Li manxoale akʼo ta ilel apʼijil
Jun ermana ti Antonia sbie, ch-abtej ta skʼelel molmeʼeletik xchiʼuk li buchʼutik ipike. Jun veltae kʼot ta jpʼej na, vaʼun kʼalal la stij li tiʼ nae, lokʼ talel jun ants ti ch-ilin tajeke. Vaʼun tsake ta utel ta skoj ti mu la sobuk kʼot sventa chchabibe li smeʼe. Akʼo mi ta yorail kʼot li Antoniae, pe ta slekil yoʼonton la skʼanbe perton.
KʼALAL kʼot yan velta li Antoniae, tsake ta utel yan velta yuʼun li ants taje. ¿Kʼusi la spas? Xi chale: «Toj chopol onoʼox laj kaʼi xchiʼuk muʼyuk srasonal ti jech tspasbune. Pe akʼo mi jech, la jkʼanbe perton yan velta xchiʼuk laj kalbe ti xkaʼibe smelolal ti chopol tajek chaʼi sba ta skoj li kʼusi chkʼot ta stojolale».
Ti voʼotuk jech lanuptane, ¿kʼusi la apas ti jechuke? ¿Mi ta slekil avoʼonton latakʼav? ¿Mi toj tsots van laj avaʼi spajtsanel aba? Melel onoʼox ti mu kʼunuk chkaʼi spajtsanel jbatik kʼalal jech chkʼot ta jtojolaltike. Toj tsots chkaʼitik ti manxoukutik kʼalal oy buchʼu tsokbutik joltike o kʼalal toj ep kabteltike.
Akʼo mi jech, li Vivliae chalbutik ti skʼan maxoutikuke. Jech xtok chal ti snitojbe sba tajek skʼoplal xchiʼuk pʼijilal li manxoale xchiʼuk li slekil oʼontonale. Xi chal li Santiago 3:13: «¿Buchʼu pʼij xchiʼuk lek xaʼibe smelolal avuʼunik? Akʼo yakʼ ta ilel ta slekil talelal li yabteltak ti ta manxoal tspas skotol li kʼusitik ti te chlik tal ta pʼijilale». ¿Kʼu yuʼun jech chal li Vivliae? ¿Kʼuxi ti jaʼ svinajeb pʼijilal li manxoale xchiʼuk ti jaʼ te likem talel ta stojolal li Diose? ¿Kʼusi tskoltautik sventa jchʼiestik li talelal taje?
¿KʼUXI TI JAʼ SVINAJEB PʼIJILAL LI MANXOALE?
Tslamajes kʼop. «Li cʼunil tacʼovele jaʼ tspajes li cʼacʼal oʼntonale; yan li tsots tacʼovele jaʼ tsliques cʼacʼal oʼntonal» (Prov. 15:1).
Mi ta anil noʼox chij-iline yantik noʼox me ta jtsanbetik skʼakʼal li siʼe xchiʼuk xuʼ me ta ora slikes kʼop (Prov. 26:21). Akʼo mi jech, kʼalal ta slekil koʼonton chijtakʼave jaʼ me tslamajes li kʼope. Yuʼun onoʼox akʼo mi ch-ilin tajek li jun krixchanoe xuʼ jlamajesbetik yoʼonton.
Jaʼ jech laj yakʼ venta li Antoniae. Kʼalal lek noʼox yoʼonton ilate, li antse och ta okʼel. Vaʼun albat ti yuʼun toj tsots svokol li stuke xchiʼuk li yutsʼ yalale. Li Antoniae la xcholbe mantal xchiʼuk lik xchanubtas ta Vivlia, taje jaʼ koliyal ti laj yakʼ ta ilel slekil yoʼonton xchiʼuk manxoale.
Xijmuyubaj yuʼun. «Xmuyubajik noʼox li manxoetike, yuʼun jaʼ chuʼuninik li balumile» (Mat. 5:5).
Epal krixchanoetik ti simaronik toʼox tajeke sjeloj xa stalelalik. Jech oxal, jun xa tajek yoʼontonik li avie. ¿Kʼu yuʼun? Yuʼun mas xa lek xkuxlejalik xchiʼuk snaʼojik ti oy kʼusi toj kʼupil sba tstaik ta tsʼakale (Kol. 3:12). Kalbetik skʼoplal kʼuxi laj yut sventa sjel stalelal jun jkʼelvanej ta sirkuito ti te chtun ta España ti Adolfo sbie. Pe baʼyel jkʼeltik kʼu toʼox yelan li xkuxlejale.
Xi chale: «Muʼyuk sbalil chkaʼi li jkuxlejale. Ta skoj ti toj echʼem xi-iline, jlom kamigotake chiʼik xa kuʼun, yuʼun toj toybaun xchiʼuk toj simaronun. Li bu to laj kichʼ-o koʼontone jaʼo kʼalal laj kichʼ pajulanbel vakib velta kuchilue, toj ep mal jchʼichʼel xchiʼuk jutuk xa mu lilaj-o».
Li avi une xi xa chal mantal li Adolfoe: «Jkotoltik skʼan jchʼiestik li manxoale». Chakʼ tajek persa sventa lekuk ta chanel stalelal li Adolfoe, jech oxal skotolik chnopajik ta stojolal ta skoj ti lek yoʼonton xchiʼuk ti lek xkʼanvane. Xmuyubaj tajek ti jel li stalelale xchiʼuk tstojbe ta vokol Jeova ti koltaat sventa spas ta jun krixchano ti lek yoʼontone.
Xmuyubaj Jeova. «Jnichʼon, bijan me, jech xcuxet noʼox coʼnton avuʼun; jech xuʼ ta jtacʼbe li bochʼo chopol chiyalbun jcʼoplale» (Prov. 27:11).
Li Jeovae te tsokilanbat sjol yuʼun li bankilal yajkontrae, li Diabloe. Akʼo mi oy srasonal ti x-ilin Jeova ta skoj li kʼusitik chal Satanase, pe li Vivliae chal ti ‹mu ta aniluk ch-iline› (Éx. 34:6). Ti oy smalael kuʼuntike xchiʼuk ti manxoutik jech kʼuchaʼal Jeovae, jaʼ me jech chkakʼtik ta ilel jpʼijiltik, vaʼun toj lek chil li stuke (Efes. 5:1).
Kuxulutik ta jun chopol balumil, jaʼ yuʼun ta onoʼox xkiltik o ta jchiʼintik ta loʼil krixchanoetik ti «xtoyet xa chaʼi sbaik, jpʼel xalik, chchopol kʼoptavanik, [...] chchopol loʼiltavanik, mu snaʼ spajes sbaik, [xchiʼuk] simaronik» (2 Tim. 3:2, 3). Pe taje maʼuk me srasonal kuʼuntik ti muʼyuk slekil koʼontontike. Yuʼun li Skʼop Diose tsvules ta joltik ti «pʼijilal ta toyole [...] lek yoʼonton, oy srason» (Sant. 3:17). Mi lek koʼontontik xchiʼuk mi jnaʼtik xijrasonaje jaʼ me jech chkakʼtik ta ilel li spʼijilal Diose. Li pʼijilal taje, jaʼ me tstij koʼontontik sventa ta slekiluk koʼonton xijtakʼav kʼalal oy buchʼu tsokbutik joltike. Vaʼun jaʼ jech chijnopaj batel ta stojolal li buchʼu chakʼ talel pʼijilale, li Jeovae.