¿Kʼu yuʼun skʼan jsabetik lek smelolal li kʼusi chal Vivliae?

LI VIVLIAE LEK TUKʼ CHALBE SKʼOPLAL LI KʼUSITIK KʼOTEMIK TA PASEL TA VOʼNEE

Mariano: Li voʼone muʼyuk mas oy ta koʼonton li kʼusitik sventa relijione. Jech oxal, muʼyuk kʼusi mas xuʼ jloʼiltatik.

Roberto: Kolaval ti chaval li kʼusi oy ta avoʼontone. Li voʼone jaʼ jbi Roberto. ¿Li voʼote kʼusi abi?

Mariano: Mariano.

Roberto: Toj lek chkaʼi ti chkojtikinote Mariano.

Mariano: Jechun ek.

Roberto: Oy kʼusi ta jkʼan ta jakʼbot: ¿mi oy toʼox arelijion?

Mariano: Ta jbikʼtale oy toʼox. Pe laj kikta kʼalal libat ta chanun ta universidade.

Roberto: Jaʼ yuʼun chaʼa. ¿Kʼusi laj achan li ta universidade?

Mariano: Jaʼ sventa Historia xchiʼuk Ciencias sociales. Yuʼun toj lek xkaʼi xchanel li kʼusitik kʼotemik ta pasel ta voʼnee, yuʼun jaʼ me te chalbe skʼoplal chavil li kʼusi spasojik talel li krixchanoetik liʼ ta Balumile.

Roberto: Jech avaʼuk, toj lek chalbe skʼoplal. Yikʼaluk van anaʼoj xa ti chal kʼusitik kʼotemik ta pasel ta voʼne li Vivlia eke. ¿Mi oy asaʼojbe skʼoplal ta sventa li kʼusi chal li livro taje?

Mariano: Muʼyuk. Jnaʼoj ti jaʼ jun lekil livroe, pe muʼyuk toʼox bu jnopoj ti chalbe skʼoplal li kʼusitik kʼotemik ta pasele.

Roberto: Yileluk li voʼote muʼyuk kʼusi chopol chanop ta sventa li kʼusi chal Vivliae. Mi xokolot uni jlikeluke, oy ta koʼonton chkakʼ avil junchibuk skʼelobil ta Vivlia ti chakʼ ta ilel ti lek tukʼ li kʼusi chalbe skʼoplale.

Mariano: Lek oy chaʼa, pe jaʼ noʼoxe chʼabal Jvivlia.

Roberto: Mu xavat avoʼonton. Oy liʼ kichʼoj tale. Jkʼeltik baʼyuk li kʼusi chal ta 1 Crónicas kapitulo 29, versikulo 26 xchiʼuk 27. Xi chale: «Li David xnichʼon Isaie, lec la spas yabtel ta ajvalilal ta stojol li israeletique. Jaʼ chaʼvinic (40) jabil iʼabtej ta ajvalilal ta stojol li israeletique. Vucub jabil iʼabtej te ta Hebrón; oxlajuneb xchaʼvinic (33) jabil iʼabtej ta Jerusalén».

Mariano: ¿Mi jaʼ li baʼyel skʼelobil taje?

Roberto: Jaʼ. Pe oy kʼuk sjalil ti buchʼutik chchanbeik skʼoplal li Vivliae, laj yalik ta jamal ti jecheʼ noʼox la li sloʼilal Davide.

Mariano: ¿Mi jech? ¿Pe kʼuchaʼal?

Roberto: Yuʼun muʼyuk bu yan chichʼ albel skʼoplal ti kuxi ta melel li Davide, kʼajomal noʼox ta Vivlia. Pe li ta 1993, li buchʼu chchanbeik skʼoplal kʼusitik voʼne mukajtik ta lume (arqueólogos) oy kʼusi tsʼibabil la staik ta jpech ton ti xi chichʼ jelubtasele «sna David» xchiʼuk «ajvalil ta Israel».

Mariano: Aa... Toj lek chkaʼi une.

Roberto: Li Vivlia xtoke chalbe skʼoplal li Poncio Pilatoe, ti jaʼo ajvalilaj kʼalal ay ta Balumil li Jesuse, akʼo mi ep buchʼutik chalik ti muʼyuk la kuxie. Pe te chichʼ albel skʼoplal ta Lucas kapitulo 3, versikulo 1 xchiʼuk te tsakal skʼoplal yan yaj-abteltak ajvalil.

Mariano: Aa, jech avaʼuk. Yuʼun xi chale: «Jaʼo ochem ta ajvalilal ta Judea banamil li Poncio Pilatoe; jaʼo ochem ta ajvalilal ta Galilea banamil li Herodese»...

Roberto: Jaʼ jech. Li buchʼutik chchanbeik skʼoplale jal muʼyuk toʼox xchʼunojik lek mi kuxi ta melel li Poncio Pilatoe. Pe te xa van ta 50 jabile, la staik noʼox xtok jpech ton ta Oriente Medio ti te tsʼibabil li sbie.

Mariano: Kere, taje muʼyuk toʼox kabinoj.

Roberto: Ximuyubaj ti voʼon chkakʼ avojtikine.

Mariano: Ti melel xkaltik avaʼie, li voʼone xkoʼolaj chkil kʼuchaʼal yan livroetik li Vivliae, pe mu jnaʼ mi oy kʼusi xtun-o kuʼuntik li avi kʼakʼale. Xuʼ van chal li kʼusitik kʼotemik ta pasel ta voʼnee, pe jaʼ noʼox.

LI VIVLIAE, JAʼ JUN LIVRO TI OY-O SBALIL LI AVIE

Roberto: Ep buchʼutik jech tsnopik kʼuchaʼal li voʼote, pe li voʼone jelel li kʼusi ta jnope. ¿Mi xa naʼ kʼu yuʼun? Yuʼun li kʼusi noʼox chtun kuʼuntike jaʼ jech-o kʼuchaʼal li ta slikebal kuxlejale. Ta onoʼox xtun kuʼuntik ti oyuk jnatike, jkʼuʼ jpokʼtik, jveʼeltik, jchiʼin jbatik ta loʼil xchiʼuk ti xijmuyubajuk li ta kutsʼ kalaltike. ¿Mi mu jechuk?

Mariano: Jech avaʼuk.

Roberto: Li Vivliae tskoltautik sventa oyuk kuʼuntik taje. Yuʼun akʼo mi jaʼ jun livro ti voʼne xa tajeke, pe jech-o tskoltautik li avie.

Mariano: ¿Mi jech xanaʼ?

Roberto: Jaʼ jech. Kʼalal laj yichʼ tsʼibael li Vivliae, toj jtunel li tojobtaseletik yichʼoje, pe jech-o jtunel li avie.

Mariano: Albun kaʼitik junuk skʼelobil.

Roberto: Li Vivliae chkoltavan sventa jnaʼtikuk kʼusi xuʼ jpastik ta sventa li takʼine, li kutsʼ kalaltike xchiʼuk ta sventa li kamigotaktike. Xkoʼolaj kʼuchaʼal jun mapa ti chal bu beal skʼan jtamtik batele. Yuʼun li avie mu xa toj kʼunuk ti jaʼutikuk jun lekil totil xchiʼuk lekil malalile, ¿mi mu jechuk?

Mariano: Jech avaʼuk. Li voʼone oy xa ta jun jabil jnupunel xchiʼuk li kajnile, pe mu kʼunuk chkaʼikutik sventa jmoj li kʼusi ta jnopkutike.

Roberto: Li Vivliae te chal tojobtaseletik ti toj jtunele xchiʼuk ti mu tsotsuk ta chʼunele. Jkʼeltik avil li kʼusi chal Efesios kapitulo 5, versikulo 28. ¿Mi xuʼ xakʼel tal?

Mariano: Lek oy, xi chale: «Jaʼ yuʼun li viniquetique tscʼan jech acʼo scʼan yajnilic ec jech chac cʼu chaʼal cʼux ta yoʼnton sbecʼtal stuquique. Li bochʼo lec scʼanoj yajnile jaʼ scʼanoj sba stuc chcʼot».

Roberto: Kolaval. Ti jech jchʼuntik li tojobtasel taje, ¿mi mu tauk xlekub li jkuxlejaltik ta kutsʼ kalaltike?

Mariano: Xuʼ van xlekub, pe mu kʼunuk ta pasel.

Roberto: Jaʼ jech avaʼuk, mu kʼunuk ta pasel. Yuʼun li ta kapitulo onoʼox taje oy jun versikulo ti chal ti skʼan jnaʼtik xijrasonaje.a Skotol li nupultsʼakale skʼan oyuk noʼox smelolik xchiʼuk ti spasik li kʼusi tskʼan snup xchiʼilike. Li kajnil xchiʼuk voʼone, skoltaojunkutik li Vivlia sventa jechuk jpaskutik taje.

Mariano: Xuʼ van jech avaʼuk.

Roberto: Li stestigounkutik Jeovae oy jpajinakutik ta Internet ti te yichʼoj talel mantaletik sventa nupultsʼakaletik xchiʼuk utsʼ alaliletike. Ta jkʼan chkakʼbot avil uni jlikeluk kʼusitik oy li ta jpajinakutike.

Mariano: Lek chaʼa, jkʼeltik uni jlikeluk.

Roberto: Li jpajinakutike jaʼ jw.org/tzo. Kʼelavil kʼu yelan xvinaj li slikebale.

Mariano: Toj lek chkil li lokʼol te xvinaje.

Roberto: Leʼe jaʼ jchiʼiltak ti yakal chcholik mantal ta yantik lumetike. Ochkutik avil ti bu chal: «Vunetik xchiʼuk yan kʼusitik», li tee xuʼ chavil achʼ revistaetik xchiʼuk yan vunetik ti chalbe skʼoplal utsʼ alalil xchiʼuk yan kʼusitike. Jech kʼuchaʼal liʼe, jkʼeltik avil kʼusi chal li ta foyeto Lekil aʼyejetik yakʼoj Dios, yuʼun oy jun xchanobil ti xi chale: «¿Kʼuxi xuʼ xmuyubajik li utsʼ alaliletike?».

Mariano: Toj labal sba li mantal taje, ta jkʼan ta jchanbe skʼoplal.

Roberto: Li ta xchanobil liʼe te ta jtatik epal tojobtaseletik ti tskoltautik sventa xijmuyubaj noʼox li ta jnupuneltike. Kʼelavil li kʼusi chal ta xchibal sjakʼobile Mariano. ¿Mi xuʼ xakʼel talel li chib orasion ta slajeb parafoe?

Mariano: Lek oy, xi chale: «Li nupultsʼakaletike skʼan xichʼ sbaik ta mukʼ xchiʼuk skʼan sbaik. Ta skoj ti jsaʼ mulil xchaʼvoʼalike, skʼan snaʼ xakʼ sbaik ta perton sventa xmuyubajik-o». Jech avaʼuk.

Roberto: Kolaval ti laj akʼel talele. Oy jayib teksto te chvinaj, li june jaʼ Efesios 5:33. Jsaʼtik avil li kʼusi chale. ¿Mi xa abolaj xakʼel tal?

Mariano: Lek, xi chale: «Jaʼ yuʼun viniquetic, cʼano me avajnilic jujunoxuc jech chac cʼu chaʼal cʼux ta avoʼnton abecʼtal atuquique. Jech ec li antsetique, acʼo yichʼ ta mucʼ li smalalique».

Roberto: ¿Mi laj avaʼi li kʼusi chale? Li kʼusi skʼan xale jaʼ ti xkakʼbetik li kʼusi smalaoj chkakʼbetik li yane.

Mariano: Mu xkaʼibe smelolal.

Roberto: Jnoptik avaʼi, ¿mi mu jechuk ti jkotoltik oy kʼusitik ta jpastik sventa xichʼutik ta mukʼ li kajniltike? ¿Mi mu oyuk ta yoʼontonik li antsetik ti kʼanbiluk yuʼun smalalike?

Mariano: Jech xaval avaʼuk.

Roberto: Ti xakʼ ta ilel ti skʼanoj yajnil li vinike, ¿mi mu masuk kʼun chaʼi xanaʼ sventa xichʼ ta mukʼ smalal li antse?

Mariano: Jaʼ jech avaʼuk.

Roberto: Akʼo mi oy xa mas ta chaʼmil jabil laj yichʼ tsʼibael li teksto ti nakatik to la jkʼeltike, mi laj kakʼ ta jkuxlejaltik li lekil tojobtaseletike, ta me jtabetik sbalil. Jech kʼuchaʼal chkiltike, xchaʼvoʼalik ch-albatik mantal.

Mariano: Toj labal sba yutsil li kʼusitik chal li Vivliae, muʼyuk toʼox bu xkaʼi-o jech maʼ taje.

Roberto: Toj lek chkaʼi ti jech chavale Mariano. Oy ta koʼonton chtal jkʼelot yan velta yoʼ jkʼelbetik skʼoplal li yoxibal sjakʼobil li ta foyeto ti te oy ta jpajinakutike, ti xi chale: «¿Mi xuʼ xichʼ tuchʼel nupunel mi chʼabal muyubajele?».b

Mariano: Lek chkaʼi. Chkalbe kajnil ti koʼoluk jchantik xchiʼuke.