi xuʼ lek chilutik mi mu jchʼuntik ti oy ta melele? Jaʼ yuʼun, li melel xchʼunel koʼontontike oy to kʼusi smakoj, yuʼun li pukujetik eke xchʼunojik ti oy li Diose (Santiago 2:19). Ti jchʼunojtik ti oy ta melel li Diose oy kʼusi tstij koʼontontik spasel, taje te chkakʼtik ta ilel ta jkuxlejaltik jech kʼuchaʼal lek chile (Santiago 2:20, 26).

Xchibal, «persa chchʼun» ti «ch-acʼbat smoton» yuʼun Dios li jun krixchanoe. Li buchʼu oy xchʼunel yoʼonton ta melele, spatoj lek yoʼonton ti mu jecheʼuk yakʼoj persa jech xkuxlejal kʼuchaʼal lek chil li Diose (1 Corintios 15:58). ¿Kʼuxi xuʼ lek chilutik Dios mi mu jchʼuntik ti oy ta yoʼonton chakʼ jmotontik o ti xuʼ yuʼune? (Santiago 1:17; 1 Pedro 5:7.) Li jun krixchano ti chal ti muʼyuk oyutik ta yoʼonton li Diose, ti muʼyuk kʼusi snaʼ stoj ta vokole xchiʼuk ti muʼyuk slekil yoʼontone, mu xojtikin li Dios ti chalbe skʼoplal li Vivliae.

¿Buchʼutik chakʼbe smoton li Jeovae? Jaʼ «li bochʼo ta saʼe» xi li jtakbol Pabloe. Jlik livro ti jaʼ sventa li buchʼutik tsjelubtasik ta yan kʼop li Vivliae chal ti jpʼel kʼop ta griego «li bochʼo ta saʼe» ti xie, maʼuk skʼan xal ti «oy bu chbat jsaʼtike», yuʼun jaʼ skʼan xal ti «chkichʼtik ta mukʼe». Yan livro xtoke chal ti jpʼel kʼop taje chakʼ ta aʼiel ti kʼu to yepal oy ta koʼontontik xchiʼuk ti skʼan jsaʼtike. Jech ta melel, li Jeovae chakʼbe smoton li buchʼutik chlokʼ ta yoʼontonik yichʼel ta mukʼ ta melel ta skoj ti oy xchʼunel yoʼontonik xchiʼuk ti skʼanojike (Mateo 22:37).

¿Kʼuxi chakʼbe smoton tukʼil yajtuneltak li Jeovae? Li stuke yaloj ta melel ti muʼyuk kʼusi xkoʼolaj-o li matanal chakʼbe yajtuneltake, taje chakʼ ta ilel kʼu to yepal slekil yoʼonton xchiʼuk ti kʼanvaneme, yuʼun chakʼ jun kuxlejal sbatel osil ta paraiso liʼ ta Balumile (Apocalipsis 21:3, 4). Li buchʼutik ta sjunul yoʼonton tsaʼik Jeova avie, tstaik epal bendision, tskʼupin xkuxlejalik xchiʼuk jun yoʼontonik koliyal ti chkoltavan li chʼul espiritue xchiʼuk li pʼijilal ta jtatik ta Vivliae (Salmo 144:15; Mateo 5:3).

Ta melel, li Jeovae jaʼ jun Dios ti tstojbe ta vokol tukʼil yajtuneltak ti chtunik ta stojolale. Ti anaʼoj xa taje, ¿mi mu jaʼuk tstij avoʼonton sventa xanopaj ta stojolal? Mi jeche, ¿kʼu yuʼun mu xachan mas kʼuxi xuʼ xachʼies xchiʼuk xavakʼ ta ilel li xchʼunel oʼontonal ti jaʼ chakʼbutik-o jmotontik li Diose?